رەسەيدىڭ بىرقاتار قالاسىندا مەرەكەلىك ءىس-شارالار باسقا فورماتتا ۇيىمداستىرىلعان. كەي اۋدانداردا ەپيدەميولوگيالىق جاعدايعا بايلانىستى بيلىك شەشىمىمەن شەرۋلەر وتكىزىلمەيتىن بولدى نەمەسە پاراد كورەرمەنسىز وتەدى.
اسكەري پارادتار چيتا جانە بەلوگورسك قالالارىندا ءوتتى. ال شەرۋلەر شىعىس اسكەري وكرۋگىنىڭ جەتى قالاسىندا وتەدى دەپ جوسپارلانعان. وعان 21 مىڭ ادام, 600-دەن اسا دوڭعالاقتى جانە شىنجىر تاباندى تەحنيكا, اۆياتسيا قاتىسادى.
جەڭىستىڭ 75 جىلدىعى قۇرمەتىنە وراي ۇيىمداستىرىلىپ جاتقان سالتاناتتى شاراعا قاتىسۋ ءۇشىن وزگە ەلدەردىڭ كوشباسشىلارى ماسكەۋگە كەلىپ جەتتى.
رەسەي استاناسىنا ابحازيا پرەزيدەنتى اسلان بجانيا, قازاقستان پرەزيدەنتى قاسىم-جومارت توقاەۆ, مولداۆيا پرەزيدەنتى يگور دودون, سەربيا پرەزيدەنتى الەكساندر ۆۋچيچ, وزبەكستان پرەزيدەنتى شاۆكات ميرزيەەۆ, بەلارۋس پرەزيدەنتى الەكساندر لۋكاشەنكو كەلدى. سونداي-اق مۇندا بوسنيا مەن گەرتسەگوۆينا پرەزيديۋمىنىڭ سەربيالىق مۇشەسى ميلوراد دوديك, قىرعىزستان پرەزيدەنتى سوورونباي جەەنبەكوۆ, تاجىكستان پرەزيدەنتى ەمومالي راحمون, وڭتۇستىك وسەتيا پرەزيدەنتى اناتولي ءبيبيلوۆتىڭ كەلۋى كۇتىلۋدە.
ەسكە سالا كەتەيىك, كەشە مەملەكەت باسشىسى قاسىم-جومارت توقاەۆ رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ شاقىرۋىمەن ماسكەۋگە جۇمىس ساپارىمەن باردى. بۇگىن ول نۇر-سۇلتان ۋاقىتى بويىنشا ساعات 13:00-دە قىزىل الاڭدا جەڭىستىڭ 75 جىلدىعىنا ارنالعان اسكەري پارادقا قاتىسادى.
سونىمەن قاتار قاسىم-جومارت توقاەۆ «بەلگىسىز سولدات» قابىرىنە گۇل شوعىن قويادى جانە جەڭىستىڭ 75 جىلدىعىنا ارنالعان سالتاناتتى قابىلداۋعا قاتىسادى.
قازىرگى اۋىر ەپيدەميولوگيالىق احۋالعا بايلانىستى ماسكەۋ ساپارىنىڭ الدىندا پرەزيدەنت جوسپارلى تۇردە كوروناۆيرۋسقا تەست تاپسىردى. قاسىم-جومارت كەمەل ۇلى بۇعان دەيىن دە مەديتسينالىق حاتتاماعا سايكەس, ۇنەمى تەكسەرۋدەن ءوتىپ كەلەدى.
