– ەل سپورتىنىڭ وركەندەۋىنە ەلەۋلى ەڭبەك سىڭىرگەن امانشا اقباەۆ, بەكەت ماحمۇتوۆ, الەكساندر اپاچينسكي جانە تاعى باسقا ابزال ازاماتتاردىڭ ەسىمدەرى ۇمىتىلىپ بارا جاتقانى جانىمىزعا باتادى. سول سەبەپتى دە ءبىز وسىنداي باستاما كوتەردىك. نۇر-سۇلتاندا امانشا سەيسەن ۇلىنىڭ, الماتىدا بەكەت ساپابەك ۇلىنىڭ, بالقاشتا الەكساندر ءيۆانوۆيچتىڭ اتىنا كوشە بەرىلسە دەگەن ۇسىنىس ايتىپ, جەرگىلىكتى اكىمدىكتەرگە حات جولدادىق. وسى يگى باستامامىزدى سپورتشىلار قاۋىمى تولىقتاي قۇپتاپ وتىر. رەسپۋبليكامىزدىڭ ءار قيىرىنداعى مىڭداعان جانكۇيەرلەر دە بارىنشا قولداۋ بىلدىرۋدە, – دەيدى "قازاقستاندىق سپورتشىلار وداعى" قوعامدىق بىرلەستىگىنىڭ توراعاسى ازامات قارلىعاشەۆ.
جوعارىدا ەسىمدەرى اتالعان ازاماتتار قازىر ارامىزدا جوق. دەسەك تە ولاردىڭ ارقايسىسى ارتىندا ولمەيتۇعىن ءىز قالدىردى. ماسەلەن, امانشا اقباەۆ 1971-1991 جىلدار ارالىعىندا رەسپۋبليكالىق سپورت كوميتەتىن باسقاردى. ودان كەيىن تۋريزم, دەنە شىنىقتىرۋ مەن سپورت ءمينيسترىنىڭ ءبىرىنشى ورىنباسارى, ال 1993-2002 جىلدارى قازاقستان رەسپۋبليكاسى ۇلتتىق وليمپيادا كوميتەتىنىڭ توراعاسى بولدى. سول كەزدەرى جەرلەستەرىمىز حالىقارالىق ارەنالاردا وراسان زور تابىستارعا قول جەتكىزگەنى بارشاعا ءمالىم.
ەلىمىز تاۋەلسىزدىك العان تۇستا وتاندىق بوكستىڭ تىزگىنىن بەكەت ماحمۇتوۆ ۇستادى. سول كەزدەن باستاپ بىلعارى قولعاپ شەبەرلەرىمىز وليمپيا ويىندارى مەن الەم چەمپيوناتتارىندا, اسا ءىرى حالىقارالىق جانە قۇرلىقتىق دودالاردا تولاعاي تابىسقا قول جەتكىزىپ, تورتكۇل دۇنيەدەگى ۇزدىك ءۇش كوماندانىڭ قاتارىنا قوسىلدى. ايتۋلى ازامات 10 جىل بويى حالىقارالىق اۋەسقوي بوكس قاۋىمداستىعىندا (ايبا) ۆيتسە-پرەزيدەنت, ءبىرىنشى ۆيتسە-پرەزيدەنت قىزمەتتەرىن ابىرويلى اتقاردى. 2009-2012 جىلدار ارالىعىندا رەسپۋبليكالىق دزيۋدو فەدەراتسياسىنا جەتەكشىلىك ەتتى. كۇرەستىڭ بۇل تۇرىندەگى ورلەۋ كەزەڭى دە ءداپ وسى بەكەت ساپابەك ۇلىنىڭ ەسىمىمەن تىعىز بايلانىستى ەكەنىن ەشكىم جوققا شىعارا المايدى.
الەكساندر اپاچينسكي بۇكىل عۇمىرىن بوكسقا ارنادى. جاس كەزىندە ءوزى دە ءتاۋىر ونەر كورسەتتى, كەيىننەن باپكەرلىكتىڭ قامىتىن كيدى. بالقاشتا ءجۇرىپ-اق, تالاي دارىندى جانە جالىندى جاستاردى ۇلكەن ارەناعا شىعاردى. سولاردىڭ اراسىنان ۆاسيلي جيروۆ سۋىرىلىپ شىعىپ, 1996 جىلى اتلانتا وليمپياداسىنىڭ جەڭىمپازى, باركەر كۋبوگىنىڭ يەگەرى اتاندى. سونىمەن قاتار, قازاقستاننىڭ ۇلتتىق قۇراما كومانداسىنىڭ اعا جاتتىقتىرۋشىسى بولىپ ۇزاق جىلدار بويى ەڭبەك ەتكەن اپاچينسكي گۇرزى جۇدىرىقتى جىگىتتەرىمىزدىڭ بوكس الەمىندەگى ەڭ بيىك بەلەستەردى باعىندىرۋىنا بارىنشا سەپتىگىن تيگىزدى.
راسىندا دا, امانشا اقباەۆ, بەكەت ماحمۇتوۆ جانە الەكساندر اپاچينسكي سىندى مايتالمانداردىڭ قازاقستان سپورتىن وركەندەتۋگە قوسقان ۇلەستەرى ەلەۋلى ەكەنى ەش كۇمان تۋعىزبايدى. كەزىندە ولاردىڭ بارلىعىنىڭ دا ەڭبەكتەرى ەلەندى. كەۋدەلەرىنە وردەندار مەن مەدالدار جارقىراپ, باسقا دا مەملەكەتتتىك ناگرادالارمەن ماراپاتتالدى. ەندى جوعارىدا اتالعان قالالاردى ابزال ازاماتتاردىڭ اتىنا كوشە بەرىلسە, ەش ارتىق ەتپەس دەگەن ويدامىز. سول سەبەپتى دە ءبىز دە قاراپايىم جانكۇيەر رەتىندە "قازاقستاندىق سپورتشىلار وداعى" قوعامدىق بىرلەستىگىنىڭ بۇل باستامىسىن تولىقتاي قولدايمىز.
