ۇكىمەت • 17 ماۋسىم، 2020

رومان سكليار مەن جەڭىس قاسىمبەك قاراعاندى وبلىسىنداعى جوبالارمەن تانىستى

9 رەت كورسەتىلدى

پرەمەر-ءمينيستردىڭ ورىنباسارى رومان سكليار مەن قاراعاندى وبلىسىنىڭ اكىمى جەڭىس قاسىمبەك قاراعاندى وبلىسىنداعى جول قۇرىلىسى بارىسىمەن جانە ءىرى ينۆەستيتسيالىق جوبالاردىڭ ىسكە اسىرىلۋىمەن تانىستى.

رومان سكليار قاراعاندى-تەمىرتاۋ اۆتوموبيل جولىنىڭ ۋچاسكەسىن قاراپ شىقتى. مەردىگەرلەر جوندەۋ جۇمىستارىن ءبىر اي ىشىندە اياقتاۋعا ۋادە بەردى. جول التى جولاقتى بولادى. كۇن سايىن وسى جول ارقىلى 20 مىڭنان استام اۆتوكولىك وتەدى. ۆيتسە-پرەمەرگە قاراعاندىداعى جاڭا جولدار تۋرالى باياندالدى. بيىل جالپى ۇزىندىعى 48،3 كم قۇرايتىن سولتۇستىك جانە شىعىس اينالما جولدارىنىڭ قۇرىلىسىن اياقتاۋ جوسپارلانعان.

قاراعاندىدا رومان سكليار 3-جەو-نىڭ م-10 جىلۋ ماگيسترالىن قايتا جاڭارتۋ بارىسىمەن تانىستى. جۇمىس وتكەن جىلى باستالىپ، قازىر اياقتالۋعا جاقىن قالدى. بۇل 60 مىڭعا جۋىق قاراعاندىلىقتى ۇزدىكسىز جانە ساپالى جىلۋمەن قامتاماسىز ەتۋگە مۇمكىندىك بەرەدى.

پرەمەر-ءمينيستردىڭ ورىنباسارى ساران قالاسىنداعى "Kazcentrelectroprovod" جشس-دە بولدى. كاسىپورىن كابەل-وتكىزگىش، تەلەكوممۋنيكاتسيالىق جانە ەلەكتروتەحنيكالىق ونىمدەردى، مەتالل قۇرىلىمدارىن وندىرەدى، وسى جىلدىڭ بەس ايىندا ءوندىرىس كولەمى 1،7 ملرد تەڭگەنى قۇرادى. كابەلدەردى شىعارۋ ەكى ەسە ءوستى. قاراعاندىلىق ءوندىرۋشى قازاقستاننىڭ قاجەتتىلىگىن قامتاماسىز ەتۋدە. ونىڭ ونىمدەرى اۋىلداردى تسيفرلاندىرۋ كەزىندە قولدانىلادى. كاسىپورىن سونداي-اق رەسەي مەن وزبەكستان ءۇشىن ەكسپورتقا جۇمىس ىستەيدى، ول قازىردە ەۋروپا نارىعىنا شىقتى.

سونداي-اق، رومان سكليار Yutong ماركالى اۆتوبۋستار مەن ارنايى تەحنيكا وندىرىسىنە قاراجات سالاتىن ينۆەستورلارمەن كەزدەستى. كاسىپورىن بۇرىنعى رتي زاۋىتىنىڭ بازاسىندا جۇمىس ىستەيتىن بولادى. قازىر قۇرىلىستىڭ ءبىرىنشى كەزەڭى باستالدى. ءوندىرىستى ىسكە قوسۋ جانە العاشقى اۆتوبۋستاردى شىعارۋ بيىلعى جىلدىڭ جەلتوقسان ايىنا بەلگىلەنگەن. زاۋىتتىڭ قۋاتتىلىعى جىلىنا 1 200 اۆتوبۋس جانە 500 ارنايى تەحنيكا مەن ارنايى كولىك شىعارۋدان تۇرادى. جاڭادان 400 جۇمىس ورنى قۇرىلادى.

نىساندى ارالاۋ بارىسىندا رومان سكليار مەن جەڭىس قاسىمبەك اۆتوبۋستار ءوندىرىسى بويىنشا ينۆەستيتسيالىق جوبانى ىسكە اسىرۋدىڭ جول كارتاسىنا قول قويدى.

ساپار بارىسىندا قاراعاندى–بالقاش اۆتوجولى، ۇزىندىعى 363 كم بولاتىن "ورتالىق – وڭتۇستىك" ءدالىزىن قايتا جاڭارتۋ بارىسى تەكسەرىلدى. جۇمىس قىزۋ ءجۇرىپ جاتىر. سونداي-اق رومان سكليار مەن جەڭىس قاسىمبەك "كۇرتى-بۋرىلبايتال" ۋچاسكەسىنىڭ قايتا جاڭارتىلۋ جۇمىستارىمەن تانىستى. مۇنداعى جوندەۋ جۇمىستارىن 2022 جىلى اياقتاۋ جوسپارلانىپ وتىر.

جۇمىس ساپارىنىڭ قورىتىندىسى بويىنشا رومان سكليار بەلگىلەنگەن جوسپارلاردى ۇزدىكسىز ارى ۋاقىتىلى ورىنداۋ بويىنشا تاپسىرمالار بەردى.

سوڭعى جاڭالىقتار

ەلورداعا قارجى قۇيۋعا نيەتتى

ەلوردا • بۇگىن، 16:50

29-31 قازان كۇندەرى كۇن جىلىنادى

اۋا رايى • بۇگىن، 12:40

قانداستار ماسەلەسى تالقىلاندى

ساياسات • بۇگىن، 08:12

كوشە كامەراسىنىڭ كومەگى

ايماقتار • بۇگىن، 07:57

ۇقساس جاڭالىقتار