قوعام • 21 ماۋسىم، 2020

دارىگەرلەرگە قولداۋ كورسەتۋ ءارى قاراي دا جالعاسىن تابا بەرمەك - بايبەك

27 رەت كورسەتىلدى

Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك Instagram جەلىسىندەگى ءوزىنىڭ پاراقشاسىندا مەديتسينا قىزمەتكەرلەرىنىڭ كۇنىمەن قۇتتىقتاعان جازباسىندا وسىلاي دەدى، - دەپ حابارلايدى Egemen.kz.

"قۇرمەتتى اق حالاتتى ابزال جاندار! سىزدەردى كاسىبي مەرەكەلەرىڭىز – مەديتسينا قىزمەتكەرلەرىنىڭ كۇنىمەن شىن جۇرەكتەن قۇتتىقتايمىن!

قاي كەزەڭدە دە كونەرمەيتىن، قايتا كۇن وتكەن سايىن قۇنى ارتا تۇسەتىن ءبىر ماماندىق بولسا، ول – دارىگەرلىك. قازىرگى تاڭدا ءار ادام شىر ەتىپ دۇنيەگە كەلگەن ساتتەن باستاپ بۇكىل ءومىر بويى وسىناۋ ابزال جانداردىڭ قامقورلىعىندا بولادى دەسەك، ارتىق ايتپايمىز.

باس اۋىرىپ، بالتىر سىزداماي تۇرمايتىن مىنا جالعاندا ءاربىر جاننىڭ الدىمەن ىزدەيتىنى – دەرتكە ءدارۋ، جۇرەككە جىلۋ سىيلار دارىگەر. قاناتىمەن سۋ سەپكەن قارلىعاشتاي اركەز جانىمىزدان تابىلىپ، اۋرۋعا شيپا، كوڭىلگە شۋاق ۇيالاتاتىن دا – سىزدەرسىزدەر. سوندىقتان دا دانا حالقىمىز "اۋەلگى بايلىق – دەنساۋلىق" دەپ تۇجىرىمداپ، قاشاندا دەرتكە داۋا، كوڭىلىمىزگە دەم بەرەر شيپاگەر جانداردى ەرەكشە قادىرلەگەن.

وسىناۋ قاستەرلى جولدى جالعاپ جۇرگەن سىزدەر قانداي قۇرمەتكە بولسىن لايىقسىزدار.

دۇنيەنى دۇربەلەڭگە سالعان قاتەرلى ىندەت ءورشىپ تۇرعان كەزەڭدە مىلتىقسىز مايداننىڭ الدىڭعى شەپتەگى جاۋىنگەرلەرىنە اينالدىڭىزدار. ءۇي بەتىن كورمەي، ءوز ومىرلەرىڭىزدى قاتەرگە تىگە وتىرىپ، كۇنى-ءتۇنى ىندەتپەن كۇرەسىپ جۇرسىزدەر. ءاربىر ناۋقاستىڭ ءومىرى مەن ساۋلىعى ءۇشىن جان اياماي ارپالىسقان سىزدەرگە ايتار العىسىمىز شەكسىز.

سوندىقتان دا "Nur Otan" پارتياسى ءاردايىم ۇلت دەنساۋلىعى، ونىڭ ىشىندە شيپاگەر مارتەبەسى ماسەلەسىن ءوز كۇن تارتىبىنەن تۇسىرمەي، باستى باسىمدىق رەتىندە ۇستايدى. جاقىندا قابىلدانعان كودەكس – وسىنىڭ شىن كورىنىسى.

ستاتيستيكالىق دەرەكتەرگە جۇگىنسەك، ەلىمىزدە 74 مىڭداي دارىگەر، 180 مىڭعا جۋىق ورتا بۋىن مەديتسينا قىزمەتكەرى بار. گيپپوكرات انتىن بەكەم ۇستانعان، وتانعا، ەلگە قالتقىسىز قىزمەت ەتۋشى قانشاما تاعدىر. زامانىمىزدىڭ شىن باتىرلارى – دارىگەرلەرگە مەملەكەتىمىز دە، پارتيامىز دا تيىسىنشە قولداۋ كورسەتۋگە ۇمتىلۋدا. قىزىعى مەن شىجىعى قاتار جۇرگەن مىنا ومىردە بۇل ءۇردىس ءارى قاراي دا جالعاسىن تابا بەرمەك.

سىزدەردىڭ كۇش-جىگەرلەرىڭىزدىڭ ارقاسىندا قاتەرلى دەرتتى اۋىزدىقتاپ، قالىپتى تىرشىلىگىمىزگە تەزىرەك ورالاتىنىمىزعا سەنىمدىمىن.

اق حالاتتى، ابزال جۇرەكتى بارشا دارىگەرلەر قاۋىمىن تاعى دا قۇتتىقتاي وتىرىپ، مىقتى دەنساۋلىق، وتباسىلارىنا اماندىق، ىستەرىنە بەرەكە تىلەيمىن. ءبىز بىرگەمىز!" - دەپ جازدى ول.

سوڭعى جاڭالىقتار

جان جادىراتار تەبىرەنىس

ايماقتار • كەشە

كەدەن قويمالارى دايىن با؟

قازاقستان • كەشە

ۇقساس جاڭالىقتار