تاياۋدا, "ەۆرازيا ينۆەست لتد" كومپانياسى Saubota برەندىمەن قىتايعا, اتاپ ايتقاندا گانسۋ پروۆينتسياسىنداعى لانچجوۋ قالاسىنا تۇيەنىڭ 3,5 توننادان استام قۇرعاق ءسۇتىن جونەلتتى.
"وسىلايشا قازاقستاندىق تاۋاردىڭ قحر-عا ەكسپورتتالۋىنىڭ رەسمي باستاماسى جۇزەگە اسىرىلدى. وسى ءساتتى ءبىز بەس جىل كۇتتىك. قىتاي نارىعىنا كىرۋ وتە قيىن بولعاندىقتان, كوپ جۇمىس جۇرگىزىلدى", – دەدى اتالعان كومپانيانىڭ باسشىسى قادىربەك مەيرامبەكوۆ.
ەسكە سالساق, 2020 جىلدىڭ قاڭتار ايىندا قازاقستاندىق ءۇش كاسىپورىن قحر باس كەدەن باسقارماسىنىڭ يمپورتتاۋشىلار تىزىمىنە ەنگەن ەدى. ولاردىڭ قاتارىندا Saumal برەندى بار "ەۆرازيا ينۆەست لتد" جشس-ءى دە بولدى. جالپى, اتالعان كومپانيانىڭ بيە سۇتىنەن ۇنتاق وندىرەتىن زاۋىتى قاراعاندى وبلىسىندا 2014 جىلدان بەرى جۇمىس ىستەپ كەلەدى. وتكەن جىلى كاسىپورىن Saubota برەندىمەن تۇيەنىڭ قۇرعاق ءسۇتىن شىعارۋدى يگەرگەن بولاتىن. قازىرگى تاڭدا زاۋىت ايىنا ەكى توننا قۇرعاق ءسۇت ءونىمىن وندىرەدى.
"ەۆرازيا ينۆەست لتد" جشس-ءنىڭ باس ديرەكتورى قادىربەك مەيرامبەكوۆ كاسىپورىننىڭ وتكەن جىلى "قورعاس" شەكارا ماڭى ىنتىماقتاستىعى حالىقارالىق ورتالىعىنا 609 ملن تەڭگەگە ءونىم ساتقاندىعىن ءمالىم ەتتى.
"ساتىلىم بيىل دا ارتادى دەپ ۇمىتتەنگەن ەدىك. الايدا, قاڭتار ايىندا شەكارا جابىلدى, «قورعاستىڭ» ساۋدا الاڭى ءالى اشىلعان جوق. سوندىقتان, باسقا جولدى تاڭدادىق تا, ءوندىرىستى سەرتيفيكاتتاپ, رۇقساتتى راسىمدەپ, قازىر قىتايعا ءبىرىنشى پارتيانى جونەلتىپ وتىرمىز", – دەدى ول.
كومپانيانىڭ قىتاي نارىعىنا ىلگەرىلەۋىنە قازاقستان رەسپۋبليكاسى اۋىل شارۋاشىلىق مينيسترلىگى مەن اۋىل شارۋاشىلىق ونىمدەرىن ەكسپورتتاۋشىلار قاۋىمداستىعىنىڭ كومەكتەسكەنىن دە ايتا كەتكەن ءلازىم.
قاراعاندى وبلىسى
