كامەلەتكە تولماعاندارعا قاتىستى قۇقىققا قارسى ارەكەتتەردى انىقتاۋ بويىنشا ينتەرنەت جەلىسىنە مونيتورينگ جۇرگىزۋ كەزىندە ءىىم كريمينالدىق پوليتسيا جانە تەرگەۋ قىزمەتكەرلەرى كامەلەتكە تولماعان قازاقستاندىقتاردىڭ قاتىسۋىمەن ءوز-وزىنە قول جۇمساۋ سيپاتىنداعى توپ تۋرالى اقپارات انىقتالدى.
ءوز-وزىنە قول جۇمساۋدى ناسيحاتتاۋ بويىنشا وعان قاتىسى بار ادامداردى انىقتاۋ جانە ۇستاۋ ءۇشىن قر ءىىم كيبەرقىلمىسقا قارسى ءىس-قيمىل ورتالىعىنىڭ جانە تۇركىستان وبلىسى پوليتسيا دەپارتامەنتىنىڭ قىزمەتكەرلەرىنەن ارنايى جەدەل-تەرگەۋ توبى قۇرىلدى. پوليتسيا قىزمەتكەرلەرى ءارى قاراي تەكسەرۋ جۇمىسىن جۇرگىزۋ بارىسىندا ينتەرنەت جەلىسىندەگى ۇيىمداستىرۋشىنىڭ جەكە-باس دەرەكتەرى مەن مەكەن-جايىن انىقتادى. ول ارىس قالاسىنىڭ تۇرعىنى بولىپ شىقتى.
ءتىنتۋ كەزىندە كۇدىكتىدەن نوۋتبۋك, ۇيالى تەلەفون, ءۇش قوراپ سيم-كارتاسىمەن جانە باسقا دا زاتتاي دالەلدەمەلەر الىندى. تەلەفوننان سۋيتسيدكە باعىتتالعان تەلەگرام ارنالارى تابىلدى. قازىرگى ۋاقىتتا اتالعان جايت ادام ولتىرۋگە وقتالۋ بويىنشا تىركەلىپ, سوتقا دەيىنگى تەرگەۋ امالدارى جۇرگىزىلىپ جاتىر. سوت سانكتسياسىمەن كۇدىكتى قاماۋعا الىندى. "پوليتسيا قىزمەتكەرلەرى ءىستىڭ تولىق ءمان-جايىن تەكسەرىپ جاتىر. سونداي-اق جاسوسپىرىمدەردى وسىنداي ولىمگە اكەلەتىن ويىندارعا قاتىستىرۋى مۇمكىن ادامداردى جانە ارنا قاتىسۋشىلارىنىڭ وزدەرىن دە انىقتايدى", دەپ اتاپ ءوتتى ءىىم كريمينالدىق پوليتسيا دەپارتامەنتىنىڭ باستىعى دۋمان تاەۆ.
ءىىم اتا-انالاردى بالالاردىڭ ۆيرتۋالدى ومىرىنە باقىلاۋدى كۇشەيتۋگە شاقىرادى. شۇعىل قاجەتتى شارالار قابىلداناتىن وسىعان ۇقساس جايتتار ورىن السا, تەز ارادا پوليتسياعا حابارلاۋدى سۇرايدى.
