ايماقتار • 23 ماۋسىم، 2020

الماتىلىق مەتسەناتتار مەن ۆولونتەرلار "حالىق العىسى" مەدالىمەن ماراپاتتالدى

35 رەت كورسەتىلدى

رەسپۋبليكالىق Biz Birgemiz ونلاين-فورۋمىنىڭ بارىسىندا COVID-19-بەن كۇرەستە ەرەكشە بەلسەندىلىك تانىتقانداردىڭ ەڭبەكتەرى اتالىپ ءوتتى، ولاردىڭ اراسىندا دارىگەرلەر، پوليتسيا قىزمەتكەرلەرى، ۆولونتەرلار مەن جۋرناليستەر بار، - دەپ جازادى Egemen.kz

مەملەكەت باسشىسى ق.-ج. توقاەۆ رەسپۋبليكالىق Biz Birgemiz اكتسياسىنا قاتىسقان ۆولونتەرلاردىڭ COVID-19 تارالۋىنا قارسى كۇرەسكە قوسقان زور ۇلەستەرىن اتاپ ءوتتى. ەلباسىنىڭ جانە جەكە ءوزىنىڭ اتىنان العىسىن ءبىلدىردى.

الماتى اكىمى باقىتجان ساعىنتاەۆ اتاپ وتكەندەي، توتەنشە جاعداي رەجيمى كەزىندە بارشا قازاقستاندىقتاردىڭ كومەگى ايتارلىقتاي ماڭىزدى بولدى.

"ۇنەمى قولداۋ مەن كومەك بەرۋگە دايىن تۇراتىن الماتىلىقتار العاشقى كۇننەن-اق قوعامدىق جۇمىستارعا بەلسەنە كىرىسىپ كەتتى. ولاردىڭ ارقايسىسىنىڭ جانە مىڭداعان قالا تۇرعىندارىنىڭ ورتاق ىسكە قوسقان ۇلەستەرىنە باعا جەتپەيدى"، دەپ جازدى قالا اكىمى.

ب. ساعىنتاەۆ ءوزىنىڭ سوزىندە تج رەجيمى كەزىندە جۇگىزىلگەن پارمەندى شارالاردىڭ كوروناۆيرۋستىڭ جاپپاي تارالۋىنا توسقاۋىل بولعانىن قاداپ تۇرىپ ايتتى. قالا تۇرعىندارىنىڭ بەرىلگەن ۇسىنىستاردى دەر كەزىندە قابىلداپ، وزدەرىن وقشاۋلاعاندارى ارقاسىندا جاعداي تۇزەلدى.

"ارينە، قالا تۇرعىندارىنىڭ تابيعات اياسىندا كەزدەسىپ، ءوزارا سىرلاسۋدى، كوشەلەر مەن سكۆەرلەردە سەرۋەندەۋدى ساعىنىپ قالعاندارىن جاقسى تۇسىنەمىن. ويتكەنى، بۇل- ءومىر. بىراق، كوزگە كورىنبەيتىن جاۋ – پاندەميا ءبىزدىڭ ومىرىمىزگە تۇزەتۋلەر مەن وزگەرىستەر ەنگىزۋدە. سوندىقتان مەن الماتىلىقتاردى سانيتارلىق-ەپيدەميولوگيالىق قىزمەتتىڭ بارلىق تالاپتارىن مۇلتىكسىز ورىندۋعا شاقىرامىن. ول بارىنشا قاراپايىم، ياعني ءوزىمىزدى، جاقىندارىمىزدى، دوستارىمىزدى، ارىپتەستەرىمىزدى، ءتىپتى اينالامىزداعىلاردى ىندەتتى جۇقتىرۋ قاۋپىنەن ساقتايىق جانە بارىنشا اباي بولايىق"،  دەپ جازدى ب. ساعىنتاەۆ جانە قالا تۇرعىندارىن بارىنشا ساق بولۋعا شاقىردى.

الماتى اكىمى كوروناۆيرۋسپەن كۇرەستە الدىڭعى شەپتە بولىپ، ىندەتتىڭ سوققىسىنا قارسى تۇرا بىلگەن مەديكتەردىڭ، پوليتسيا قىزمەتكەرلەرىنىڭ جۇمىستارىن اتاپ ءوتتى. ب. ساعىنتاەۆ وسىناۋ ورتاق ىسكە ءوز ۇلەستەرىن قوسىپ، قالالىقتارعا قولداۋ بىلدىرگەن مەتسەناتتارعا، سونىمەن قاتار مۇقتاج جاندارعا ازىق-ت ۇلىك ونىمدەرىن جەتكىزگەن ۆولونتەرلارعا العىسىن ءبىلدىردى.

ىندەتكە قارسى كۇرەستە ەرەكشە كوزشە تۇسكەندەر "حالىق العىسى" مەدالىمەن جانە ەلباسىنىڭ العىس حاتتارىمەن ماراپاتتالدى. ولاردىڭ اراسىندا وليمپيادا چەمپيونى، قازاقستاننىڭ ەڭبەك ەرى، كسرو-نىڭ ەڭبەك سىڭىرگەن سپورت شەبەرى جاقسىلىق ۇشكەمپىروۆ، بوستاندىق اۋدانىنىڭ وق مپس ءبولىمىنىڭ باستىعى جاندوس تاسمانوۆ، دارىگەر-ينفەكتسيونيست تامارا ۋتاگانوۆا، مەتسەنات ميحايل لومتادزە، ءوز بەتىمەن ءومىر ءسۇرۋ ءۇيىنىڭ مەڭگەرۋشىسى ءومىرجان ابىلقاسىموۆ، "قازاقستاننىڭ مەديتسينالىق جاستارى" رقب جەتەكشىسى جانىبەك سولتاناي، قبتۋ جانىنداعى قازاقستان تەڭىز اكادەمياسىنىڭ ستۋدەنتى ديانا توقتارقىزى، "الماتى اقشامى" گازەتىنىڭ ءتىلشىسى اسەل داعجان بار.

سونداي-اق، "قازاقستان ەرىكتىلەر ليگاسى" قق-نىڭ الماتى قالاسى بويىنشا جەتەكشىسى باعدات انارباەۆا، Jas Otan مك الماتى قالالىق فيليالىنىڭ بەلسەندىلەرى ءبيبىنۇر شەرباەۆا، مەدەت بەكبەرگەنوۆ، جاندوس ءتالىپوۆ، اسەم تايمۇراتوۆا، كاسىپكەر باحيت گاسانوۆ اتاپ ءوتىلدى.

سوڭعى جاڭالىقتار

ۇقساس جاڭالىقتار