بىزدە جەڭىسكە دەگەن قۇلشىنىس جوعارى

– قازىرگى قازاقستاندىق كاسىپقوي بوكسشىلاردىڭ ناتيجەلەرىنە كوڭىلىڭىز تولا ما؟

– ءيا, كوڭىلىم تولادى. كەرەمەت. كوبى ءوز كۇشتەرىمەن شىڭعا شىعۋدا. قازاقستاننىڭ قولداۋىنسىز.

– كاسىپقوي بوكستان ەلىمىزدىڭ ەڭ ۇزدىك ون بوكسشىنى اتاساڭىز.

– مەن ولار ءۇشىن قۋانىشتىمىن. مىنا بوكسشىلاردى اتاپ وتسەم: 1. گەننادي گولوۆكين (40-1-1); 2. قانات يسلام (27-0-21); 3. جانكوش تۇراروۆ (24-0-17); 4. بەيبىت شۇمەنوۆ (20-2-18); 5. باتىر جۇكەمباەۆ (18-0-14); 6. ءالي احمەدوۆ (16-0-12); 7. باحتيار ەيۋبوۆ (14-1-2); 8. مەيىرىم نۇرسۇلتانوۆ (13-0-8); 9. بەكمان سويلىباەۆ (12-0-4); 10. رۋسلان ماديەۆ (12-1-5).

– سىزگە قازاقستان اتىنان ۇسىنىس جولدانىپ, كاسىپقوي بوكسشىلاردى دايىنداۋعا شاقىرسا, قابىل الاسىز با؟

– ارينە ەگەر مەنىڭ دە ۇسىنىستارىم ەسكەرىلسە, قازاقستاندا جاتتىقتىرۋشى بولۋعا قۋانا كەلىسەر ەدىم.

– كوپتەگەن بوكسشى سىزبەن كەزدەسۋدەن باس تارتتى. سولاردىڭ ىشىندە روي دجونس, مايك تايسون, ەۆەندەر حولليفيلد بار. تاعى دا كىمدەردى اتار ەدىڭىز؟

– ءيا, كوپتەگەن بوكسشى مەنىمەن كەزدەسۋدەن باس تارتاتىن. جەكپە-جەككە ەكى ساعات قالعاندا, ەكى بوكسشىدان ءتورت بوكسشىعا دەيىن اۋىسىپ كەتەتىن. كەشىرىڭىز, بىراق قازىر ولاردىڭ ەسىمدەرى ەسىمدە جوق.

– «بالقاش جولبارىسى» دەگەن لاقاپ اتتى نە سەبەپتى تاڭدادىڭىز؟

– بىلە بىلسەڭىز, مەن بالقاش قالاسىندا تۋىپ-ءوستىم. بۇرىن سول بالقاشتا جولبارىس­تار ءومىر سۇرگەن دەيدى. قازىر ولار جويىلىپ كەتكەن. ءبىر جازۋشى مەن جايلى جازعان كەزدە مەنىڭ رينگتەگى قيمىل-قوزعالىسىمدى جولبارىسقا تەڭەگەن ەكەن. سول ۋاقىتتا مەن وزىمە لاقاپ ات قاراستىرىپ جۇرگەنمىن. وسى لاقاپتى وزىمە لايىق كورىپ  «بالقاش جولبارىسى» دەپ اتادىم.

– قازىر نەمەن اينالىساسىز؟

– قازىر جاتتىقتىرۋشىمىن. اۋەسقوي بوكس­شىلاردى, ءوزى ءۇشىن بوكسپەن اينالىسقىسى كەلەتىن, دەنساۋلىعىن نىعايتقىسى كەلەتىن جانداردى جاتتىقتىرامىن.

– شارشى الاڭدى ساعىنبايسىز با؟

– ساعىنىپ ءجۇرمىن دەپ ايتا المايمىن. بوكستان كەتەردە جان-جاقتى ويلانىپ, بارلىعىن ەسەپتەپ كەتكەنمىن.

– ءوزىڭىز تۋرالى تاعى نە ايتار ەدىڭىز؟

– ءومىر جالعاسىپ جاتىر, ياعني ءتىرى ادام تىرشىلىگىن جاسايدى... جەكە وتباسىم جايلى مالىمەت بەرە المايمىن. ول تەك وزىمە عانا تيەسىلى دۇنيە.

– سالىستىرمالى تۇردە قازاقستاندىق جانە امەريكالىق بوكسشىلاردىڭ ايىر­ماشىلىعى قانداي؟

– امەريكالىق بوكسشىلاردا ايتارلىقتاي جىگەر جوق, بىراق ەسەپتەرى مىقتى. ال قازاق­ستاندىق بوكسشىلاردا جەڭىسكە دەگەن قۇل­شىنىس وتە جوعارى.

اڭگىمەلەسكەن

ايبەك مۇقانوۆ,

جۋرناليست,

ارنايى «Egemen Qazaqstan» ءۇشىن