اتاپ ايتقاندا, Nur Otan پارتياسى بۇگىنگى ۋاقىت پەن زامانا تىنىسىن ءدوپ باسىپ, الدىنا ايقىن دا بايىپتى باعدار بەلگىلەپ وتىر. سونىڭ ىشىندە ەلدىڭ كوشباسشى ساياسي ۇيىمى وزگە ارىپتەستەرى مەن قوعامدىق ينستيتۋتتارعا ۇلگى-ونەگە جانە باستاماشىلدىق تانىتىپ, ەلدىك مۇددە مەن ەلدىك ماسەلەلەر توڭىرەگىندە ۇتىمدى پارتيالىق جوبالاردى قولعا الا بىلگەنى – قۇپتارلىق ءىس. پارتيانىڭ ويىل اۋدانىنداعى ساياسي كەڭەسى بيۋروسىنىڭ مۇشەسى, ويىل اۋداندىق ءماسليحاتىنىڭ حاتشىسى ەركىن جيەنالين ءوز-وي پىكىرىن وسى ارنادان ساباقتادى.
ونىڭ ايتۋىنشا, باتىستان باستاۋ العان, بۇدان كەيىنگى كەزەڭدە اقش ساياساتكەرلەرىنىڭ دەموكراتيالىق ۇستانىمدارىنا نەگىزدەلگەن سايلاۋ تاجىريبەسىن جاتسىنۋدىڭ قاجەتى جوق. ءتىپتى پارلامەنت ءماجىلىسىنىڭ دەپۋتاتى باقىتبەك سماعۇل «Egemen Qazaqstan» گازەتىنىڭ 9 ماۋسىم كۇنگى نومىرىندە جاريالانعان «پرايمەريز – پايىم مەن پاراسات ولشەمى» دەگەن ماقالاسىندا بۇل – پارتيانىڭ ءار وڭىردە وتكىزەتىن ىشكى سايلاۋى دەگەن ۇعىمدى بىلدىرەتىنىن ايتا كەلىپ, پرايمەريز – حالقىمىزدىڭ بايىرعى ءداستۇرىن جاڭا فورماتتا قايتا تۇلەتۋ ىسپەتتى ەكەنىن اتاپ كورسەتىپتى.
اڭگىمەنى ءارى قاراي جالعاساق, الەم ەلدەرىنىڭ ساياسي لەكسيكونىنان ءوز ورنىن تاپقان پرايمەريز تەرمينىن حالقىمىزدىڭ ويلاۋ-تۇسىنىگىندەگى ۇعىمعا سايساق, پارتياىشىلىك ىرىكتەۋ ءتاسىلى بولىپ شىعادى. جاڭا ءتاسىل پارتياىشىلىك سايلاۋدىڭ مازمۇنى مەن تۇرىنە, بۇگىنگى تىلمەن ايتقاندا, ونىڭ فورماتىنا تۇبەگەيلى وزگەرىستەر ەنگىزىلۋىنە ءارى ەڭ لايىقتى كوشباسشىنى سايلاۋعا سەپتىگىن تيگىزبەك. ەكىنشىدەن, مۇنىڭ ءوزى ەلىمىزدىڭ ساياسي قوندىرعىسىنا الەمدىك تاجىريبەدە ءوزىن ءوزى تولىعىمەن اقتاعان جاڭا تەحنولوگيالار مەن تاسىلدەردىڭ ەنگىزىلۋ ءۇردىسىن تانىتا الادى.
– حالىقارالىق دەڭگەيدەگى وزىق تاجىريبەنىڭ ءبارىن باس-كوزگە قاراماي قابىلداي بەرەتىن بولساق, ساياسي سىناقتان ءسۇرىنىپ كەتۋىمىز دە ابدەن مۇمكىن. وسى ورايدا Nur Otan پارتياسى پرايمەريز ءتاسىلىنىڭ ءتيىمدى تۇستارىن الدىن الا وي تارازىسىنان وتكىزگەنى پارتيا مۇشەلەرى مەن كوپشىلىك تاراپىنان قولداۋ تاپقانى – ءبىر مەرەي. تەك سودان كەيىن عانا وتكەن جىلى پارتياىشىلىك ىرىكتەۋ ءتاسىلى قاناتقاقتى جوبا رەجىمىندە ۇيىمداستىرىلدى. ونىڭ وڭىردەگى جيىنى اقتوبە وبلىسى بويىنشا مۇعالجار اۋدانىندا وتكىزىلدى, – دەدى بۇل تۋرالى Nur Otan پارتياسى ساياسي كەڭەسىنىڭ مۇشەسى, «سنپس-اقتوبەمۇنايگاز» اق باس ديرەكتورىنىڭ ءبىرىنشى ورىنباسارى تاقتاليفۋم ەسەنعۇلوۆ.
ونىڭ نەگىزگى ناتيجەسى قانداي بولدى دەگەن ماسەلەگە كەلسەك, قاناتقاقتى رەجىم كەزىندە كوپتەگەن ادام وعان قاتىسۋعا نيەت بىلدىرگەنىن ايتۋعا ءتيىسپىز. ءارى وسى ارقىلى نۇروتاندىقتاردىڭ قاتارىندا جۇرگەندەردىڭ اراسىندا كىمدەردىڭ كوشباسشى بولۋعا قابىلەتتى ەكەندىگى دە انىقتالدى. وسىلايشا اقتوبە ايماعىندا پرايمەريز وتكىزۋ قىزۋ تالقىلاۋ مەن اشىق پىكىرتالاستىڭ وزەگىنە اينالىپ سالا بەردى. تەك سودان كەيىن عانا پارتيانىڭ ساياسي كەڭەسى مۇشەلەرىنىڭ داۋىس بەرۋىمەن ونىڭ ەرەجەسى قابىلداندى.
تاعى ءبىر اتاپ وتەرلىك ماسەلە, الداعى ۋاقىتتا اقتوبە وبلىسىندا پارتياىشىلىك ىرىكتەۋگە قاتىسۋعا نيەت بىلدىرگەندەردى ارنايى ازىرلىكتەن وتكىزۋ مەن وقىتۋ ءىسى بەلگىلەنگەنى. سونىمەن بىرگە ساياسي مەنەدجمەنت مەكتەبىنىڭ قىزمەتىن جولعا قويۋ, سايلاۋشىلارمەن وڭتايلى جۇمىس جۇرگىزە ءبىلۋ جانە كوپشىلىك الدىندا ءسوز سويلەۋ داعدىلارىن قالىپتاستىرۋ, ءارى پارتياىشىلىك ماسەلەلەرگە قاتىستى وزگە دە سۇراقتار بويىنشا ونلاين-سەمينارلار وتكىزۋ كوزدەلگەن.
پرايمەريزدىڭ ءتۇپ-توركىنى تۇتاستاي ەلدىك مۇددەمەن تامىرلاس ەكەندىگى دە دالەلدەۋدى قاجەت ەتپەيدى. ءتۇيىپ ايتقاندا, Nur Otan پارتياسى قولعا العان تىڭ ءتاسىل ساياسي ۇيىمدى جاڭعىرتۋ مەن جۇمىسىن ودان ءارى جەتىلدىرۋدىڭ ءبىر تۇتقاسىنا اينالا الاتىنىنا سەنىم بىلدىرگىمىز كەلەدى. وسى ارقىلى ەلىمىزدەگى جەتەكشى پارتيا دەموكراتيا قاعيداتتارىنا ادالدىق تانىتىپ, ساياسي رەفورمانى جۇزەگە اسىرۋ ۇستىندە ناقتى دا باتىل قادام جاساپ وتىر دەۋگە تولىق نەگىز بار.
اقتوبە
