ءبورلى اۋدانىنىڭ ورتالىعىنداعى حالىقتار دوستىعى كوشەسىنىڭ ماڭدايىنداعى جەتى قاباتتى ءۇي قابىرعاسىنا سالىنعان مۋرالدا ءانشى جانە ونىڭ الەمى – شەكسىز دالا مەن كوك اسپان, كيىز ءۇي مەن بيىك ءۇي الماسقان دالا-قالا ءومىرى ستريت-ارت ۇلگىسىندە كورىنىس تاپقان.
"بۇل كەرەمەت ونەر تۋىندىسىنىڭ اۆتورلارى – ورالدىق Unicorns دەپ اتالاتىن سۋرەتشىلەر كومانداسى. جالپى بيىلعى مەرەيتويلارعا وراي اقساي قالاسىنداعى كوپ قاباتتى ۇيلەرگە تانىمال تۇلعالارىمىزدىڭ سۋرەتىن – مۋرال سالدىرۋ يدەياسىن جىل باسىندا اۋدان اكىمدىگى كوتەرگەن بولاتىن. بۇل باستامانى جەرگىلىكتى كيوس كومپانياسى قولدادى. ءسويتىپ جەڭىستىڭ 75 جىلدىعى قارساڭىندا 9 قاباتتى ءۇي قابىرعاسىنا باۋىرجان مومىش ۇلى اتامىزدىڭ سۋرەتى سالىنسا, كەشە عانا 7 قاباتتى ءۇي قابىرعاسىنا باتىرحان شۇكەنوۆتىڭ سۋرەتى سالىنىپ, اياقتالدى. بۇعان بيۋدجەت قارجىسى جۇمسالعان جوق", دەيدى ءبورلى اۋدانى اكىمىنىڭ ورىنباسارى الپامىس كوشكىنباەۆ.
قالانىڭ كوركىن كىرگىزىپ, الىستان كوزگە شالىناتىن مۇنداي مۋرالدى سالۋ ءۇشىن ادەتتە 2 اپتاداي ۋاقىت كەتەدى ەكەن. سوڭعى كۇندەرى باتىس قازاقستان وبلىسىندا ءجيى جاۋعان جاڭبىر مەن كۇشتى جەلدىڭ كەدەرگىسى از بولماعان. دەگەنمەن, سۋرەتشىلەر ءوز جۇمىسىن ءساتتى اياقتادى. مۋرالدىڭ سۋرەتىن جەلىدەن كورگەن قازاقستاندىقتار جاقسى پىكىر بىلدىرۋدە.
الپامىس جاڭاباي ۇلىنىڭ ايتۋىنشا, بولاشاقتا اقساي قالاسىندا بيىل 175 جىلدىعى اتالىپ جاتقان اقىن اباي قۇنانباي ۇلىنىڭ دا مۋرال-سۋرەتىن سالۋ جوسپارلانعان.
باتىس قازاقستان
