2018 جىلدىڭ تامىز ايىنىڭ 4-ىندە «سەمەي – ءنوۆوسىبىر» باعىتىنداعى اۆتوبۋسپەن جولعا شىعىپ, تۇنگى ساعات 4 شاماسىندا كولىكتە تۇتانعان ءتىلسىز جاۋمەن ارپالىسىپ, نەبارى 1 مينۋت 45 سەكۋندتا 48 ادامدى قۇتقارعان سەمەيلىك ەرجان ومارحانوۆ وقىس وقيعانى وسىلاي ەسكە الادى.
ءبىر قورقىنىشتىسى, اۆتوبۋس نەبارى 4 مينۋتتىڭ ىشىندە جانىپ كەتكەن كورىنەدى. ال ەرجان ومارحانوۆ قۇتقارعان 48 جولاۋشىنىڭ 12-ءسى بالا ەكەن. اۆتوبۋس ىشىندە 3 ايلىق سابيدەن ەگدە تارتقان زەينەتكەرگە دەيىنگى ساناتتاعى ادامدار بولىپتى.
كەيىپكەرىمىز رەسەيگە كولىك ساتىپ الۋ ماقساتىندا جولعا شىققان ەكەن. الايدا «بايتال تۇگىل باس قايعى» دەگەندەي, اۆتوبۋستاعى ءورت كەزىندە ادامداردى سىرتقا شىعارىپ, جان الىسىپ, جان بەرىسىپ جۇرگەندە قۇجاتتارى مەن 1 ميلليون, 400 مىڭ تەڭگە كولەمىندەگى اقشاسىنان ايىرىلادى.
اۆتوبۋس سەمەيدەگى «سۇلۋ» اۆتوبەكەتىنەن شىعىپتى. كەيىن ەرجان اۆتوبەكەتتىڭ باسشىلىعىنا حابارلاسىپ, ادامداردىڭ ومىرىنە نەمقۇرايلى قاراۋعا بولمايتىنىن ايتقان. بىراق اۆتوبەكەتتەگىلەر اۆتوبۋستىڭ رەسەي ەلىنە تيەسىلى ەكەنىن, بارلىق ارىز-شاعىمدى سولارعا ايتۋ كەرەك ەكەنىن جەتكىزىپتى. «قوعامدىق كولىك سەمەيگە كەلگەن سوڭ تەحنيكالىق تەكسەرۋ جۇرگىزىلۋى كەرەك. مەن وسىنى ايتقاندا اۆتوبەكەت باسشىسى تەلەفون تۇتقاسىن قويا سالدى. سودان بەرى جاۋاپتان قاشىپ ءجۇر. كەيىن ماعان ماسكەۋلىك زاڭگەر اۆتوبۋس جولعا شىقپاس بۇرىن قازاقستاندا تەكسەرىلۋى كەرەك ەكەنىن ايتتى. بىرنەشە كۇن وتكەن سوڭ جانىپ كەتكەن اقشامدى ءوندىرىپ الۋ ءۇشىن اۆتوبۋس يەسىن ىزدەدىم. ونى دوستارىمنىڭ كومەگىمەن تاپتىم. بىراق ول ماعان تەك 150 مىڭ رۋبل عانا قايتاردى» دەيدى بەيبىت كۇننىڭ باتىرى.
وسى وقيعادان كەيىن ەرجاننىڭ ەرلىگىنە سۇيىنگەن حالىق ونى توبەسىنە كوتەرىپ, العىستارىن ايتىپ, ريزاشىلىقتارىن بىلدىرەدى. سەمەيلىك جەرلەستەرى اتىنان جەرگىلىكتى كاسىپكەر, «گوردورستروي» جشس ديرەكتورى باۋىرجان قايرامباەۆ 1 ميلليون تەڭگە تابىستايدى. جاقىندا كوپ جىلدان بەرى پاتەر جالداپ تۇراتىن كەيىپكەرىمىزگە «لانكاستەر» اتتى الماتىلىق كومپانيانىڭ باسشىلارى سەمەي قالاسىنان ءۇي الىپ بەرگەنىن ەستىدىك.
ەرجان ومارحانوۆ – 4 بالانىڭ اكەسى. نەگىزىنەن كاسىپكەرلىكپەن شۇعىلدانسا دا, ءبىر تيىن الماستان گرەك-ريم كۇرەسىنەن جاتتىقتىرۋشى رەتىندە شاكىرت تاربيەلەپ, جارىستارعا اپارادى. «سەمەيدىڭ ىرگەسىندە بوبروۆكا دەگەن ساياجايلى اۋىل بار. تۇرعىندارى جان-جاقتاعى اۋىلداردان كەلگەن. وسى اۋىلداعى مەكتەپتىڭ سپورت زالىندا 2013 جىلدان بەرى بالالاردى كۇرەسكە باۋلىپ ءجۇرمىز. ءوزىم وسى كۇرەس تۇرىمەن 12 جاسىمنان باستاپ اينالىسقانمىن. بىزدە 107 بالا بار. مەن ءالي سوۆەتحانوۆ دەگەن باپكەرمەن بىرلەسە جۇمىس ىستەيمىن. ارنايى سپورتتىق ءبىلىمىم جوق. 1990 جىلدارى ءبىلىم الۋعا مۇمكىندىك بولمادى. نەگىزگى جۇمىسىم – رەسەي مەن قازاقستان اراسىندا كولىك اكەپ ساتۋ» دەيدى ەرجان.
قۋانىشتىسى سول, قايسار جىگىت 2019 جىلى «قازاقستاننىڭ 100 جاڭا ەسىمى» جوباسىنىڭ ءۇشىنشى كەزەڭىندە جەڭىمپاز اتاندى.
سول كەزدە ءتىلسىز جاۋدىڭ قۇرىعىنان امان شىققان جولاۋشىلار ءالى كۇنگە دەيىن ەرجانعا حابارلاسىپ, جاعدايىن ءبىلىپ تۇرادى ەكەن. ايتپاقشى, بەيبىت كۇننىڭ باتىرىن بىلتىر رەسەيدىڭ تانىمال تەلەجۋرناليسى اندرەي مالاحوۆ ءوز باعدارلاماسىنا قوناققا شاقىرعانى دا بەلگىلى. بىراق كەيىپكەرىمىز بۇل ۇسىنىستان باس تارتىپتى. «رەسەي تىلشىلەرىنىڭ اراسىندا سول كۇنى «جولاۋشىلاردى باسقا ادام قۇتقاردى» دەپ اقپارات تاراتقاندارى دا كەزدەستى. ماعان ەشقانداي دا اتاقتىڭ قاجەتى جوق. ەشۋاقىتتا بىرەۋگە حابارلاسىپ: «ولاردى مەن قۇتقاردىم» دەپ جار سالعان ەمەسپىن. بارىنە ءبىر اللا كۋا عوي. وتىرىك اقپارات تاراتقانداردى ءوز ۇياتتارىنا قالدىردىم» دەيدى ول.
كورشى ەلگە ءجيى قاتىناپ تۇراتىن ونى رەسەيلىكتەردىڭ كوبى جاقسى بىلەدى ەكەن. بارعان جەرىندە تانىپ, كەلىپ, ريزاشىلىقتارىن ءبىلدىرىپ, سۋرەتكە تۇسەتىن كورىنەدى. ايتپاقشى, داعىستاندىق ساياساتتانۋشى, جۋرناليست رۋسلان كۋربانوۆ ءوزىنىڭ ينستاگراممداعى پاراقشاسىندا: «ەگەر بۇل جەردە رەسەيلىك بولعاندا باياعىدا-اق حالىق قاھارمانى قىلار ەدىك. ال شاعىن عانا شاھاردان شىققان بۇل قازاق ەشقايدا بارىپ, ەرلىگىن بۇلداپ جۇرگەن جوق. ونىڭ ەڭبەگىن ەسكەرمەدىك. ۇمىتتىق» دەپ جازىپتى.
دەسەك تە, ەرجان ومارحانوۆتىڭ ەرلىگىن تۋعان حالقى بىلەدى. سول ءۇشىن دە قۇرمەتتەپ, قادىرلەيدى.
سەمەي
