وسىلايشا ەلدىڭ باس قالاسىنان حاليف حافتاردىڭ اسكەرى الىستاتىلىپ, تريپولي اكىمشىلىك ايماعى ۇلتتىق كەلىسىم ۇكىمەتىنىڭ باقىلاۋىنا ءوتتى. وعان قوسا بۇعان دەيىن ليۆيا ۇلتتىق اسكەرىنىڭ قاراۋىندا بولعان ءال-ۆاشكا, ءال-باگلا اۋداندارى دا ۇلتتىق كەلىسىم ۇكىمەتىنە قايتارىلعان.
وتكەن اپتادا ازاماتتىق سوعىسقا قاتىسىپ جاتقان قوس تاراپ شەتەلگە جاڭا كەلىسىمدەر جاساۋعا اتتاندى. ۇلتتىق كەلىسىم ۇكىمەتىنىڭ باسشىسى فايزە ساررادجدىڭ ءوزى تۇركياعا جول تارتسا, ورىنباسارىن رەسەيگە جىبەردى. ال Reuters اگەنتتىگى حاليف حافتار مىسىرعا بارىپتى دەپ جازادى. كەلىسسوزدەرگە اتتانباس بۇرىن ف.ساررادج حالىقارالىق تريپولي اۋەجايىن ءوز باقىلاۋىنا وتكىزىپ, ەل بيلىگىندەگى ورنىن ناقتىلاي تۇسكەن.
ال ەلدەگى ازاماتتىق سوعىستى وزدەرىنشە قولداپ وتىرعان دەرجاۆالار كوپ. سيريا ماسەلەسىندە كەلىسە الماعان تۇركيا مەن رەسەي تاعى دا ايماقتاعى شيەلەنىسكە «قىزىعۋشىلىق» تانىتىپ وتىر. بۇۇ مويىنداعان فايەز ساررادجدىڭ ۇلتتىق كەلىسىم ۇكىمەتىن تۇركيا رەسمي قولداسا, قاتار بەيرەسمي تۇردە قولداۋ كورسەتۋدە. ال ليۆيانىڭ شىعىسىن باقىلاۋدا ۇستاپ وتىرعان حافتاردىڭ جاقتاستارى – ءباا مەن مىسىر. رەسەي بۇل شيەلەنىستە بەيتاراپتىقتى ۇستانىپ, ۇلتتىق كەلىسىم ۇكىمەتىمەن دە, گەنەرال حافتار تاراپىمەن دە بايلانىس ورناتقان.
2011 جىلدان بەرى ليۆيادا ورتالىقتاندىرىلعان بيلىك جوق. ەل بۇۇ مويىنداعان فايەز ساررادج ۇكىمەتى مەن حاليف حافتاردىڭ باسقارۋىنداعى ليۆيا ۇلتتىق اسكەرى اراسىندا قالىپ وتىر. كۇشتەردىڭ تەكەتىرەسىنە ءتىپتى كوروناۆيرۋس پاندەمياسى دا تۇساۋ بولا المادى.
بۇۇ مويىنداعان ۇكىمەتتىڭ ەلدىڭ باس قالاسىن قايتارىپ الۋى ليۆياداعى بەيبىتشىلىكتىڭ نىشانى ەمەس. كەرىسىنشە ليۆيالىقتاردىڭ باسىنا قارا بۇلت ۇيىرىلە تۇسكەندەي. قوس تاراپتىڭ قاقتىعىستارىنان ادەتتە قاراپايىم حالىق زارداپ شەگۋدە. گاز بەن مۇناي سەكىلدى رەسۋرستارعا باي مەملەكەت ازاماتتارىن ءبىلىم, دەنساۋلىق ساقتاۋ سەكىلدى ادام ومىرىنە ماڭىزدى العىشارتتارمەن قامتاماسىز ەتە الماي وتىر. ودان دا اۋىرى – قاۋىپسىزدىكتىڭ بولماۋى.
اقپارات قۇرالدارىنان تۇركيانىڭ ليۆيا اۋماعىندا ەكى تۇراقتى بازا سالۋعا دايىندالىپ جاتقانى بەلگىلى بولدى. ۇلتتىق كەلىسىم ۇكىمەتى تۇركيانىڭ بۇل جوسپارى ءۇشىن ءال-ۆاتيا اۋە بازاسىن بەرۋدى قاراستىرىپ جاتىر. ال ەكىنشى بازا ميسراتا پورتىندا سالىنادى دەگەن جوسپار بار. جاڭادان سالىناتىن پورتقا كەمەلەر اكەلىنبەك. ال بۇل ءوز كەزەگىندە تۇركيانى ليۆيانىڭ وندىرىسىنە ورتاق ەتەدى دەگەن بولجامدى تۋىنداتۋدا.
اقش بۇل جاعدايدا دا قاراپ قالمادى. جاقىندا اقش مەملەكەتتىك حاتشىسىنىڭ تاياۋ شىعىس ىستەرى بويىنشا كومەكشىسى دەۆيد شەنكەر رەسەيدى ليۆيا ىسىنە ارالاسىپ, ناتيجەسىندە تۇركيا ينتەرۆەنتسياسىنا اكەلدى دەپ ايىپتادى. الايدا بۇل ايىبىنا ناقتى دالەلدەر كەلتىرە المادى.
اقش مەملەكەتتىك حاتشىسى مايك پومپەو ليۆياداعى قوس ۇكىمەتتىڭ بۇۇ شەڭبەرىندە كەلىسىمگە كەلۋى بەيبىتشىلىككە جاسالعان العاشقى قادام دەپ ويلايتىنىن ايتا كەلىپ, «پرەمەر-مينيستر فايەز ساررادج بەن مارشال حاليف حافتاردىڭ بيىل اقپاندا جەنەۆادا وتكەن كەلىسسوزدەردە ورتاق مامىلەگە كەلە الۋى قۋانتتى. الايدا ولار ماسەلەگە باسقا مەملەكەتتەردىڭ ارالاسۋىنا جول بەرمەۋى كەرەك. ويتكەنى ءوز پايداسىن ويلاعان ەلدەر ليۆيانىڭ تاۋەلسىزدىگىنە نۇقسان كەلتىرۋى مۇمكىن», دەدى مەملەكەتتىك حاتشى.
ليۆيادا سىرتقى كۇشتەردىڭ اسەرىمەن قاتار جەرگىلىكتى توپتاردىڭ تالاسى بارىن ەسكەرسەك, ايماقتاعى شيەلەنىستىڭ شەشىلۋى ۇزاققا سوزىلماق. ەلدىڭ بۇرىنعى باسشىسى كاددافيدىڭ ولىمىنەن كەيىن ليۆيادا ۇلكەن توپتار بيلىك جۇرگىزۋگە كوشتى. قازىر ەلدىڭ سولتۇستىك-باتىس ايماعىنداعى ميسۋرات قالاسىنىڭ تۇرعىندارى ۇلتتىق كەلىسىم ۇكىمەتىن قولداپ وتىرسا, كورشىلەس جاتقان زينتان قالاسىنداعىلار حافتار اسكەرىنىڭ جاعىندا.
