قازاق ەلىنىڭ ەلورداسىندا رەسەي فەدەراتسياسى باشقۇرتستان رەسپۋبليكاسىنىڭ كۇندەرى ءوتىپ جاتقانىن بۇدان بۇرىن دا ايتقان ەدىك. سول يگىلىكتى ءىستىڭ اياسىندا استانا قالاسىنىڭ اكىمى يمانعالي تاسماعامبەتوۆ پەن ۋفا قالاسىنىڭ قالالىق ءوڭىرى اكىمشىلىگىنىڭ باسشىسى يرەك يالالوۆ ەكى قالا اراسىنداعى دوستىق جانە ىنتىماقتاستىق تۋرالى كەلىسىمگە قول قويدى.
قازاق ەلىنىڭ ەلورداسىندا رەسەي فەدەراتسياسى باشقۇرتستان رەسپۋبليكاسىنىڭ كۇندەرى ءوتىپ جاتقانىن بۇدان بۇرىن دا ايتقان ەدىك. سول يگىلىكتى ءىستىڭ اياسىندا استانا قالاسىنىڭ اكىمى يمانعالي تاسماعامبەتوۆ پەن ۋفا قالاسىنىڭ قالالىق ءوڭىرى اكىمشىلىگىنىڭ باسشىسى يرەك يالالوۆ ەكى قالا اراسىنداعى دوستىق جانە ىنتىماقتاستىق تۋرالى كەلىسىمگە قول قويدى.
بۇل كەلىسىم ساۋدا-ەكونوميكالىق, مادەنيەت پەن ونەر, وزگە دە گۋمانيتارلىق سالالار, باسقا دا قۇرىلىمدار بويىنشا ءوزارا قارىم-قاتىناستاردى كەڭەيتۋگە باعىتتالعان. سول سەكىلدى, استانا مەن ۋفا قالالارىنداعى كولىك, تۇرعىن ءۇي-كوممۋنالدىق شارۋاشىلىق, بايلانىس جۇيەلەرىندەگى وزىق تاجىريبەلەر بويىنشا اقپاراتتار الماسۋعا كەلىسىلدى. مۇنىمەن قاتار, حالىق شوعىرى مول قالالاردى تازا اۋىزسۋمەن قامتاماسىز ەتۋدىڭ جاڭا تەحنولوگيالارىن ەنگىزۋ, قورشاعان ورتانى قورعاۋ, تۇرمىستىق قالدىقتاردى قايتا وڭدەۋ, تابيعي نەمەسە تەحنوگەندى سيپاتتاعى دۇلەي اپاتتار مەن توتەنشە جاعدايلار زارداپتارىن جويۋ, ەكولوگيالىق ساقتاندىرۋ مەن ەكولوگيالىق سەرتيفيكاتتاۋدى ەنگىزۋدى جەتىلدىرۋ بويىنشا جوبالاردى جۇزەگە اسىرۋ دا جان-جاقتى ويلاستىرىلعان.
ال عىلىم جانە جوعارى تەحنولوگيالار, ءبىلىم بەرۋ, دەنساۋلىق ساقتاۋ, مادەنيەت, جاستار ساياساتى, دەنەشىنىقتىرۋ جانە سپورتتى دامىتۋداعى سەرىكتەستىكتى ورىستەتۋ دە كەلىسىمنەن كورىنىس تاپقان.
ەكى قالانىڭ اراسىنداعى تۋريستىك الەۋەتتى ۇلتتىق داستۇرلەر شەڭبەرىندە ورىستەتىپ, جاڭا زامانعا ساي باعىتتاردى جەتىلدىرىپ, وسى سالا بويىنشا اتقارىلاتىن قىزمەتتەر شوعىرىن كەڭەيتۋ جولدارىنا دا جەتە ءمان بەرىلىپتى. سول سەكىلدى اتالمىش قۇجات اقپاراتتىق سالاداعى, سونىڭ ىشىندە ەلەكتروندى بۇقارالىق اقپارات قۇرالدارى جانە تەلەراديو باعدارلامالارى اراسىنداعى ءوزارا تاجىريبە الماسۋدى ۇيىمداستىرۋ, ونى وسى ىنتىماقتاستىق شەڭبەرىندە ورنىقتىرۋ دا جان-جاقتى قاراستىرىلعان. مۇنداي كەلەلى ءىستى كەمشىلىكسىز اتقارىپ وتىرۋ ءۇشىن, ۇنەمى ءىس ۇستىندە بولاتىن ۇيلەستىرۋشى ورگاندى قۇرۋ دا ويلاستىرىلعان.
ۋفا – رەسەيدىڭ ءىرى ونەركاسىپ جانە كولىك قۇرىلىمدارى شوعىرلانعان, عىلىم مەن مادەنيەتتىڭ ۇلكەن جەتىستىكتەرى جەتىپ ارتىلاتىن 700 شارشى شاقىرىمدى الىپ جاتقان تاريحي قالا. وندا ونەركاسىپ الەۋەتى شامامەن 50 پايىزدى قۇرايتىن ءىرى ورتالىقتا مۇناي ءوندىرۋ, حيميا جانە مۇناي حيمياسى, ماشينا جاساۋ, قۇرىلىس ماتەريالدارى ءتارىزدى ءىرى جانە ورتاشا كاسىپورىندار جۇمىس ىستەيدى. ەكى قالا باسشىسى قۇرىلىمدار بويىنشا ءوزارا كەلىسىمدە كورسەتىلگەن جۇمىستاردى جۇيەلى جۇرگىزۋ ارقىلى باۋىرلاس جۇرتتاردىڭ ءىلتيپاتتى ىنتىماقتاستىعى جالعاسىن تابا بەرەدى دەگەن بايلامعا توقتادى.
سۇلەيمەن مامەت,
«ەگەمەن قازاقستان».
