ايماقتار • 17 ماۋسىم، 2020

تۇرمىستىق زورلىق-زومبىلىقتان جاپا شەگۋشىلەرگە كومەك كورسەتەدى

25 رەت كورسەتىلدى

بيىلعى جىلدىڭ باسىنان بەرى سولتۇستىك قازاقستان وبلىسىندا تۇرمىستىق زورلىق-زومبىلىقتان جاپا شەككەن جەتى ايەل وبلىستىق ايەلدەردى قولداۋ ورتالىعىنان پانا تاپتى. بۇلار، بالالارىمەن قوسقاندا، بارلىعى 14 ادام، - دەپ جازادى Egemen.kz

زورلىق-زومبىلىققا ۇشىراعاندارعا پوليتسەيلەر عانا ەمەس، ايەلدەر كۇشىنىڭ اليانسى جانە قولداۋ ورتالىعى سياقتى ەكى قوعامدىق ۇيىم كومەك كورسەتەدى. جاپا شەككەن ايەلدەر مۇندا جارتى جىلعا دەيىن باسپانا تابادى. بۇل ۋاقىتتا ولارعا زاڭنامالىق جانە قارجىلىق تاۋەلسىزدىك الۋ جولدارى بويىنشا اقىل-كەڭەستەر دە بەرىلەدى.

قازىر پەتروپاۆل قالاسى بويىنشا 18 ماۋسىمعا دەيىن "وتباسىندا زورلىق-زومبىلىق بولماسىن!" دەگەن اكتسيا ءجۇرىپ جاتىر. اكتسيا بارىسىندا بۇرىن زورلىق-زومبىلىق جاساعان ادامدار تەكسەرىلەدى جانە جاپا شەككەندەردىڭ قازىرگى احۋالى سۇرالادى. ەگەر جانجالقوي ءۇي-ءىشىنىڭ مازاسىن الىپ، تاعى  ۇرىس-كەرىس تۋدىرىپ، بوقتىق سوزدەر ايتقان بولسا 5 تاۋلىككە دەيىن، ال ايەلىنە قول جۇمساعان بولسا 15 تاۋلىككە دەيىن قامالادى.

جانجالقۇمار پوليتسيانىڭ ورىنداۋعا بەرگەن مىندەتتەمەسىن دە اياق استى ەتكەن بولسا قامالادى. ماسەلەن، قالانىڭ "جۇمىسشىلار كەنتىندە" تۇراتىن 1975 جىلعى تۋعان سونداي ادام بۇرىن ءوزىنىڭ وتباسىنان جانجالقويلىق قىلىقتارى ءۇشىن ايرىلىپ، شەشەسىنىڭ قولىندا تۇراتىن ەدى. ەندى شەشەسىنە دە مازا بەرمەيتىن كورىنەدى. پوليتسيانىڭ ورىنداۋعا بەرگەن مىندەتتەمەلەرىن دە اياق استى ەتكەن. سول ءۇشىن پوليتسيا ونى شەشەسىنىڭ قارسىلىعىنا قاراماي، 5 تاۋلىككە جاپتى.   

 

پەتروپاۆل

سوڭعى جاڭالىقتار

ۇقساس جاڭالىقتار