"قازىرگى تاڭدا شىمكەنت قالاسىندا ناۋقاستاردى ەمدەۋ ءۇشىن 2870 توسەك-ورىن بار. ونىڭ 650-ءى جۇقپالى اۋرۋحانالارعا, 2220-سى پروۆيزورلى ورىنعا ارنالعان. جالپى, ولاردىڭ 447-ءسى بوس. ماۋسىم ايىنىڭ سوڭىندا شىمكەنت قالاسىندا جۇقپالى اۋرۋمەن اۋىرعاندار كۇرت ءوستى. ياعني, پنەۆمونيامەن اۋىرعان ناۋقاستار سانى 5,8 ەسەگە ارتتى. ال جرۆي-مەن اۋىرعان ناۋقاستار سانى 2 ەسەگە ءوستى. وسىعان بايلانىستى جەدەل جاردەم قىزمەتىنە قوڭىراۋ شالاتىندار 5 ەسەگە كوبەيدى. ورتا ەسەپپەن 1 كۇندە 2100-دەي شاقىرتۋ تۇسە باستادى. بۇل شاقىرتۋلارعا دەر كەزىندە قىزمەت كورسەتۋ ءۇشىن شىمكەنت قالاسىنىڭ اكىمى م.ايتەنوۆ ارنايى تاپسىرما بەردى. وسى تاپسىرماعا سايكەس قالادا پروۆيزورلى ورىندار مەن كۇندىزگى ستاتسيونارلاردى كوپتەپ اشىپ جاتىرمىز. بۇگىندە سامال-3 شاعىناۋدانىنداعى جاڭا مەكتەپتەن 400 ورىندىق پروۆيزورلى ورىن, پوليتەحنيكالىق كوللەدجدەن 150 ورىن اشىلدى. ال اپتانىڭ سوڭىنا دەيىن 400 ورىنعا جەتكىزىلەدى.
سونداي-اق بۇگىن جەڭىل اتلەتيكالىق سپورت كەشەنىنەن 150 ورىن دايىندالدى جانە 1 شىلدە كۇنى ول 450 ورىنعا جەتەدى. مۇندا بارلىق مەديتسينالىق قۇرال-جابدىقتار قامتىلعان. قازىرگى ۋاقىتتا قالادا جۇقپالى اۋرۋعا شالدىققان ناۋقاستارعا ورىن جەتكىلىكتى. وسى رەتتە دايىندالعان پروۆيزورلى ورىندار بويىنشا دارىگەرلەر ناۋقاستارعا جەدەل كومەك كورسەتەدى دەگەن سەنىمدەمىز", – دەدى شىمكەنت قالاسى اكىمى اپپاراتىنىڭ باسشىسى ەركەعالي امانتاي ۇلى.
ايتا كەتەيىك, قالادا جۇقپالى دەرتكە شالدىققان ناۋقاستاردى ەمدەۋ ماقساتىندا پروۆيزورلى ورىنداردان بولەك, كۇندىزگى ستاتسيونارلىق ەمدەۋ جۇمىستارىنىڭ دا قىزمەتى كۇشەيتىلۋدە.
