دەپۋتاتتار قالدىقتاردى ەنەرگەتيكالىق كادەگە جاراتۋ ماسەلەلەرىنە قاتىستى زاڭ جوباسىن ءبىرىنشى وقىلىمدا ماقۇلدادى.
قۇجات تۇجىرىمداماسىندا تۇرمىستىق قاتتى قالدىقتاردى جاعۋ ارقىلى ولاردى كادەگە جاراتۋ ۇسىنىسى قاراستىرىلعان. بۇل قالدىقتاردىڭ قورشاعان ورتاعا تەرىس اسەرىن ازايتۋعا جانە ولاردىڭ كومۋگە جاتاتىن كولەمىن قىسقارتۋعا مۇمكىندىك بەرەدى.
زاڭ جوباسىنىڭ تۇجىرىمداماسىنا سايكەس بۇل ۇسىنىستىڭ نەگىزگى قولداۋ تەتىگى – قوقىس جاعاتىن كاسىپورىندار وندىرگەن ەلەكتر ەنەرگياسىن كەپىلدى ساتىپ الۋ. ال ول ءوز كەزەگىندە جاڭارتىلاتىن ەنەرگەتيكا سالاسىن قولداۋدىڭ قولدانىستاعى تەتىگىنە ۇقساس بولادى. وسىعان بايلانىستى, زاڭ جوباسىندا ەكولوگيالىق كودەكس پەن «ەلەكتر ەنەرگەتيكاسى تۋرالى» جانە «جاڭارتىلاتىن ەنەرگيا كوزدەرىن پايدالانۋدى قولداۋ تۋرالى» زاڭدارعا تۇزەتۋلەر ەنگىزۋ كوزدەلگەن.
زاڭ جوباسىن تالقىلاۋ بارىسىندا دەپۋتاتتار جەرگىلىكتى اتقارۋشى ورگانداردى قوقىس جاعاتىن كاسىپورىنداردى قالدىقتاردىڭ قاجەتتى كولەمىمەن قامتاماسىز ەتۋگە مىندەتتەيتىن نورمانى الىپ تاستاۋدى, سونىمەن بىرگە ەكولوگيالىق كودەكستەگى جەرگىلىكتى اتقارۋشى ورگانداردىڭ جەر زاڭناماسىنا سايكەس قالدىقتاردى ەنەرگەتيكالىق كادەگە جاراتۋ جونىندەگى وبەكتىلەردى قامتيتىن الەۋمەتتىك ينفراقۇرىلىمدى سالۋ ءۇشىن جەر ۋچاسكەلەرىن ءبولۋى ماسەلەلەرىن ناقتىلاۋدى, قولدانىستاعى زاڭنامامەن جانە ءماجىلىس قاراۋىنداعى زاڭ جوبالارىنىڭ نورمالارىمەن ۇيلەستىرۋ ماقساتىندا قۇقىقتىق كولليزيالاردى جويۋ تۋرالى جانە باسقا دا ۇسىنىستار مەن تۇزەتۋلەر ەنگىزدى.
ودان ءارى دەپۋتاتتار «مەملەكەتتىك شەكارا تۋرالى» زاڭ جوباسىن ءبىرىنشى وقىلىمدا ماقۇلدادى.
زاڭ جوباسىندا وتكىزۋ پۋنكتتەرىندە قۇقىق قورعاۋ مەن ارناۋلى ورگاندار, پروكۋراتۋرا ورگاندارى قىزمەتكەرلەرىنىڭ بولۋ ءتارتىبىن رەگلامەنتتەيتىن, «قازاقستان رەسپۋبليكاسىنىڭ مەملەكەتتىك شەكارا تۋرالى» زاڭناماسىن بۇزۋدىڭ ىقتيمال تاۋەكەلدەرىن تومەندەتۋگە باعىتتالعان نورمالار كوزدەلەدى.
«زاڭ جوباسىندا قازاقستان رەسپۋبليكاسىنىڭ مەملەكەتتىك شەكارا تۋرالى زاڭناماسىن بۇزۋدىڭ ىقتيمال تاۋەكەلدەرىن تومەندەتۋگە باعىتتالعان نورمالار ۇسىنىلدى. وسىلايشا جولاۋشىلاردى ءتۇسىرۋدى (وتىرعىزۋدى), جۇكتەر مەن تاۋارلاردى تيەۋدى جۇزەگە اسىرمايتىن جاعدايدا عانا, قازاقستان اۋماعىن ترانزيت تۇردە تەمىر جول كولىگىمەن وتۋدە شەكارالىق, كەدەندىك جانە باقىلاۋدىڭ وزگە دە تۇرلەرىن جۇرگىزبەۋ ۇسىنىلادى», دەدى ءماجىلىس دەپۋتاتى قۇدايبەرگەن ەرجان.
سونىمەن قاتار قۇجاتتا ۇلتتىق قاۋىپسىزدىك كوميتەتى شەكارا قىزمەتىنىڭ قاجەتتى ينجەنەرلىك-تەحنيكالىق قۇرالداردى, قۇرىلىستار مەن بوگەۋىشتەردى ورناتۋ جونىندەگى قۇزىرەتى ناقتىلانادى. «زاڭ جوباسىندا شەكارا قىزمەتىمەن پيلوتسىز ۇشۋ اپپاراتتارىن قولدانۋدىڭ ەرەجەسىن بەكىتۋ بويىنشا ۇلتتىق قاۋىپسىزدىك كوميتەتىنىڭ قۇزىرەتى قاراستىرىلادى. مۇنىمەن قوسا شەكارا كەڭىستىگىندە قۇقىق بۇزۋشىلىقتاردىڭ جولىن كەسۋ كەزىندە ۇقك شەكارا قىزمەتى العان جانۋارلاردى, بالىقتاردى جانە وسىمدىكتەردى, براكونەرلىك اۋلاۋ قۇرالدارىن, براكونەرلىك ءجۇزۋ جابدىقتارىن ەسەپكە الۋ, ساقتاۋ مەن باعالاۋ جانە ودان ءارى پايدالانۋ جونىندەگى جۇمىستى ۇيىمداستىرۋ قۇزىرەتىن جەرگىلىكتى اتقارۋ ورگاندارىنا بەرۋدى قاراستىرادى», دەدى ق.ەرجان.
ودان كەيىن دەپۋتاتتار «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس جوباسىنا سەنات ەنگىزگەن تولىقتىرۋلاردى تالقىلاپ, ول بويىنشا كەلىسىمىن بەردى. «مەملەكەت باسشىسى قاسىم-جومارت توقاەۆتىڭ ۇلتتىق قوعامدىق سەنىم كەڭەسىنىڭ وتىرىسىندا بەرگەن تاپسىرماسىنا سايكەس, پارلامەنت سەناتىنىڭ دەپۋتاتتارى «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس جوباسىنا وزگەرىستەر مەن تولىقتىرۋلار ەنگىزدى. بۇل وزگەرىستەر مەن تولىقتىرۋلار ءماجىلىس ماقۇلداعان كودەكس جوباسىنىڭ تۇجىرىمدامالىق ءمانىن وزگەرتپەيدى», دەدى ءماجىلىس دەپۋتاتى زاۋرەش امانجولوۆا.
وتىرىستا پالاتا بىرقاتار جاڭا زاڭ جوباسىن جۇمىسقا الدى. ولاردىڭ قاتارىندا بيۋدجەت زاڭناماسىن جەتىلدىرۋ ماسەلەلەرى تۋرالى زاڭ جوباسى, سونداي-اق قازاقستان مەن موڭعوليا اراسىنداعى ازاماتتىق جانە قىلمىستىق ىستەر جونىندەگى ءوزارا كومەك تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى جانە ەاەو مەن وعان مۇشە مەملەكەتتەر جانە سەربيا اراسىنداعى ەركىن ساۋدا تۋرالى كەلىسىمدى راتيفيكاتسيالاۋ تۋرالى زاڭ جوبالارى بار.
وتىرىس سوڭىندا دەپۋتاتتار مەملەكەتتىك ورگانداردىڭ باسشىلارىنا بىرنەشە دەپۋتاتتىق ساۋال جولدادى. ءماجىلىس دەپۋتاتى ساكەن قانىبەكوۆ ۇكىمەت باسشىسى اسقار مامينگە بالالارعا ارنالعان سپورتتىق ينفراقۇرىلىمعا قاتىستى دەپۋتاتتىق ساۋال جولدادى. «بۇقارالىق دەنەشىنىقتىرۋدى دامىتۋ پيراميداعا اينالۋى كەرەك. سوندا بىزدە دەنى ساۋ, بەلسەندى جاستار كوبەيەدى. سايىپ كەلگەندە, دەنساۋلىعى مىقتى ۇلتتان جاڭا چەمپيوندار كوپ شىعادى. بۇل باعىتقا زاڭنامالىق قولداۋ, سونىمەن قاتار بۇقارالىق سپورتتى دامىتۋدىڭ كەشەندى جوسپارىن قابىلداۋ قاجەت», دەدى دەپۋتات ءوز ساۋالىندا. سونىمەن بىرگە قوماقتى قارجى جۇمسالاتىن فۋتبول سالاسىنا توقتالىپ, شەتەلدەن كەلەتىن سپورتشىلارعا قاتىستى ماسەلە كوتەردى.
