ايدا بالاەۆا ەڭ الدىمەن مينيسترلىكتىڭ يدەولوگيالىق باعىتتاعى 5 ۇلكەن سالاعا جاۋاپ بەرەتىنىن ايتىپ, وسى باعىتتا جۇمىس ىستەيتىن قۇرىلىمدارمەن ناتيجەلى جۇمىستار جۇرگىزۋگە دايىن ەكەنىن جەتكىزدى.
مينيسترلىك مالىمەتىنە ساي, مەملەكەتتىك الەۋمەتتىك تاپسىرىس شەڭبەرىندە 2020 جىلى جالپى قۇنى 17,7 ملرد تەڭگەدەن استام سومانى قۇرايتىن 2 مىڭنان ارتىق الەۋمەتتىك جوبا ىسكە اسىرىلماق.
ءمينيستردىڭ ايتۋىنشا, توتەنشە جاعداي كەزىندە 40 مىڭ ۆولونتەر قيىندىققا تاپ بولعان 1 ميلليونعا جۋىق ازاماتقا كومەك كورسەتكەن. «ەرىكتىلەردىڭ جۇمىسىن ودان ءارى جۇيەلى دامىتۋ ءۇشىن وڭىرلىك دەڭگەيدەن رەسپۋبليكالىق دەڭگەيگە دەيىن بىرىڭعاي ۆەرتيكال قاعيداتى بويىنشا ۆولونتەرلىك ينفراقۇرىلىم قولعا الىندى. قازىرگى ۋاقىتتا ۇەۇ-مەن بىرگە ءتيىستى زاڭ جوباسىن ازىرلەۋ بويىنشا جۇمىس جۇرگىزىلۋدە, ونىڭ شەڭبەرىندە ادامداردى ۆولونتەرلىك قىزمەتكە ارالاسۋىن ىنتالاندىرۋ ءۇشىن پراكتيكالىق تەتىكتەر ىسكە قوسىلاتىن بولادى», دەدى مينيستر. سونىمەن بىرگە بيىل ەلىمىزدىڭ 7 ۆولونتەرى بۇۇ قۇرىلىمىنداعى قىزمەتكە جىبەرىلەتىنى ءمالىم بولدى. «بيىل 7 قازاقستاندىقتى ۆولونتەر رەتىندە بۇۇ قۇرىلىمدارىنداعى جۇمىسقا باعىتتاۋ جوسپارلانىپ وتىر. قازاقستاننىڭ دامۋى مەن الەۋمەتتىك ماڭىزداعى ماسەلەلەردى شەشۋگە ۇلەس قوسقان ۇزدىك ۆولونتەرلەر مەن باستامالار «جىل ۆولونتەرى» حالىقارالىق سىيلىعىمەن ىنتالاندىرىلادى», دەدى ا.بالاەۆا.
«مينيسترلىك جۇمىسىنىڭ كەلەسى ءبىر ۇلكەن باعىتى – «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ جانە اقپاراتتى قولجەتىمدى ەتۋ. «حالىق ۇنىنە قۇلاق اساتىن مەملەكەت» يدەياسى شىن مانىندە ۇلكەن ءۇمىت كۇتەتىن كونتسەپتسياعا اينالىپ وتىر. ونىڭ اياسىندا وسى ۋاقىتقا دەيىن ءبىراز شارۋا اتقارىلدى. ماسەلەن, مينيسترلىك باسشىلىعىنىڭ ازاماتتاردى تۇراقتى تۇردە قابىلداۋى مەن ولاردىڭ ءوتىنىش-تىلەكتەرىن باقىلاۋ ءىسى ءبىر جۇيەگە كەلتىرىلگەن. ءمينيستردىڭ جەكە بلوگى دا ۇزدىكسىز جۇمىس ىستەيدى», دەدى مينيستر. باياندامادان بەلگىلى بولعانداي, بارلىق مەملەكەتتىك ورگاندا قوعامدىق جانە ونلاين قابىلداۋ ورىندارى جۇمىس ىستەۋدە. مەملەكەتتىك مەكەمە سايتتارى بىرىكتىرىلىپ, ازاماتتاردىڭ ءوتىنىشى تۇسەتىن تۇتاس پلاتفورما اشىلعان.
سونىمەن بىرگە ول اقپاراتتىق قىزمەت ساپاسى مەن ازاماتتىق قوعامنىڭ شەشىم قابىلداۋ ۇردىسىنە قاتىسۋ بەلسەندىلىگىن ارتتىرۋدى ماقسات ەتكەن «ازاماتتىق قوعامدى دامىتۋدىڭ 2025 جىلعا دەيىنگى» تۇجىرىمداماسى ازىرلەنگەنىن ايتتى.
ودان ءارى مينيستر ۆەدومستۆونىڭ تاعى ءبىر ماڭىزدى باعىتى – حالىققا اقپاراتتى قولجەتىمدى ەتۋ ماسەلەسىنە توقتالدى. «بۇل رەتتە, اقپارات بويىنشا زاڭ جوباسىنا بىرقاتار وزگەرىس دايىندالعان بولاتىن. ولاردىڭ نەگىزگى كوزدەگەن مىندەتتەرى: مەملەكەتتىك ورگانداردىڭ وسى باعىتتاعى قۇزىرەتىن, ازاماتتاردىڭ اقپاراتقا قولجەتىمدىلىگى تۋرالى پرەزيدەنتكە ەسەپ بەرۋ, ءاربىر مەملەكەتتىك ورگاندا وسى باعىتقا جاۋاپتى قىزمەتكەردى تاعايىنداۋ ماسەلەلەرىن جانە باسقا دا وزەكتى شارالاردى زاڭ جۇزىندە بەكىتۋ», دەدى مينيستر.
ونىڭ سوزىنە قاراعاندا, حالىقتى شەشىم قابىلداۋ ۇردىستەرىنە تارتۋ ءۇشىن ۆەدومستۆو اكىمدىكتىڭ اشىق مودەلىن جاساعان. قازىردىڭ وزىندە مەملەكەتتىك ورگاندارعا قاراستى كوپتەگەن مەكەمە وسىنداي مودەلمەن جۇمىس ىستەپ وتىر. ماسەلەن, 100-دەن اسا ۇيىم «اشىق ديالوگ» پورتالىندا ءبىرىنشى باسشىلارىنىڭ بلوگىن اشتى. ءسويتىپ پورتالدا كوپتەگەن اشىق مالىمەت جاريالانا باستادى. «قازىر جالپاق ەلگە ىڭعايلى بولۋى ءۇشىن مەملەكەتتىك باعدارلامالاردىڭ ورتاق پورتالىن جاساپ, ىسكە قوسۋدامىز. وندا ۇكىمەت پەن جەرگىلىكتى ورگاندار جۇزەگە اسىرىپ جاتقان بارلىق باعدارلامامەن تانىسۋعا بولادى», دەدى ا.بالاەۆا.
القالى جيىندا وتاندىق باق سالاسى ءسوز بولدى. «بىزدە اقپارات سالاسىن دامىتۋدىڭ 2020-2022 جىلدارعا ارنالعان ۇلتتىق جوسپارى بار. وندا وتاندىق باق-تىڭ باسەكەلەستىگىن ارتتىرۋ, ادامي كاپيتالدى دامىتۋ, اقپارات سالاسىن قۇقىقتىق رەتتەۋ, مەملەكەتتىك قولداۋعا قاتىستى كونتسەپتۋالدى ءىس-شارالار قاراستىرىلعان. وتاندىق باق-تىڭ باسەكەگە قابىلەتتىلىگىن ارتتىرۋ اياسىندا اقپارات قۇرالدارىن مەملەكەتتىك قولداۋدىڭ قادامدارى قايتا قارالدى. قازاقستاندىق ءباسپاسوزدى قولداۋ, تسيفرلى راديوحابار مەن ينتەرنەت تەلەارنانى دامىتۋ, اقپارات سالاسىندا مەملەكەتتىك ۇيىمداردى وڭتايلاندىرۋ بويىنشا شارالار كەشەنى ىسكە اسىرىلادى. ۇلتتىق جوسپاردى جۇزەگە اسىرۋ وتاندىق باق-تىڭ ەكونوميكالىق دەربەستىگىن ارتتىرۋعا جانە قوعام تاراپىنان تۇتىنۋشىلىق سۇرانىستىڭ وسۋىنە ىقپال ەتەدى. وسى تۇرعىدا مەملەكەتتىك ورگانداردىڭ قىزمەتى تۋرالى حالىققا ساپالى حابار تاراتۋ ماقساتىندا بيىل مەملەكەتتىك باق-تىڭ بىرىڭعاي پورتالىن ىسكە قوسامىز», دەدى مينيستر. سونىمەن بىرگە جاس جۋرناليستەردىڭ بىلىكتىلىگىن ارتتىرۋ دا جوسپاردا قاراستىرىلعانىن جەتكىزدى.
«قازىر جاڭا ەكى تەلەارنا اشۋ ماسەلەسى قاراستىرىلىپ جاتىر. ولار – «اباي تۆ» جانە ء«ال-فارابي» تەلەارناسى. «اباي تۆ» تەلەارناسى 30 ماۋسىمدا كورەرمەنگە جول تارتادى. ول «Qazaqstan» ترك» قۇرامىنا كىرەدى جانە وتاندىق مادەنيەت مۇراسىن ناسيحاتتايتىن ارنا بولادى. الداعى وقۋ جىلىنىڭ باسىندا «حابار» اگەنتتىگىنىڭ بازاسىندا 6 جاستان 18 جاسقا دەيىنگى بالالار مەن جاسوسپىرىمدەر اۋديتورياسىنا ارنالعان جاڭا ءبىلىم بەرۋ-اعارتۋشىلىق تەلەۆيزيالىق پلاتفورما بولاتىن ء«ال-فارابي» ارناسى ىسكە قوسىلادى», دەدى مينيستر.
وتاندىق سەريال ءوندىرىسىنىڭ دامۋى تۋرالى ايتا كەلە, ا.بالاەۆا بيىل 42 سەريال ءوندىرىسى جوسپارلانعانىن حابارلادى. كورەرمەنگە وتباسى قۇندىلىقتارى, ۆولونتەرلەردىڭ قىزمەتى تۋرالى قىزىقتى جوبالار, پەداگوگتەر, دارىگەرلەر, پوليتسەيلەردىڭ ءيميدجىن كوتەرۋگە, سالاماتتى ءومىر سالتىن ناسيحاتتاۋعا باعىتتالعان سەريالدار تۇسىرىلمەك.
مينيستر ۆەدومستۆونىڭ مىندەتىندەگى تاعى ءبىر جاۋاپتى سالا – ءدىن سالاسىنداعى مىندەتتەردى اتاپ ءوتتى. ناقتى ايتساق, حالىق اراسىندا زايىرلى قۇندىلىقتاردى ىلگەرىلەتۋ, كونفەسسياارالىق كەلىسىمدى ساقتاۋ جانە ءدىني ەكسترەميزمنىڭ الدىن الۋ شەڭبەرىندە 2019 جىلى 3 ميلليون ادامدى قامتيتىن 50 مىڭنان استام ءىس-شارا وتكىزىلگەن. مينيستر اتاپ وتكەندەي, بۇعان 300 بىلىكتى مامانى بار اقپاراتتىق-ءتۇسىندىرۋ توبى جۇمىلدىرىلعان. وسى قۇرىلىمداردىڭ تيىمدىلىگىن ارتتىرۋ ءۇشىن بيىل مامانداردىڭ سانىن 500 ادامعا دەيىن ارتتىرۋ, سونداي-اق 1 200 لەكتوردى قايتا دايارلاۋ جوسپارلانۋدا.
ءمينيستردىڭ ايتۋىنشا, «جۋسان» وپەراتسياسى اياسىندا تەرروريستىك بەلسەندىلىك ايماعىنان قايتارىلعان 163 ايەلدى قايتا الەۋمەتتەندىرۋ بويىنشا كەشەندى الدىن الۋ جۇمىستارىن جۇرگىزۋگە ەرەكشە نازار اۋدارىلدى. بۇگىنگى تاڭدا ولاردىڭ 144-ءى راديكالدى ءدىني كوزقاراستاردان باس تارتتى, ال كەيبىرەۋلەرى زايىرلى ءومىر سالتىنا تولىعىمەن كوشتى.
2019 جىلى الەۋمەتتىك جەلىلەردە, ەلەكتروندى باق جانە باسقا دا ينتەرنەت الاڭداردا ءدىني ەكسترەميزم يدەولوگياسىن قارسى ناسيحاتتاۋ اياسىندا 5,3 مىڭنان استام ينتەرنەت-رەسۋرستاردىڭ مازمۇنى تالداندى, ونىڭ ىشىندە 3,2 مىڭى زاڭعا قارسى سيپاتتاعى ماتەريالداردى قامتيدى. ولاردىڭ بارلىعى ۋاقتىلى بۇعاتتالعان. مينيستر حالىقتىڭ راديكالدى اعىمعا قارسى يممۋنيتەتىن قالىپتاستىرىپ, دىنارالىق قاقتىعىستاردىڭ الدىن الۋدىڭ ماڭىزدىلىعىن ايتتى.
مينيستر ەتنوسارالىق كەلىسىمدى قامتاماسىز ەتۋ جۇيەسىن جاڭعىرتۋ جانە قازاقستان حالقىنىڭ بىرلىگىن نىعايتۋ ماقساتىندا مينيسترلىك جانىنان ەتنوسارالىق قاتىناستاردى دامىتۋ جونىندەگى كوميتەت قۇرىلاتىنىن حابارلادى. ال ەلگە ورالعان قانداستاردىڭ تەز ارادا ازاماتتىق الۋىنا جاعداي جاساۋ ءۇشىن ء«بىر تەرەزە» قاعيداسى نەگىزىندە قاجەت قۇجاتتاردىڭ ءتىزىمى قىسقارتىلعان. سونىمەن بىرگە قىتاي, رەسەي, موڭعوليا, وزبەكستان, گەرمانيا, تۇركيا جانە اقش-تا قازاق مادەني-ىسكەرلىك ۇيلەرى قۇرىلاتىن بولادى.
2019 جىلى جاستار جىلى شەڭبەرىندە 300-دەن استام رەسپۋبليكالىق ءىس-شارا جۇزەگە اسىرىلىپ, وعان 2 ميلليوننان استام جاس قامتىلعان. سونداي-اق ول مينيسترلىك قازىر «رۋحاني جاڭعىرۋ» باعدارلاماسىنىڭ قاعيداتتارىن ورتالىق مەملەكەتتىك ورگاندار مەن اكىمدىكتەردىڭ ستراتەگيالىق قۇجاتتارىنا ىقپالداستىرۋ بويىنشا جۇمىستار جۇرگىزىپ جاتقانىن جەتكىزدى. «مينيسترلىك تاراپىنان تۇلعانى دامىتۋعا باعىتتالعان جاڭا 4 ارنايى جوبا بويىنشا ۇسىنىستار ەنگىزىلدى: «ەڭبەك – ەلدىڭ مۇراتى», «قۇقىقتىق مادەنيەت», «جاڭا – قوعام قۋاتى», ء«داستۇر مەن عاسىر». ءاربىر ارنايى جوباعا تۇجىرىمداما ازىرلەندى, وندا ونى ىسكە اسىرۋ مەحانيزمى ينديكاتورلارمەن جانە كۇتىلەتىن ناتيجەلەرمەن ەگجەي-تەگجەيلى سيپاتتالعان», دەدى ۆەدومستۆو باسشىسى.
