اگەنتتىكتىڭ حابارلاۋىنشا, بۇگىنگى تاڭدا ەكىنشى دەڭگەيدەگى بانكتەر مەن يپوتەكالىق ۇيىمدار 256,7 ملرد تەڭگە سوماعا 37 191 يپوتەكالىق قارىزدى قايتا قارجىلاندىرۋدى ماقۇلداعان. باعدارلاما بىرنەشە بلوكتان تۇرادى. يپوتەكالىق قارىزدى قايتا قارجىلاندىرۋ باعدارلاماسى بورىشكەرلەردىڭ جالعىز باسپاناسىن ساقتاۋعا, بورىش جۇكتەمەسىن تومەندەتۋگە جانە ولاردى ۆاليۋتا باعامدارىنىڭ قۇبىلۋىنان قورعاۋعا باعىتتالعانىن ايتا كەتەيىك.
2004-2009 جىلدارى باعدارلامانىڭ ءبىرىنشى بلوگىندا ۇلتتىق بانك بورىشكەرلەردىڭ بەرەشەگىن جەڭىلدەتۋ ءۇشىن 130 ملرد تەڭگە ءبولدى. ول قارجىنى بانكتەر يگەردى. ەندىگى كەزەكتە قايتا قارجىلاندىرۋ بۇعان دەيىن قارىزداردى وتەۋدەن تۇسكەن اقشا ەسەبىنەن جۇزەگە اسىرىلۋدا. قازىر جالپى كولەمى 174,7 ملرد تەڭگەنى قۇرايتىن 28 117 ءوتىنىش ماقۇلداندى, 161 ملرد تەڭگەنى قۇرايتىن 27 006 قارىز قايتا قارجىلاندىرىلدى.
باعدارلامانىڭ ەكىنشى بلوگىندا 2016 جىلعى 1 قاڭتارعا دەيىن الىنعان جەكە تۇلعالاردىڭ ۆاليۋتالىق يپوتەكالىق قارىزدارىن ۇلتتىق بانك 2015 جىلعى 18 تامىزداعى تەڭگە باعامى بويىنشا تەڭگەمەن قايتا قارجىلاندىرماق. 1 ماۋسىمداعى جاعداي بويىنشا 82 ملرد تەڭگە سوماعا 9 074 ءوتىنىش ماقۇلدانىپ, 68,4 ملرد تەڭگەنىڭ 7 750 ۆاليۋتالىق يپوتەكالىق قارىزى قايتا قارجىلاندىرىلدى.
بيىلعى قاڭتار ايىنان باستاپ قارجى نارىعىن رەتتەۋ جانە دامىتۋ اگەنتتىگى حالىقتىڭ الەۋمەتتىك وسال توپتارى ساناتىنا جاتاتىن قارىز الۋشىلاردىڭ يپوتەكالىق جۇكتەمەسىن تومەندەتۋگە, سونداي-اق ازاماتتاردىڭ جالعىز باسپاناسىن بانكتىڭ بالانسىنان كەپىل بەرۋشىنىڭ مەنشىگىنە قايتارۋعا باعىتتالعان قوسىمشا شارالاردى ەنگىزگەنىن اتاپ وتكەن ءلازىم. بۇل باعدارلامانىڭ ءۇشىنشى بلوگى شەڭبەرىندە اتقارىلعان جۇمىس.
ۆاليۋتالىق يپوتەكالىق قارىزداردى قايتا قارجىلاندىرۋ مەرزىمى 2020 جىلعى 31 جەلتوقسانعا دەيىن ۇزارتىلدى. قارىزدىڭ باعدارلاما تالاپتارىنا سايكەستىگىن انىقتاۋ ءۇشىن ازاماتتار كرەديتور-بانككە جۇگىنۋى قاجەت.
اگەنتتىك بانكتەرگە باقىلاۋ جۇرگىزەدى, ەلىمىزدىڭ بارلىق وڭىرلەرىندە بانكتىڭ قارىزدى قايتا قارجىلاندىرۋدان باس تارتۋىنىڭ زاڭدىلىعى تۋرالى قارىز الۋشىلاردىڭ شاعىمدارىن قارايتىن ارنايى كوميسسيالار قۇرىلعان. 2020 جىلعى 1 ماۋسىمداعى جاعداي بويىنشا كوميسسيالار قارىز الۋشىلاردىڭ 5 094 شاعىمىن قارادى. قوعامدىق بىرلەستىكتەردىڭ وكىلدەرى ءوز كەزەگىندە كوميسسيالاردىڭ وكىلەتتىكتەرىن كەڭەيتۋدى جانە ەكىنشى دەڭگەيدەگى بانكتەردىڭ يپوتەكالىق قارىزدار بويىنشا وتىنىشتەردى قاراۋ مەرزىمىن جەدەلدەتۋدى ۇسىندى.
