جاستاردى جۇمىسپەن قامتۋعا باعىتتالعان ۇزدىك جوبالاردىڭ ءبىرى – ستۋدەنتتىك قۇرىلىس جانە "جاسىل ەل" ەڭبەك جاساقتارى. بۇل جوبا جەرگىلىكتى بيۋدجەتتەن بولىنگەن قارجىعا سايكەس, بەلگىلى ءبىر كۆوتا اياسىندا جۇزەگە اسادى.
"ەلوردا بويىنشا 16-شى ەڭبەك ماۋسىمى ءوز جۇمىسىن باستاپ كەتتى. وتكەن جىلدارداعى كۆوتا بويىنشا, جىلىنا 975 ادام جۇمىسپەن قامتىلعان بولاتىن. الايدا بۇل جوبانىڭ سۇرانىسقا يە بولعانى ەسكەرىلىپ, الداعى 3 جىلدا (2020-2022 ج.ج.) جىلىنا 1200 جاستى جۇمىسپەن قامتۋدى جوسپارلاپ وتىرمىز", – دەيدى جاستار ساياساتى ماسەلەلەرى باسقارماسىنىڭ ءبولىم باسشىسى باقىتجان جۇنىسبەكوۆ.
ەڭبەك جاساعىنا 14-29 جاس ارالىعىنداعى كەز كەلگەن جاستىڭ قاتىسۋىنا مۇكىندىك بار. دەسەك تە, بۇگىنگى تاڭدا كوپبالالى جانە از قامتىلعان وتباسىلارعا قولداۋ رەتىندە سول ساناتتاعى بالالار جۇمىسقا كوپتەپ قابىلدانىپ وتىر. جۇمىسشى جاستار ءۇش كاتەرگوريا بويىنشا جۇمىس ىستەيدى: ءبىرى الەۋمەتتىك جاعدايىنا بايلانىستى ىرىكتەلگەن 14-17 جاستاعى بالالار بولسا, ەكىنشىسى – 17-22 جاستاعى كوللەدج, جوو ستۋدەنتتەرى, ءۇشىنشى ەرەسەك توپ – جۇمىسسىز جاستار ساناتىنداعى 18-29 جاستاعى ازاماتتار.
باقىتجان ابدىرەيىمجان ۇلىنىڭ ايتۋىنشا, كامەلەتتىك جاسقا تولماعان بالالار قر ەڭبەك كودەكسىنە سايكەس, دەنساۋلىعىنا زيان كەلمەيتىندەي جاعدايدا ەڭبەك ەتىپ جاتىر. ولاردىڭ جۇمىس ۋاقىتى 4 ساعاتتان ارتىق ەمەس, اپتاسىنا 5 كۇن. بۇل توپتاعى بالالار قالاداعى ساياباقتاردى تازالاۋ, مەكتەپ اۋلاسىن كوگالداندىرۋ سەكىلدى جۇمىستار اتقارادى. ەكىنشى توپتاعى بالالار قالالىق ساياباقتاردا "استانا كوگالداندىرۋ قۇرىلىسى" مەكەمەسىمەن بىرلەسىپ, جۇمىس ىستەپ جاتىر. كامەلەتكە تولعان بالالار 6-8 ساعات جۇمىس ىستەيدى. ال ەرەسەك توپتاعى جۇمىسكەرلەر تولىق جۇمىس كەستەسى بويىنشا, قۇرىلىس الاڭدارىندا نەمەسە "استانا ورمانى" مەكەمەسىمەن بىرگە ەڭبەك ەتەدى.
"قۇرىلىس الاڭدارىنا كوبىنە ستۋدەنتتەر مەن ەرەسەك توپتاعى جاستار جىبەرىلەدى. قۇرىلىس الاڭىنداعى جاستاردىڭ بەكىتىلگەن جالاقىسى بار جانە ءبىزدىڭ تاراپىمىزدان سىياقى بەرىلەدى. بارلىق قاتىسۋشىلارعا ارنايى جۇمىس كيىمى تىگىلدى", - دەيدى جاستار ساياساتى ماسەلەلەرى باسقارماسىنىڭ ءبولىم باسشىسى.
باقىتجان جۇنىسبەكوۆتىڭ ايتۋىنشا, كارانتينگە بايلانىستى جۇمىس تالاپتارى دا وزگەرگەن.
"سانيتارلىق قاۋىپسىزدىك تالاپتارىن ساقتاۋ ماقساتىندا جاستاردىڭ ءبىر جەرگە شوعىرلانىپ جۇمىس ىستەۋىنە جول بەرىلمەيدى. تازا اۋادا, اشىق كەڭىستىكتە 2 مەتردەن كەم ەمەس قاشىقتىق ساقتاۋ قاجەت. وسى جوباعا قاتىسۋشى جاستار مىندەتتى تۇردە ماسكامەن, قولدارىنا قولعاپ كيىپ جۇمىس ىستەيدى. ەڭ باستىسى جاستاردىڭ قاۋىپسىزدىگى ساقتالعان. ءار اداممەن جەكە كەلىسىمشارت جاسالادى. بارلىق تالاپتارىمەن تانىسىپ, جادىناماعا قول قويىلادى", – دەيدى ول.
