جالپى, الماتى وبلىسىندا ستۋدەنت جاستاردى جاتاقحانامەن قامتۋ ءىسى ەلباسىنىڭ «5 الەۋمەتتىك باستاما» باعدارلاماسى جاريا بولعاننان كەيىن قولعا الىنعان بولاتىن. شىن مانىسىندە وبلىستاعى وقۋ ورىندارىندا ستۋدەنتتەردىڭ جاتىن ورنى وتكىر ماسەلەگە اينالعانى جاسىرىن ەمەس ەدى. ماسەلەن, ايماقتاعى جەتىسۋ ۋنيۆەرسيتەتىنىڭ كۇندىزگى بولىمىندە 3 مىڭنان استام ستۋدەنت وقىسا, ونىڭ بەس جۇزگە جۋىعىنىڭ عانا جاتاقحانادا تۇرۋعا مۇمكىندىگى بار ەكەن. ۋنيۆەرسيتەتتىڭ 2 جاتاقحاناسى بولعانىمەن, ورىن سانى شەكتەۋلى-ءتىن. ال تالدىقورعان, تالعار قالالارى مەن قاراتال اۋدانىنداعى كاسىپتىك ءبىلىم بەرەتىن ارناۋلى وقۋ ورىندارىنىڭ بىلىمگەرلەرى دە جاتىن ورىن تاپشىلىعىن ءالى دە سەزىنۋدە. ەسەسىنە, وبلىس بيلىگى دە قول قۋسىرىپ وتىرعان جوق. جاستاردى تۇرعىن جايمەن قامتۋعا بىلەك سىبانا كىرىسىپ كەتتى. بيىل وبلىستا جالپى سانى 968 ورىندىق 10 جاتاقحانانىڭ قۇرىلىسى ءجۇرىپ جاتىر. ونىڭ سەگىزى كوللەدج وقۋشىلارىنا ارنالعان ەكەن. ال تالدىقورعاندا اشىلاتىن ستۋدەنتتەر كامپۋسى جەتىسۋ ۋنيۆەرسيتەتىنىڭ يەلىگىنە بەرىلەدى.
ەندى قاراتال وزەنىنىڭ جاعالاۋىنا جاقىن تۇرعان, زاماناۋي ۇلگىدە جاڭعىرعان 9 قاباتتى ەڭسەلى نىسان تەك جاتىن ورنى عانا ەمەس, جاستاردىڭ جەكە قالاشىعىنا اينالماق. مۇندا 96 بولمە جاساۋ, جابدىعىمەن دايىن تۇر. عيمارات ىشىندە جاستار تالعامىنان شىعاتىن كىتاپحانا, كلۋب, كافە, شاعىن كينو-تەاتر, كومپيۋتەر ورتالىعى جانە بار. ال كامپۋس ماڭىندا سپورت الاڭدارى مەن سەرۋەندەۋگە ارنالعان گۇلزار, سۋبۇرقاق ورنالاسقان.
– «بولاشاق – جاستاردىكى» دەگەندى ءبىز تەك ءسوز جۇزىندە عانا ايتپاۋىمىز كەرەك. جاس ۇرپاق مەملەكەتتىڭ قامقورلىعىن سەزىنۋى ءتيىس. اسىرەسە جوعارى ءبىلىم الىپ جۇرگەن جاستاردىڭ الاڭسىز وقۋى ءۇشىن قولدان كەلگەن يگىلىكتى جاساۋ ءبىزدىڭ پارىزىمىز. ەلباسى نۇرسۇلتان نازارباەۆ «5 الەۋمەتتىك باستاما» تۋرالى ماسەلە كوتەرگەندە ءبىزدىڭ الدىمىزعا وسىنداي مىندەت قويدى. جاستاردىڭ ەرتەڭ ەلگە قالتقىسىز قىزمەت ەتۋى ءۇشىن, وتان الدىنداعى پارىز بەن قارىزدى اركەز سالماقتاي ءبىلۋ ءۇشىن ولارعا ءتيىستى قولداۋ مەن قامقورلىق كورسەتۋدى پرەزيدەنت قاسىم-جومارت توقاەۆ تا كۇن تارتىبىنەن تۇسىرگەن ەمەس. وسى ماقسات بويىنشا جەتىسۋداعى ستۋدەنت جاستاردىڭ جاعدايىنا كوڭىل ءبولۋدى ۇنەمى جالعاستىرىپ كەلەمىز. سونىڭ ءبىرى جاتاقحانا ماسەلەسىن دەر كەزىندە شەشىپ, جاستاردى باسپانامەن قامتۋ جايى. تالدىقورعان قالاسىنان اشىلاتىن ستۋدەنتتەر ءۇيىنىڭ قۇرىلىسىنا باسا نازار اۋدارىپ, بارلىق تالاپقا ساي بولۋىن ۇنەمى نازاردا ۇستاپ وتىردىم. بۇل جەردە تەك جاتىن ورىن عانا ەمەس, جاستاردىڭ ومىرىنە قاجەتتى زامانعا لايىق جاعداي جاساۋدى ماقسات ەتتىك, – دەيدى وبلىس اكىمى اماندىق باتالوۆ ءوز ويىمەن بولىسكەندە.
جاستار دەمەكشى, جەتىسۋدا جاڭا بۋىننىڭ جاعدايىنا ەرەكشە كوڭىل ءبولىنىپ وتىر. اسىرەسە جاستاردى جۇمىسپەن قامتۋ ىسىنە باستى نازاردا تۇر. ماسەلەن, «جۇمىسپەن قامتۋدىڭ جول كارتاسى-2020» باعدارلاماسى بويىنشا ەڭبەك نارىعىنداعى سۇرانىستى رەتتەۋ ءۇشىن ايماقتاعى تۇرعىنداردىڭ ءتىزىمى جاسالعان بولاتىن. انىقتالعان 13 334 ادامنىڭ قاتارىندا وتىزعا دەيىنگى 3 228 جۇمىسسىز جاس بار ەكەن. قازىر بۇل جاستاردى جۇمىسپەن قامتۋ ءبىرىنشى كەزەكتە جۇزەگە اسىپ جاتىر.
