ءسىم ءباسپاسوز قىزمەتىنىڭ مالىمەتىنشە, تاراپتار قازاقستان پرەزيدەنتىنىڭ ساياسي رەفورمالاردى ىسكە اسىرۋىن تالقىلادى.
م.باچەلەت ەلىمىزدەگى بەيبىت جينالىستار, ساياسي پارتيالار سالاسىنداعى, سونداي-اق جالا جابۋدى دەكريميناليزاتسيالاۋعا قاتىستى ساياسي رەفورمالارىن اتاپ ءوتتى. ونىڭ ايتۋىنشا, بۇل رەفورمالار ءبىزدىڭ ەلىمىز بۇۇ-عا مۇشە ەلدەردىڭ امبەباپ كەزەڭدىك شولۋدىڭ ءۇشىنشى تسيكلى بارىسىندا ۇسىنىمدارىنا شىنداپ قارايتىنىن جانە ولاردى ۋاقتىلى جۇزەگە اسىرۋ بويىنشا جۇمىس ىستەيتىنىن كۋالاندىرادى.
ءوز كەزەگىندە, تۇراقتى وكىل 2020 جىلدىڭ اقپان ايىندا بۇۇ ادام قۇقىقتارى جونىندەگى كەڭەسىنىڭ 43-ءشى سەسسياسى بارىسىندا قازاقستاندا جۇرگىزىلگەن رەفورمالارعا وڭ باعا بەرگەنى ءۇشىن, سونداي-اق جوعارعى كوميسسار كەڭسەسىنىڭ جاقىندا جاريالاعان 2019 جىلعى بايانداماسىندا كورسەتىلگەن جوبالار مەن ترەنينگتەردى ىسكە اسىرۋ ارقىلى كورسەتىلەتىن كومەك ءۇشىن جوعارعى كوميسسارعا العىسىن ءبىلدىردى.
پرەزيدەنت قاسىم-جومارت توقاەۆتىڭ ساياسي باسەكەلەستىك پەن ءپليۋراليزمنىڭ كوپپارتيالىق جۇيەسىن دامىتۋعا, سونداي-اق قازاقستانداعى كونستيتۋتسيالىق زاڭ دەڭگەيىندە العاش رەت ۇسىنىلاتىن پارلامەنتتىك وپپوزيتسيا تۇجىرىمداماسىن ىلگەرىلەتۋگە باعىتتالعان باستاماسىنا نازار اۋدارىلدى.
جوعارعى كوميسسار, سونداي-اق مەملەكەتتىڭ ازاماتتىق قوعاممەن قارىم-قاتىناسىن نىعايتۋ ماقساتىندا قازاقستاننىڭ جۇرگىزىپ وتىرعان جۇمىسىمەن تانىستى.
كەزدەسۋ سوڭىندا قر تۇراقتى وكىلى قازاقستان مەن بۇۇ اراسىنداعى ىنتىماقتاستىعى شارتتىق ورگاندار, ارنايى راسىمدەر جانە ۇيىمنىڭ باسقا دا تەتىكتەرى ارقىلى اشىق جانە كونسترۋكتيۆتى ديالوگ ارقىلى ىسكە اسىرىلۋىنىڭ ماڭىزدىلىعىن اتاپ ءوتتى. سونىمەن بىرگە, ول بۇۇ-نىڭ شارتتىق ورگاندار جۇيەسىن ونىڭ تيىمدىلىگىن ارتتىرۋ جانە وڭتايلاندىرۋ جونىندەگى رەفورمالار باستاماسىن قولدايتىندىعىن ءبىلدىردى.
