گازەتتىڭ قۋشيعانى – قۇلپىرعانى. ارداقتى دا ءازىز جاندى ارىپتەس-اعالاردىڭ تاراپىنان «گازەت قۋشيىپ, قۇلاشىمىزدى جازىپ وقي الماي قالدىق؟!» دەگەن نازىن ءوز قۇلاعىمىزبەن تالاي ەستىدىك. اڭگىمە – «Egemen Qazaqstan» حاقىندا. حال-قادەرىمىزشە «جاڭاشىلدىق تەحنولوگيا تالاپتارىنىڭ ۇدەسىنەن شىعۋ ءۇشىن شەتەلدەن الىنعان سۋ جاڭا باسپا ماشينالارىنىڭ بەت قاتتايتىن استاۋىنىڭ كولەمى وسىنداي, ياعني تەك وسىنداي جاعدايدا سۇيىكتى گازەتىڭىزدىڭ اۋەلدەگىدەي سىرتى عانا ەمەس, بارلىق بەتى ءتۇرلى-ءتۇستى بويالىپ قۇلپىرىپ شىعادى», دەپ ءمان-جايدى تۇسىندىرۋگە تىرىستىق تا: «ماسەلەنكي, الەمنىڭ الپاۋىت باسىلىمدارى «ۆاشينگتون پوست», «شپيگەل», «تايمس», «مىللەتتى» الىپ قاراڭىزشى, قاعازى ۇلدىرىكتەي جۇپ-جۇقا, ال بارلىق بەتى ءتۇرلى-ءتۇستى...». «ا-ا, سولاي ما, باسە...». اعالارىمىز تەز تۇسىنىستىك تانىتادى. نەگە دەسەڭىز, ولار ءوزىمىزدىڭ كەشەگى «قاندى كويلەك قارۋلاستارىمىز» ەمەس پە, تەگىندە, كەشەگى جاڭالىققا جان قۇمارلىعى زور جاۋىنگەر جۋرناليستەر ەمەس پە؟ نەگە دەسەڭىز, قورعاسىننان قۇيىلىپ, قارا بوياۋى جاعىلىپ شىعاتىن گازەتتىڭ ارىپتەرىن قىزارتۋ ءۇشىن بۇكىل سول تارالىمدى ەكىنشى مارتە قايتا باسۋ كەرەكتىگىن كوزبەن كورگەن ءتىرى كۋاگەرلەر دە وزدەرى ەمەس پە؟ باس رەداكتوردىڭ ساياسي-ۇكىمەتتىك تاقىرىپتاعى ماقالالار جونىندەگى ورىنباسارى سامات مۇسانىڭ ءدال الگى ۇرىمتال كەزەڭدە, ياعني باس باسىلىم باسشىلىعىنىڭ, رەداكتسيالىق القانىڭ شەشىمىنە ساي جوعارىدا ايتقان جاڭعىرتۋ ۇستىندە جاۋاپتى حاتشى بولىپ تاعايىندالۋىن بىردەن ستراتەگيالىق تەگەۋرىندى جوباعا جورىعانىمىز دا سوندىقتان. ءجۇز جاساعان باس گازەت جاس بۋىن – جاڭا باسشىلىق تۇسىندا, جاڭا پىشىمگە كوشكەن وتپەلى ترانزيتتىك كەزەڭدە, كۇردەلى ۇردىسكە كەشەگى مەن بۇگىنگىنىڭ وزىق ۇلگىلەرىن ۇيلەستىرە الاتىن كانىگى مامانعا ءزارۋ ەدى. سامات مۇسا وسىنداي مۇقتاج ساتتە مىق شەگەدەي ءوز ورنىنان تابىلدى. راس, جاڭا فورماتتاعى باسىلىمنىڭ ءتۇر-سيپاتىنا, ءدۇر سىلكىنىپ سۇرلەۋ سالعان بولمىسىنا وقىرماننىڭ كوزى بىردەن ۇيرەنگەن جوق, بىرتە-بىرتە ۇيرەندى. «شتابقا سامات كەلگەلى گازەتتىڭ سۋرەتتەرى ايشىقتالىپ, بەتى نۇرلانىپ شىعاتىن بولدى», دەيدى قازاق جۋرناليستيكاسىنىڭ ارداگەر اقساقالى, فوتوونەرىنىڭ ايتۋلى شەبەرى, «قورعاسىن ءداۋىرىنىڭ» ءھام گازەت سەكرەتارياتىنىڭ بەل بالاسى نۇرمانبەت اعا قيزات ۇلى شىنايى كوڭىلىمەن. كاسىبي باعانى تەك قانا بۇل كاسىپتىڭ قىر-سىرىنا ەرتەدەن قانىق جاندار عانا بەرە الماق.
البەتتە, كەشەگى «سق»-نىڭ بولمىسىن بۇگىنگى «Egemen Qazaqstan»-مەن سالىستىرۋعا مۇلدەم كەلمەس. باسشىلىق ەڭ الدىمەن گازەتتىڭ كومپوزيتسيالىق-گرافيكالىق مودەلىن جۇيەلى تۇردە وزگەرتتى, ەل گازەتىنىڭ ماكەتى مەن بەتتەلۋى دە بايىرعى قاتىپ-سەمگەن تەوريالىق تەندەنتسيا تالاپتارىن بۇزدى, جالپى ديزاينى الەمدىك ارىپتەس باسىلىمدارداعىداي جاڭاشىلدىق قالىپقا ءتۇستى. كۇندەلىكتى, دۇيسەنبىدەن (كوكپ-نىڭ قۇدىرەتى كۇشتى كەزىندە دە گازەت ءبىرىنشى كۇنى شىقپاعان!) باستاپ جۇماسىنا بەس رەت تارايتىن باسىلىمنىڭ جاڭاشا قۇرىلعان تەحنولوگيالىق كوشىنىڭ باسىندا باسقارما توراعاسىنىڭ ۇيعارىمىمەن جاڭادان جاساقتالعان س.مۇسا مەن ونىڭ كومانداسىنىڭ تۇرۋى دا سوندىقتان. نۇر-سۇلتاندا كومپيۋتەرمەن بەتتەلەتىن گازەتتىڭ تۇپنۇسقاسى ءتۇن جامىلىپ ۇلگەرمەستەن رەسپۋبليكانىڭ تۇكپىر-تۇكپىرىندەگى بارلىق باسپاحانالارعا ينتەرنەت جەلىسى ارقىلى جەتىپ ۇلگەرەدى. 60-شى جىلعا دەيىنگى وقيعادان حابارسىز بولعانىمىزبەن, سارعايعان گازەت پاراقتارىن اقتارعاندا كوپ جايتتى ءىشىمىز سەزەدى, ال ءوزىمىز ارالاسقان, ءوزىمىز كۋا 70-ءتىڭ سوڭى مەن 80-ءشى, 90-شى جىلدارداعى گازەت وندىرىسىمەن سالىستىرعاندا بۇل, ارينە, فانتاستيكا! باس باسىلىمنىڭ بۇگىنگى شىققان ەڭ بيىك شىڭى!
«حك»-دان «ەق»-عا قايتا ورالعان «سق»-لىق جىگىت. كوكبازاردىڭ تۇبىندەگى كوك شىنىمەن كومكەرىلگەن 9 قاباتتى عيمارات قازاقستان جۋرناليستەرىنىڭ «التىن ورداسى» ەدى... «سق»-دانمىن!» دەۋ باقىتى ەكىنىڭ بىرىنە بۇيىرماعان سول زاماندا سامات مۇسا «سوتسياليستىك قازاقستاننىڭ» سەكرەتارياتىندا قىزمەت ىستەيتىن. بۇگىنگى جىبەك جولى, گوگول, پۋشكين, قالداياقوۆ شارشىسىندا جايلاسقان رەداكتسيالار مەن باسپاحانا, باسپا عيماراتىندا بار ءجۋرناليستىڭ ءىس-شارۋا بابىمەن ءجيى باس قوساتىنى سەكىلدى ساماتپەن باسپاحانا تسەحىندا ارقايسىمىز ءوز گازەتىمىزدىڭ «وتىمەن كىرىپ, ك ۇلىمەن شىعىپ» جۇرگەن شاقتا تانىسقانبىز. ارتىق ءسوزى جوق, بىرتوعا, قىز مىنەزدى, جىميىپ قانا جىلۇشىراپ جۇرەتىن جاس جىگىتپەن اۋىلىمىز دا ءبىر باعىتتا, اۆتوبۋسىمىز دا ءبىر – 100-ىنشىگە ءمىنىپ, كۇندە كەشكىلىك ول «ەسەنتاي», مەن «قازاقفيلم» شاعىن اۋداندارىنا بەت الامىز. جاڭاعى شارشىدا كىدىرىس تاپپاي جارىققا شىعىپ جاتاتىن جۇزدەگەن گازەت-جۋرنالدا مىڭداعان ادام ەڭبەك ەتتى. سول زاماندا اعا بۋىن جۋرناليستەردىڭ وزدەرىن وكشەلەگەن كەيىنگى بۋىنعا سىرتتاي زەر سالا ءجۇرىپ, رەتى كەلگەندە ءوزى ىستەيتىن رەداكتسياعا قىزمەتكە تارتاتىن, ساۋداعا تۇسپەيتىن, ساتىلمايتىن وتە ءبىر جاقسى ادامي قاسيەتى بار-تىن. ساماتتى «سق»-دان سۋىرىپ الۋدىڭ وڭايعا تۇسپەگەنى ءالى ەسىمدە!.. قىزمەتىنە, ۇجىمىنا مۇنداي ادال جان بولار ما؟ «سەكرەتارياتتى قي, رەپورتەرلىكتى كورسەڭشى, ۋاقىت كەلدى!..», دەيمىن عوي باياعى. «قازاقستان پيونەرى» مەن «لەنينشىل جاسقا» شىققان ماقالالارىمەن, ءتىپتى جىر شۋماقتارىمەن تانىسپىن! تاۋەلسىزدىكتىڭ ەلەڭ-الاڭى, قوعام وزگەرىپ, سانا تۇلەپ... گازەتتەر قورعاسىننان قۇتىلىپ, وفسەتتىك باسىلىمعا كوشكەن. اقپارات اتاۋلى اتويلاپ العى شەپكە شىقتى, كەڭەستىك تارتىپتە گازەتتىڭ سوڭعى بەتىنەن عانا ورىن بەرىلەتىن جەدەل جاڭالىقتار مەن حابار-وشارلار ايدى اسپانعا شىعارىپ... ءبىرىنشى بەتكە جايعاستى! سول سەبەپتى دە ماعان گازەتتىڭ كۇرەتامىرى – سەكرەتارياتتىڭ ىستىق-سۋىعىن جانىمەن سەزىنەتىن, اقپارات تاسقىنىنا توتەپ بەرە الاتىن, كۇندەلىكتى شىعىپ جاتقان گازەتتىڭ كەشىكپەي شىعۋىنا تىكەلەي سەبەپشى بولاتىن سامات كەرەك ەدى قالاي دا! سەنىم اقتالدى. «سق»-دان «حك»-عا سۋساپ كەلگەن ەكەن, س.مۇسا ۋاقىت وزدىرماستان اقپارات ءبولىمىنىڭ اقمىلتىقتاي اتىلعان اقبەرەن تىلشىسىنە اينالدى. كەيىن مەن ساياسات ءبولىمىنىڭ رەداكتورىلىعىنا اۋىسقاندا ساكەڭ اقپارات ءبولىمىنىڭ تىزگىنىن ءوز قولىنا الدى.
ءبىر كۇنى... ءيا, ەكى كۇن ىشىندە «حالىق كەڭەسى» جابىلىپ تىندى. جۋرناليستىك ۇيىمنىڭ 70 قىزمەتكەرىنە ەكى كۇننىڭ ىشىندە تولىقتاي قىزمەت تابىلدى. «ەگەمەن قازاقستاننىڭ» باس رەداكتورى نۇرلان ورازالين اعامىزدىڭ جۇرەك قالاۋىنا جەتى جۋرناليست ءتۇسىپپىز. قۋاندىق!.. جەتەۋدىڭ ىشىندە «بايىرعى وتانىنا» قايتا ورالعان سامات مۇسا دا بار ەدى.
كەڭەستىك جۋرناليستيكانىڭ ۇياڭدىق مەكتەبى. الما مۇحامەدجانوۆا, سامات مۇسا جانە مەن اقپارات جيناپ, ءتۇس اۋعانعا دەيىن اۆتورىن كۇتىپ بوس تۇراتىن ءبىرىنشى بەتتى تولتىرۋدىڭ قامىمەن ۋاقىتپەن ساناسپاي, اتتاي شاپتىق. ۋاقىت تەزى سولاي-تىن. ماشبيۋروعا كىرگەنىنەن شىققانى تەز س.مۇسا «ديكتوۆكاعا» كەلگەندە دە شاشاسىن شاڭ قاپتىرمادى. ءبولىم باستىعىمىز – ساماتقا «سق»-دان, ماعان «جەتىسۋدان» ەتەنە تانىس ماماديار جاقىپ اعامىز. شىنتۋايتىندا س.مۇسانىڭ ناعىز جۋرناليستىك ابجىلدىگىمەن ەرەكشەلەنگەنى وسى جىلدار. تالعات مۇساباەۆ كەمە كومانديرى رەتىندە ەكىنشى مارتە 207 تاۋلىك 12 ساعات 49 مينۋتتىق 1998 جىلعى (قاڭتار – تامىز) عارىش ساپارىنا اتتانعاندا ونىڭ بايقوڭىردان مولدىرەتىپ دامىلسىز جازعان رەپورتاجدارى ءۇش كۇن بويى جەدەل تۇردە كۇندەلىكتى نومىرگە سالىنىپ جاتتى.
90-شى جىلداردىڭ اياعى... اۋىر كەزەڭ. جالاقىعا قول جەتپەي جاتقان سول جىلدارى الماتى وبلىسىنىڭ تاراعان شارۋاشىلىقتارىنان ايلىعىمىزدىڭ ورنىنا كوممەرتسيالىق ءبولىم ارقىلى ءبىر-ءبىر قويدان العانىمىزدى قالاي ۇمىتايىق!؟ 12 قاباتتى عيماراتتاعى «ەگەمەننىڭ» تابالدىرىعىنا «كاماز»-دى تاقاپ قويىپ جاپپاي ءتۇسىرىلىپ جاتقان ارىق-تۇرىق مەرينوستىڭ ءبىرىنىڭ قولدان شىعىپ, كوشەنىڭ ارعى بەتىندەگى كوكمايسالى 28 پانفيلوۆشىلار ساياباعىنا قويىپ كەتكەنى شە؟! ونىڭ قىزىقتى حيكاياسىن ارىپتەسىمىز – بۇگىنگىنىڭ ءدۇلدۇل سپورت رەپورتەرى عالىم سۇلەيمەن ادەمىلەپ ايتقاندا, كۇلكىدەن جارىلامىز, ءبارى-ءبارى اينا-قاتەسىز كوز الدىمىزعا ەلەستەي كەلىپ, ەسكە تۇسەدى. ءيا, سول ايتقان, قالتانىڭ تىسى ىشىنە قابىسقان وتە-موتە جۇدەۋ جۇرگەن كەزىمىز... ماقالا مەن ماقالانىڭ اراسىندا سامات ەكەۋمىز ءبىرىنشى قاباتتاعى كىرەر اۋىزداعى كافەدەن ەكى تال پەچەنە مەن ارزانداۋ ءبىر-ءبىر ستاقان كاكاو ىشۋگە تۇسە قالدىق. ليفتىدەن شىقساق, دالىزدە دەپۋتات زامانبەك نۇرقادىلوۆ اعامىز تۇر. پارلامەنتتىڭ ءماجىلىس زالىنان تانىستىعىمىز بار. دەرەۋ قول بەرىپ سالەمدەستىك. ءسوزدى زاكەڭ ءوزى باستادى: «مىناۋ «كازپراۆداعا» ءبىر ماقالا اكەلىپ ەدىم, قاسيەتسىز باس رەداكتور سرىبنىح قيسايىپ الىپتى, باسقىسى كەلمەيدى». جاريالىلىق اتاۋلىعا بارلىق ەسىك-تەرەزەنىڭ ايقارا اشىلعان زامانى. «وي, اعا... ءبىزدىڭ «ەگەمەنگە» بەرسەڭىزشى!» «كوڭىلدەرىڭە كەلمەسىن, شەرحان كەتكەن سوڭ گازەتتەرىڭنىڭ ازۋ ءتىسى ءتۇسىپ قالدى». قارسىلىق بىلدىرۋگە بەيىل ەدىك, زاكەڭ ءسوزىمىزدى ءبولدى. «جۇرىڭدەر, مىناۋ ماقتاپ جۇرگەن كامال كافە-بارلارىڭا كىرىپ كورەيىك, سەندەرگە كوفە الىپ بەرەيىن... ىشەتىن-جەيتىن نە بار ءوزى؟!» (ىشكى ويىمىز: «وي, اعا, ءبارى بار عوي, ءبارى بار, بىراق...»). سامات ەكەۋمىزدىڭ داۋىستارىمىز ءبىر جەردەن شىقتى. «جو-وق, اعا, تويىپ تۇرمىز. راحمەت...».
ءۇش رەت قايتالاپ جاساعان ۇسىنىسى وتپەگەن اعامىز, كەنەت بۇرىلىپ, قولىن قايتا سوزىپ تۇرىپ: «سوڭعى رەت ايتامىن, جۇرىڭدەر... وي, اللا-اي...», دەدى. مىسى باسىم دەپۋتاتپەن «قۋانا» قوشتاستىق. ول سىرتقى كەڭ دە بيىك باسپالداقتان شيراق باسىپ ءتۇسىپ بارا جاتتى. ءبىز, كەڭەس جۋرناليستەرىنىڭ ۇياڭدىق مەكتەبىنىڭ وزات شاكىرتتەرى – سامات ەكەۋمىز ءبىر-بىرىمىزگە جالت قاراپ قالدىق. قۇر قاراعانىمىز جوق, قالتامىزداعى سوڭعى «سوقىر تيىندى» بىرىنە ءبىرىن سوققىلاپ, «شىقىلداتىپ» قويدىق...
«اۋىلدىڭ اتى – اتاما, كوشەنىڭ اتى كوكەمە!». س.مۇسا رەداكتسيا استاناعا اتباسىن تىرەگەن تۇستا قۇرىلىسى كۇن ساناپ قارقىنداپ ءوسىپ جاتقان ەلوردا حالقىنىڭ ەڭ الدىمەن رۋحاني مۇقتاجىن جوقتادى. جۇرەگىمەن ەزىلىپ, وقىرمانىن ەلىتىپ ماقالالار جاريالادى. ءدال بۇگىن ساباسىنا ءتۇسىپ, مادەنيەتتىڭ ەلورداسىنا اينالعان قالا حالقى ءۇشىن ول ءبىر وتكىنشى تاريحتاي بولىپ كورىنۋى مۇمكىن-اۋ! بىراق سول جىلدارى سامات مۇسانىڭ گازەتتىڭ بىرنەشە نومىرىنە بىرىنەن سوڭ ءبىرىن ساباقتاستىرىپ جاريالانعان «استانانى قايتسەك قازاقىلاندىرامىز؟» اتتى كوكەيكەستى كولەمدى سەريالى ماقالالارى قوعامدىق پىكىرگە وت بەردى! تىنىمسىز, تالماي ەڭبەكتەندى, جاڭا زامان, جاڭا ءداۋىردىڭ جارشىسى اتاندى. قاتىسىمدىق اقىل-وي جۇيەسى لاۋازىمدى قىزمەت ادامدارىمەن بايلانىستا شيرايدى ەمەس پە؟ كەشەگى ۇياڭ بوزبالا-جىگىت كوممۋنيكاتيۆتىك قۇزىرەتتىلىك ءتالىمىن بويىنا سىڭىرگەن سالماقتى دا ساليقالى ازاماتقا اينالدى. ونىڭ ىقپالدى ۇل-قىزدارى مەن اقشالى اعايىن-تۋىستارىنىڭ كۇش سالۋىمەن تانىس, بەيتانىس جاقىندارىنا كوشە, اۋىل اتتارىن الىپ بەرۋگە ۇمتىلۋشىلىق ارەكەتتەرى جيىلەگەنىن «ەگەمەن» ارقىلى سىن تەزىنە العانى دا ەسىمدە. ءسۇيسىنتىپ جازدى, ءسۇيسىنىپ وقىپ جۇردىك. ايتقاندايىن, سۋرەتتەرى وبلىستىق گازەتتەردىڭ 1-ءشى بەتتەرىنەن تۇسپەيتىن اكىرەڭدەگەن اكىمدەردى سىناعان «اكىمدەر وزدەرىن حاننان كەم سانامايدى» دەگەن ماقالاسى دا كەزىندە ۇلكەن قوعامدىق رەزونانس تۋدىردى. جۋرناليستەر اراسىندا جانىڭا جاقىن ارىپتەستىڭ شىعارماشىلىق تىنىسىن قالت جىبەرمەي باقىلىپ, «گازەت جاقسى شىققان كۇنى» ونىڭ ءتاۋىر ماقالاسىنا شىنايى سەزىممەن ىقىلاس بىلدىرەتىن ادەبىمىز بار. دەرەۋ حابارلاسىپ, قولداپ, ءبىر-ءبىرىمىزدى قولپاشتاپ قويار ەدىك. جوعارىداعى الەۋمەتتىك رۋحاني ۋىتى زور ماقالالار سامات ەڭبەكتەرىنىڭ بىرەگەيلەرى عانا. ال قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆپەن, وزگە دە جوعارى بيلىك وكىلدەرىمەن شەتەلدىك ىسساپارلارعا شىققانداعى, سونداي-اق ءۇندىستان, مىسىر, بەلگيا, تۇركيا مەملەكەتتەرىنەن جازعان جولساپار-ەسسەلەرىن وقىپ كورىڭىزشى!.. وقىرمانعا كوزايىم بولار ءتاپ-ءتاۋىر ءبىر جيناق اۋەلدەن داپ-دايىن تۇر. بەينەبىر جۋرناليستيكا ءىلىمىنىڭ «قارا جۇمىسىنداعى» ونىڭ سان جىلدار شۇمەكتەپ توككەن ماڭداي تەرىنىڭ كوركەمدىك گالەرەياسىنداعى كورىنىستەر دەرسىڭ!
ەلباسىمەن بىرگە كىشى قاجىلىققا بارعانىن ەرەكشە مارتەبە سانايدى... ال قىرىق جىلعا جۋىق ۋاقىتتا جۋرناليستىك ساپارمەن ۇزىن-سانى 25 شەت- ەلدى ارالاپتى. ەڭ جاقىن ستراتەگيالىق سەرىكتەس ەلدىڭ استاناسى – ءبىر ماسكەۋدىڭ وزىنە توعىز مارتە جولى تۇسكەن! باس باسىلىمداعى ونىڭ ولشەۋسىز ەڭبەك, قالتقىسىز قىزمەت جولىنىڭ حرونومەتراجى وسىلاي جالعاسىپ كەتە بەرەدى.
بۇگىن گازەت جاقسى شىعىپتى!.. تاڭەرتەڭگى جاڭا نومىرمەن تانىسقان رەداكتسياداعى ارىپتەستەر اراسىندا «بۇگىن گازەت جاقسى شىعىپتى...» دەپ قوياتىن جىلى لەبىزبەن ايتىلاتىن جاقسى ءبىر ءداستۇر بار. سول كۇنگى نومىرگە كوپتەن كۇتكەن ماقالاسى سالىنىپ, مارقايىپ تۇرعان ءتىلشىنىڭ كوڭىل تولقىنىسى ءوز الدىنا! وسى ارادا ايتا كەتەر ءبىر جايت, گازەتتىڭ بەتىن اشىپ قالعاندا بىردەن كوزگە تۇسەتىن ماقالانىڭ, سۋرەتتىڭ, كەيدە كوللاجدىڭ مەنمۇندالاپ تۇراتىنى – ءبارى-ءبارى سەكرەتاريات شەبەرلەرىنىڭ, ونىڭ تىكەلەي جەتەكشىسىنىڭ قولتاڭباسى ەكەنىن وقىرماننىڭ دا بىلگەنى ءلازىم. قىزمەتى تىنىشسىز گازەت سەكرەتارياتىنىڭ جۇمىسى بۇرىنعى «قورعاسىن داۋىرىندە» دە, قازىرگى اقپاراتتىق تەحنولوگيانىڭ دامىعان زامانىندا دا ەشقاشان جەڭىل بولعان ەمەس. سەكرەتارياتقا ەجەلدەن «باس شتاب» دەپ ايدار تاعىلۋىنىڭ سىرى دا, مىنە, وسىندا جاتىر.
«كوپشىلىك بۇعان كوپ ماماندىقتىڭ ءبىرى دەپ قارايدى. مەن ءوزىم جۋرناليستەردىڭ, اسىرەسە گازەت جۋرناليستەرىنىڭ ەڭبەگىن ەرەكشە باعالايتىن جانمىن». اتاقتى جازۋشى گەراعانىڭ – گەرولد بەلگەردىڭ وسىناۋ ۇستانىمى سامات مۇسا سياقتى ارىپتەستەرىمىزدىڭ ەرەن ەڭبەگىنە ارنالىپ ايتىلعانداي. جانە دە «قازاقستان رەسپۋبليكاسىنىڭ ەڭبەك سىڭىرگەن قايراتكەرى» اتاعى, «قۇرمەت» وردەنى مەن مەرەيتويلىق مەدالدار, «اقپارات سالاسىنىڭ ۇزدىگى» توسبەلگىسى مەن اقمولا وبلىسىنداعى ءبىرجان سال اۋدانىنىڭ قۇرمەتتى ازاماتى سياقتى ماراپاتتار ءتول كاسىبىنە ادال, ۇزاق جىل تەك قانا گازەت ءىسى ءۇشىن بويداعى بارلىق ەنەرگەتيكالىق كۇش-قۋاتىن سارقا جۇمساعان بىرەگەي جۋرناليست – ساكەڭە بەرىلگەن ءادىل باعا دەپ بىلەمىز.
الماتى
