پرەزيدەنتتىڭ ايتۋىنشا, ۇسىنىلعان ستراتەگيادا «ۇيلەستىرۋگە جانە بىرىزدەندىرۋگە» قاتىستى قۇقىقتىق جاۋاپكەرشىلىك ورناتۋ بولىمىندەگى اكىمشىلىك جانە قىلمىستىق, كەدەن ءىسى, تەحنيكالىق رەتتەۋ, تۇتىنۋشىلاردىڭ قۇقىعىن قورعاۋ سياقتى بىرقاتار سالا جەتكىلىكتى دەڭگەيدە پىسىقتالماعان. نەگە دەسەڭىز, اتالعان ستراتەگيا ۇكىمەتتەر مەن پارلامەنتتەردىڭ دەربەس قۇقىعىن شەكتەيدى. پرەزيدەنت قاسىم-جومارت توقاەۆ «كومسومولسكايا پراۆدا» گازەتىنە بەرگەن سۇحباتىندا دا رەسەيمەن ستراتەگيالىق ارىپتەس ەكەنىمىزدى ايتىپ, كوبىنەسە ەكونوميكالىق الىس-بەرىستى نىعايتۋعا ۇلكەن ءمان بەرىلەتىنىن ناقتىلادى.
پرەزيدەنتتىڭ بۇل جاۋابى ديپلوماتيالىق تۇرعىدا وتە دۇرىس. دەگەنمەن بۇل سالانىڭ وزىندە ارىپتەستىگىمىزگە مۇقيات قاراپ, بەلگىلى ءبىر دەڭگەيدە شەكتەۋ قويىلعانى ارتىق بولماس دەپ ەسەپتەيمىن. ونىڭ سەبەبىنە توقتالساق, قازاقستاندىق تاۋار وندىرۋشىلەردى قولداۋ ءۇشىن ەكونوميكالىق سەرىكتەستەرىمىزدىڭ ايماقتارىنان كەلەتىن ونىمدەرگە شەكتەۋ قويىلۋ كەرەك. قاي سالانى الساق تا, رەسەيلىك تاۋارلاردىڭ وتاندىق وندىرۋشىلەردى نارىقتان ىسىرىپ تاستاپ جاتقانىن بايقاۋعا بولادى. ولار نارىقتىق باعانى ادەيىلەپ تۇسىرەدى. مۇنىڭ سوڭى بىزدەگى كاسىپورىنداردىڭ جابىلۋىنا الىپ كەلەدى. بۇل بار تاجىريبە. مىسالى, وسكەمەندە جىلۋ وقشاۋلاعىش ماتەريالدار شىعاراتىن ءىرى كاسىپورىن جۇمىس ىستەگەن. ءدال سونداي ماتەريال وندىرەتىن رەسەيلىك كومپانيا كەلىپ, ونىمدەرىن ەكى ەسە تومەن باعادا ساتتى. وسىنىڭ سالدارىنان وتاندىق زاۋىت جابىلۋعا ءماجبۇر بولدى. مۇنداي كاسىبى تۇرالاپ, قىزمەتىن توقتاتقان كاسىپورىندار ەلىمىزدە از ەمەس.
مەملەكەت ىشكى نارىقتى دامىتۋ ءۇشىن شەكتەۋ قويىپ, وتاندىق ىسكەر ازاماتتارعا باسىمدىق بەرۋ كەرەك. ءتۇرلى ەكونوميكالىق وداقتارعا ەنە بەرسەك, ىشكى وندىرىستىك سەكتوردى جوعالتىپ الۋىمىز مۇمكىن.
5-6 ءونىم ءتۇرى شىعارىلىپ, قايتا وڭدەۋ سەكتورى دامىماي قالۋى مۇمكىن. بۇعان قاۋىپتەنۋگە نەگىز بار. ەكونوميكالىق ينتەگراتسيالىق بايلانىستاردا بەلگىلى ءبىر دەڭگەيدە شەكتەۋلەر بولعانى زاڭدىلىق. قازاقستاننان رەسەيگە تاسىمالداناتىن تاۋارلار كەدەن بەكەتتەرىندە كوپتەگەن كەدەرگىگە تاپ بولىپ جاتىر. رەسەيدىڭ ەكونوميكاسى شيكىزات رەسۋرستارىنا تاۋەلدى بولعاندىقتان قايتا وڭدەۋ ماسەلەسىنە كورشىلەس مەملەكەتتە قازىر ۇلكەن ءمان بەرىلىپ كەلەدى. دەمەك, ىشكى سۇرانىستى قامتۋ ماسەلەسىن مىقتاپ قولعا الۋ كەرەك.
ءبىزدىڭ مەملەكەتتىڭ ۇستاناتىن ءوز ەكونوميكالىق ساياساتى بار. ايتسە دە رەسەي حالقى 140 ملن-نان اساتىندىقتان, ولاردىڭ كومپانيالارىمەن باسەكەلەسۋ قازاقستاندىق كاسىپكەرلەرگە قيىن. سول سەبەپتى بۇل ماسەلەگە مۇقيات قاراپ, جان-جاقتى ويلاۋ كەرەك. پرەزيدەنت «كومسومولسكايا پراۆدا» گازەتىنە بەرگەن سۇحباتىندا وسى ماسەلەلەرگە توقتالدى.
البەتتە رەسەيمەن ساياسي-ەكونوميكالىق ىنتىماقتاستىعىمىزدان بولەك, ورتاق تاريحي-مادەني بايلانىستارىمىز كوپ. دەسەك تە قازاقستاننىڭ ءوز ۇستانعان جولى بار. وسىنى كورشىلەس مەملەكەتتەر ەسكەرۋ كەرەك. مىنە, مەملەكەت باسشىسى وسى تۇستاردى ايقىن اڭعارتتى.
ازاماتحان ءامىرتاي,
«بايتاق-بولاشاق» ەكولوگيالىق اليانسىنىڭ توراعاسى
