وسى ورايدا اقتوبە قالاسى بويىنشا وتكىزىلگەن مەملەكەتتىك اۋديت پەن 103 ميلليارد تەڭگەگە جۋىق قوماقتى قاراجاتتى قۇرايتىن 34 مەكەمە-كاسىپورىن قامتىلسا, سونىڭ ىشىندە انىقتالعان بۇزۋشىلىقتاردىڭ كولەمى 14 ميلليارد 382 ميلليون تەنگەنى قۇراپ وتىر. ونىڭ بەلگىلى ءبىر بولىگىن قارجىلىق تۇرعىداعى قيسىنسىزدىقتار بولسا, بيۋدجەت قاراجاتىن ءتيىمدى پايدالانۋ ىسىندە جول بەرىلگەن بىلىقتار مولشەرى استرانوميالىق دەڭگەيگە اسقاقتاپ كەتە بارادى. بۇعان قوسا ءتيىمدى جوسپارلاۋ نورماتيۆتەرى مەن راسىمدەردى ورىنداۋ تارتىپتەرى دە شەكتەن تىس بۇزىلعان.
ساراپشى ماماندار مۇنداي كولەڭكەلى كورىنىستەر ەڭ الدىمەن قۇرىلىس سالۋ مەن كۇردەلى جوندەۋ جۇمىستارى كەزىندە ورىن العانىن العا تارتادى. ونىڭ ءبارىن ەسەپتەپ, تىزىمگە كىرگىزەر بولساق, گازەتتىڭ تۇتاس ءبىر بەتىنىڭ 4/1 بولىگىن الاتىن بولعاندىقتان بۇلاي ىستەۋدەن سانالى تۇردە باس تارتقاندى ءجون كوردىك. ايتسە دە اقتوبە قالاسىنداعى "تابىساقتوبە" جشس-دا ورىن العان قارجىلىق بۇرمالاۋشىلىقتار قوماقتىراق كورىنەدى. سونىڭ ىشىندە جالپاقتىعى تۇيەنىڭ تابانىنداي قوماقتى سوما قاتتى تۇرمىستىق قالدىقتار (قتق) پوليگونىنا ورىندالماعان جۇمىس كولەمى ءۇشىن تولەنگەن. سونداي-اق جارعىلىق كاپيتالداعى بيۋدجەتتىك ينۆەستيتسيالار كولەمى قارجىلىق-ەكونوميكالىق نەگىزدەمەگە سايكەس ىسكە اسىرىلماعان. بۇدان كەلگەن شىعىن مەن زيان 10 ميلليون تەنگەدەن اسىپ تۇسەدى.
"بۇعان قوسا اۋديتتىك تەكسەرۋلەر كەزىندە اقتوبە قالالىق اكىمدىگىنىڭ جەر قاتىناستارى, ساۋلەت جانە قالا قۇرىلىسى ءبولىمى جەر تەلىمدەرىن ماقساتتى تۇردە پايدالانۋدى باقىلاۋ ءىسىن جۇرگىزبەي كەلگەنى انىقتالدى. سونىمەن بىرگە اتالعان ماسەلەگە قاتىستى مونيتورينگتىك زەرتتەۋلەر جاساۋ ءىسى دە قولعا الىنباعان. سونىڭ سالدارىنان جەرگىلىكتى بيۋدجەت كىرىسىنە 44,1 ميلليون تەنگە قاراجات وندىرىلمەي قالدى", دەدى ورىن العان ولقىلىقتار جونىندە اقتوبە وبلىسى بويىنشا تەكسەرۋ كوميسسياسىنىڭ توراعاسى ساعات ەڭسەگەن ۇلى.
ونىڭ وي-تۇجىرىمىن تاعى دا تولىقتىرا تۇسسەك, جالداۋ جانە نەسيە بويىنشا تۇرعىندارمەن ۋاقىتىندا ەسەپ ايىرىسۋ تەتىگى دە ويلاستىرىلماعان. بۇگىنگى كۇنى سونىڭ سالدارىنان پايدا بولعان قارىزدار كولەمى تەز ءوسىپ بارا جاتقانى ايقىن كورىنەدى. قازىرگى كەزدە تۇرعىن-ءۇي قاتىناستارىنا قاتىستى ماسەلەلەردىڭ الەۋمەتتىك ماڭىزى جوعارى ەكەنىن ەشكىم جوققا شىعارا المايدى. بۇل ىسكە اشىقتىق پەن مولدىرلىك سيپات ءتان ەكەنى دە بەلگىلى. سولاي بولا تۇرسا دا جالعا بەرىلەتىن جاڭا پاتەرلەردى نەگىزسىز جانە زاڭسىز ءبولۋ كورىنىستەرى ورىن العانى قىنجىلتپاي قويمايدى. بۇل ۇدەرىس كەزىندە قۇرىلىستىڭ وبليگاتسيالىق قارىز ەسەبىنەن سالىنعانى ەسكەرىلمەي قالعان. وسى ۇستىرتتىكتىڭ اسەرىنەن اقتوبە قالاسى اكىمدىگىنىڭ بيۋدجەت شىعىندارى 8 ميلليارد تەنگەدەن اسىپ ءتۇستى. ءسويتىپ بيۋدجەتارالىق قاتىناستاردىڭ ورەسكەل تۇردە بۇزىلۋىنا جول بەرىلگەن. سونىمەن بىرگە بەلگىلەنگەن ۋاقىت ىشىندە جۇمىسپەن قامتۋ جانە الەۋمەتتىك سالا ءبولىمى جۇمىسسىزداردى كاسىپتىك وقىتۋ جانە قايتا دايارلاۋ ءىسىن مۇلدەم سالاقسىتىپ جىبەرگەن. ءارى ولاردىڭ جۇمىسقا ورنالاسۋ دەڭگەيىن باقىلاۋمەن جەتكىلىكتى تۇردە اينالىسپاعان. وسىلايشا 56,8 ميلليون تەنگە بيۋدجەت قاراجاتى ءتيىمسىز پايدالانىلعانىن قاي قيسىنعا سىيعىزۋعا بولادى. وسى ارادا قالالىق اكىمدىكتىڭ اۋىلشارۋاشىلىعى جانە ۆەتەناريا بولىمىندە دە تىكەلەي فۋنكتسيانالدىق مىندەتتەردى اتقارۋدىڭ تومەن دەڭگەيى انىقتالدى. ياعني اتالعان ءبولىم بۇل كەزەڭدە اسىل تۇقىمدى مال ساتىپ الۋعا جانە قۇنارلى جەمىس اعاشتارىن وسىرۋگە بولىنگەن ەكى ميللياردتان استام تەڭگەنى تۋ-تالاقاي ەتىپ, قالاي بولسا, سولاي پايدالانعان. ەڭ ءبىر وكىنىشتىسى مۇنداي جاۋاپسىزدىق كەزىندە جوعارىدا كورسەتىلگەن قوماقتى قاراجاتتىڭ ماقساتتى جانە ءتيىمدى پايدالانۋعا باقىلاۋ قويۋ ماسەلەسى نازاردان تىس قالىپ قويىپتى.
ءتۇيىپ ايتقاندا جوعارىدا ايتىلعان جايتتەر اقتوبە قالالىق اكىمدىگىندە وتكەن جىلى كوممۋنالدىق مەنشىكتى ەسەپكە الۋ جانە ونى ءتيىمدى تۇردە باسقارۋ ءىسى تومەن, قاناعاتتانعىسىز جاعدايدا بولعانىن كورسەتەدى. جۇرگىزىلگەن اۋديت قورىتىندىلارىنا بايلانىستى اقتوبە وبلىستىق تەكسەرۋ كوميسسياسى دا وسىنداي تۇيىنگە كەلىپ وتىر. مۇنىڭ سىرتىندا "تازالىق" مەكەمە كاسىپورنىن تاراتۋ ءراسىمى كەزىندە ءارى "تازا قالا" جانە "تۇڭعىش پرەزيدەنت" اتىنداعى ورتالىق ساياباق سەكىلدى الەۋمەتتىك-كوپشىلىك تۇرعىداعى مەكەمەلەردى جەكەشەلەندىرۋ جانە سەنىمدى باسقارۋعا بەرۋ كەزىندە ورىن العان كەمشىلىكتەر بولەك ءبىر اڭگىمەنىڭ سىباعاسى دەۋگە بولادى.
سوعان سايكەس تەكسەرۋ كوميسسياسى وبلىستىق قۇقىق قورعاۋ ورگاندارىنىڭ اتىنا ءتيىستى ماتەريالدار تاپسىردى دەپ مالىمدەدى گازەت تىلشىسىنە ونىڭ توراعاسى ساعات ەڭسەگەن ۇلى. قۇزىرلى ورگاندار اقتوبە قالاسى اكىمدىگىنىڭ قۇرىلىس تۇرعىن-ءۇي كوممۋنالدىق شارۋاشىلىق, تۇرعىن-ءۇي قاتىناستارى ءبولىمى, سونداي-اق "تابىساقتوبە" جشس مەن اقتوبە قالاسىنىڭ ءتيىمدى دامۋ ورتالىعى مەكەمەلەرىنىڭ زاڭنان تىس ءىس-اركەتتەرى مەن بۇزۋشىلىقتارى جونىندە قانداي قورىتىندىعا كەلمەك. بۇعان قاتىستى نەندەي جاۋاپكەرشىلىككە تارتپاق؟ بۇعان تەك ۋاقىتتىڭ ءوزى تورەشى بولا الادى دەمەكپىز.
اقتوبە
