الەم • 12 ماۋسىم، 2020

ورتالىق ازيا ەلدەرى قاۋىپسىزدىك سالاسىنداعى ىنتىماقتاستىق ماسەلەلەرىن تالقىلادى

24 رەت كورسەتىلدى

قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى ەرجان اشىقباەۆ بۇۇ-نىڭ ورتالىق ازيا ءۇشىن پرەۆەنتيۆتىك ديپلوماتيا جونىندەگى وڭىرلىك ورتالىعى ء(واپدوو) ۇيىمداستىرعان ورتالىق ازيا جانە اۋعانستان سىرتقى ىستەر مينيسترلەرىنىڭ ورىنباسارلارىنىڭ ونلاين-كەزدەسۋىنە قاتىستى. ءىس-شاراعا بۇۇ باس حاتشىسىنىڭ ساياسي ماسەلەلەر جونىندەگى كومەكشىسى ميروسلاۆ ەنچا، ەو-نىڭ ورتالىق ازيا بويىنشا ارنايى وكىلى پەتەر بۋريان جانە ەقىۇ جانجالداردى الدىن الۋ ورتالىعىنىڭ ديرەكتورى تۋلا يۋرولا قاتىستى. بۇل تۋرالى ءسىم ءباسپاسوز قىزمەتى حابارلادى.

كەزدەسۋ بارىسىندا قاتىسۋشىلار وڭىردەگى قاۋىپسىزدىككە قاتىستى اعىمداعى ۇردىستەر مەن وقيعالاردى، سونداي-اق وڭىرلىك ىنتىماقتاستىقتىڭ وزەكتى ماسەلەلەرىن تالقىلادى. COVID-19 پاندەمياسىنان تۋىنداعان داعدارىستى ەڭسەرۋ جونىندەگى ۇلتتىق باستامالار مەن ۇسىنىستارعا ەرەكشە نازار اۋدارىلدى.

ە.اشىقباەۆ قازاقستان رەسپۋبليكاسى ۇكىمەتىنىڭ داعدارىستان كەيىنگى كەزەڭگە كوزقاراسىن تانىستىرىپ، سونداي-اق قاتىسۋشىلاردى ەلىمىزدىڭ COVID-19 جانە ونىڭ سالدارلارىمەن، وڭىرلىك جانە حالىقارالىق دەڭگەيدەگى كۇرەستەگى ەلىمىزدىڭ ۇلەسىمەن تانىستىردى. سونىمەن بىرگە، قازاقستان ورتالىق ازياداعى سەرىكتەستەرىنە مەيلىنشە كومەك كورسەتەتىنى جانە بۇۇ-نىڭ نەگىزگى حالىقارالىق باستامالارىن قولدايتىندىعى ايتىلدى.

سىرتقى ىستەر ءمينيسترىنىڭ ورىنباسارى ورتالىق ازياداعى سەرىكتەستەردى وڭىرلىك قاۋىپسىزدىك سالاسىنداعى ىنتىماقتاستىقتى نىعايتۋعا، سونداي-اق ورتالىق ازيا مەن اۋعانستاندا ورنىقتى دامۋ ماقساتتارىن ىسكە اسىرۋعا باعىتتالعان باستامالارىن قولداۋعا شاقىردى.

بۇۇ، ەو جانە ەقىۇ وكىلدەرى ورتالىق ازيا مەن اۋعانستان مەملەكەتتەرىنىڭ كوروناۆيرۋس پاندەمياسىنىڭ جاعىمسىز سالدارىن ەڭسەرۋدەگى ءوزارا ءىس-قيمىلىن وڭ باعالادى.

وتىرىسقا قاتىسۋشىلار ءواپدوو، ەو جانە ەقىۇ-نىڭ وڭىرلىك ىنتىماقتاستىقتى ىلگەرىلەتۋ جانە وڭىردەگى بەيبىتشىلىك پەن قاۋىپسىزدىكتى نىعايتۋ جونىندەگى كۇش-جىگەرلەرىن قولدايتىندىعىن ءبىلدىردى.

سوڭعى جاڭالىقتار

ۇقساس جاڭالىقتار