ايماقتار • 12 ماۋسىم، 2020

جامبىل وبلىسىندا كوروناۆيرۋسقا قارسى ۆاكتسينا شىعارىلادى

482 رەت كورسەتىلدى

پرەمەر-مينيستر اسقار مامين جامبىل وبلىسىندا  قورداي اۋدانىنىڭ گۆاردەيسكي قالا ۇلگىسىندەگى كەنتىندە قر بعم عىلىم كوميتەتىنىڭ بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتى (عزي) جانىنداعى ۆاكتسينا شىعاراتىن بيوفارماتسەۆتيكالىق زاۋىتتىڭ قۇرىلىسىن باستاپ بەردى. بۇل تۋرالى primeminister.kz حابارلادى.

زاۋىت ءتيىستى وندىرىستىك تاجىريبەنىڭ (GMP) حالىقارالىق ستاندارتى بويىنشا يممۋنوبيولوگيالىق ءدارى-دارمەكتەر، ونىڭ ىشىندە كوروناۆيرۋس ينفەكتسياسىنا قارسى ۆاكتسينا شىعاراتىن بولادى. قازىرگى تاڭدا قازاقستان عزي-نىڭ COVID-19-عا قارسى كانديداتتىق ۆاكتسيناسى ددسۇ تىزىمىنە ەنگىزىلگەن جانە كلينيكاعا دەيىنگى سىناقتان ءساتتى ءوتىپ جاتىر.

سونداي-اق كاسىپورىندا پاندەميالىق تۇماۋعا، تۋبەركۋلەزگە، برۋتسەللەزگە، نودۋليارلىق دەرماتيتكە، ۇساق كۇيىس قايىراتىن جانۋارلار وباسىنا، قوي مەن ەشكىنىڭ كونتاگيوزدى ەكتيماسىنا، قوي شەشەگىنە، قۇتىرماعا جانە باسقا دا جۇقپالى اۋرۋلارعا قارسى ۆاكتسينالار شىعارىلادى.

قۇرىلىس جۇمىستارىن بيىل جەلتوقسان ايىندا اياقتاۋ جانە جىل سايىن بيوفارماتسەۆتيكالىق پرەپاراتتاردىڭ 60 ملن دوزاسىنا دەيىن ءوندىرۋ كوزدەلگەن.

قر بعم عىلىم كوميتەتىنىڭ بيولوگيالىق قاۋىپسىزدىك ماسەلەلەرى عزي 1958 جىلى كسرو-نىڭ 6 ءىرى ۆيرۋسولوگيالىق ينستيتۋتىنىڭ ءبىرى رەتىندە قۇرىلدى. شتات 214 عىلىمي قىزمەتكەر مەن جەتەكشى ۆيرۋسولوگ-عالىمداردان (اكادەميكتەر، دوكتورلار جانە عىلىم كانديداتتارى، PhD) قۇرالعان، قاۋىپتى ينفەكتسيالارمەن جۇمىس ىستەۋگە ارنالعان 13 زەرتحانانى قامتيدى.

عزي اۋىل شارۋاشىلىعىنا جانە دەنساۋلىق ساقتاۋ جۇيەسىنە ارنالعان ۆاكتسينالار ازىرلەيدى، يممۋندىق-بيولوگيالىق پرەپاراتتار شىعارادى، بيولوگيالىق قاۋىپسىزدىك قاۋپى سالاسىندا زەرتتەۋلەر جۇرگىزەدى، قاۋىپتى جانە اسا قاۋىپتى اۋرۋلاردى دياگنوستيكالاۋ بويىنشا تەست جۇيەلەرىن ازىرلەيدى، ۆيرۋستار مەن ميكروورگانيزمدەردىڭ قاۋىپتى جانە اسا قاۋىپتى شتاممدارىنىڭ دەپوزيتاريى سانالادى.

قازىرگى ۋاقىتتا عزي 5 زەرتحانا بازاسىندا وتاندىق ۆاكتسينالاردىڭ 67 ءتۇرىن ءوندىردى، ونىڭ ىشىندە، دەنساۋلىق ساقتاۋ سالاسى ءۇشىن جوعارى پاتوگەندى قۇس تۇماۋىنا قارسى (الەمدە 7) جانە جوعارى پاتوگەندى شوشقا تۇماۋىنا قارسى (الەمدە 6)، اۋىل شارۋاشىلىعى سالاسى ءۇشىن قۇس تۇماۋىنا قارسى (الەمدە العاشقىلاردىڭ ءبىرى)، برۋتسەللەزگە قارسى جاڭا ۆەكتورلىق ۆاكتسينا (الەمدىك انالوگتاردان اسىپ تۇسەدى). وسى جىلى اۋسىلعا قارسى ۆاكتسينا جانە 4 سوVID-19-عا قارسى ۆاكتسينا ازىرلەنۋدە.

عزي شەتەلگە ۆاكتسينالار جەتكىزۋشى رەتىندە كەدەن وداعىنىڭ تىزىلىمىنە ەنگىزىلگەن، يسلام ىنتىماقتاستىعى ۇيىمىنا مۇشە مەملەكەتتەردىڭ ۆاكتسينالاردى وندىرۋشىلەر توبىنا كىرەدى.

سوڭعى جاڭالىقتار

ۇقساس جاڭالىقتار