توعىز وقۋشى مەن تاربيەشى تاۋعا كۇندىز شىعىپتى. ولاردىڭ التاۋى مەن تاربيەشى ءوز بەتىمەن تومەنگە تۇسكەن, ال 3 وقۋشى اداسىپ كەتكەن.
ىشكى ىستەر مينيسترلىگى توتەنشە جاعدايلار كوميتەتىنىڭ حابارلاۋىنشا, تاربيەشى تاۋدان تۇسكەننەن كەيىن ساعات 22:48-دە "112" نومىرىنە حابارلاسقان. ساعات 23:00-دەن باستاپ شىمكەنت قالاسىنىڭ توتەنشە جاعدايلار دەپارتامەنتى جەدەل-قۇتقارۋ جاساعىنىڭ (6 قىزمەتكەر مەن 1 تەحنيكا), تۇركىستان وبلىسىنىڭ تجد (10 قىزمەتكەر مەن 3 تەحنيكا), جەدەل مەديتسينالىق جاردەم بريگاداسى (5 قىزمەتكەر مەن 1 تەحنيكا), پوليتسيا ءبولىمى (2 ادام مەن 1 تەحنيكا) كۇشتەرى ىزدەستىرۋ-قۇتقارۋ جۇمىستارىن جۇرگىزدى. وكىنىشكە قاراي, جەكسەنبىدەن دۇيسەنبىگە قاراعان ءتۇن جارىمدا, ياعني 00:58-دە شىمكەنت قالاسىنىڭ تجد-نىڭ ىزدەستىرۋ توبى جاردان قۇلاپ كەتكەن 2003 جىلى تۋعان ءجاسوسپىرىمنىڭ ءولى دەنەسىن تاۋىپ, جەرگە ءتۇسىردى. ال ەكى وقۋشىمەن تۇسكە جاقىن حابارلاسۋعا مۇمكىندىك تۋعان. قۇتقارۋشىلاردىڭ ايتۋىنشا, ولارمەن ۇيالى تەلەفونمەن بايلانىس بار.
"شىمكەنت قالاسى تجد جقج قۇتقارۋشىلارى الپينيستىك قۇرال-جابدىقتاردى قولدانا وتىرىپ, بالالاردى ءتۇسىرۋ جانە قۇتقارۋ بويىنشا وپەراتسيا جۇرگىزۋدە. الايدا, جارتاستى جەرلەر, بيىك تاۋلار مەن تىك بەتكەيلەرگە بايلانىستى قۇتقارۋ جۇمىستارى قيىنداي تۇسۋدە. قۇتقارۋ وپەراتسياسىنىڭ قورىتىندىسى تۋرالى قوسىمشا حابارلانادى", - دەلىنگەن ءىىم تجك حابارلاماسىندا.
تۇركىستان وبلىسى
