كونكۋرستىڭ تاقىرىبى 2020 جىلعى وليمپيادا كۇنىنىڭ ۇرانىمەن بىردەي – "وليمپيادا بالالىق شاقتان باستالادى". بولاشاق وليمپيادا جەڭىستەرىنىڭ ىرگەتاسى بالا كەزدەن قالىپتاسادى.
"وليمپيادا چەمپيونى بولىپ تۋىلمايدى, وليمپيادا چەمپيونى بولىپ قالىپتاسادى. باستى ماقساتىمىز – جاستارعا وسى باعىتتى ءتۇسىندىرۋ. ەڭبەكقورلىق, توزىمدىلىك جانە ءوز ماقساتىنا ۇمتىلۋ ارقىلى ۇلكەن جەڭىستەر مەن وليمپيادا جۇلدەلەرىنە قادام باسۋعا بولادى. وليمپيادا چەمپيوندارى مەن سپورتشىلاردىڭ ومىرلىك جولى وسكەلەڭ ۇرپاققا جارقىن ۇلگى ەكەنى انىق. ولاردىڭ جەڭىسكە دەگەن جىگەرى مەن ەل داڭقىن اسقاقتاتۋ جولىنداعى ەڭبەگى سپورت ارقىلى بالا ارماندى ورىنداۋعا بولاتىنىنىڭ دالەلى. ءدال وسى ماقسات ارقىلى ەلىمىزدەگى تالانتتى سۋرەتشىلەر مەن ونەرگە جانە سپورتقا ىنتىق جانداردى وليمپيادالىق قۇندىلىقتاردى دارىپتەۋگە شاقىرامىز. وليمپيزم قۇندىلىقتارىن تانىتا ءتۇسۋ ءۇشىن قازىرگى تاڭداعى تانىمال كوشە ونەرى (ستريت-ارت) جانە مۋرال تاڭدالىپ وتىر. كونكۋرس ارقىلى ەلىمىزدەگى سۋرەتشىلەرگە قولداۋ كورسەتۋ دە كوزدەلۋدە", - دەپ اتاپ ءوتتى قازاقستان ۇوك.
كونكۋرسقا كەز كەلگەن ادام قاتىسا الادى. تولىعىراق www.olympic.kz سايتىندا. جەڭىمپاز 21 ماۋسىم كۇنى ۇلتتىق وليمپيادالىق كوميتەتتىڭ رەسمي سايتىندا اشىق داۋىس بەرۋ ارقىلى انىقتالادى. قولدانۋشىلار 17 ەڭبەكتىڭ ىشىنەن ەڭ ۇزدىگىن تاڭداپ الادى.
جەڭىمپاز بەن ەكى جۇلدەگەر ءۇشىن دەمەۋشىلەر قۇندى سىيلىقتار دايىنداۋدا. اكىمدىكتەرمەن كەلىسىلگەن سوڭ جەڭىمپازدىڭ ەڭبەگى جاريالاناتىن ءۇي قابىرعاسى تاڭدالادى. وسىلايشا, قازاقستاندىق قالالاردىڭ بىرىندە تاريحتا العاش رەت وليمپيادالىق مۋرال پايدا بولادى.
