قالا باسشىسى العاش بولىپ قازىبەك بي اتىنداعى №36 جالپى ورتا مەكتەپتە ءجۇرىپ جاتقان كۇردەلى جوندەۋ جۇمىستارىمەن تانىستى. العاش ءبىلىم وشاعىنىڭ ىرگەتاسى 1989 جىلى قالانعان. 1060 ورىندىق ءبىلىم ورداسىندا بۇگىندە "ىنتىماق قۇرىلىس" جشس قۇرىلىس كومپانياسى كۇردەلى جوندەۋ جۇمىستارىن جۇرگىزىپ جاتىر.
قالا اكىمى جوندەۋ جۇمىستارىنىڭ ساپاسىن باقىلاۋ ماقساتىندا ارىقاراي №3 بالالار ەستەتيكالىق ساز مەكتەبىنە باردى. قازىرگى تاڭدا مامىر ايىندا باستالعان كۇردەلى جوندەۋ جۇمىسىنىڭ 30 پايىزى اياقتالعان. بارلىق جۇمىستاردى مەردىگەر جوسپارلانعان كەستەگە سايكەس جاڭا وقۋ جىلىنا دەيىن اياقتاۋى ءتيىس.
سونىمەن قاتار, توزىعى جەتكەن №122 جالپى ورتا مەكتەپكە دە ات باسىن بۇردى. 2 اۋىسىمدا ءبىلىم بەرىپ وتىرعان 620 ورىندى اتالمىش مەكتەپتىڭ كىرپىشى 1984 جىلى قالانعان.
اكىم مەكتەپتەردەگى كۇردەلى جوندەۋ جۇمىستارى كەستەگە سايكەس ءجۇرىپ جاتقانىنا كوز جەتكىزدى. ءبىلىم نىساندارىنداعى جوندەۋ جۇمىستارىنىڭ جاي-جاپسارىمەن تانىسقان مۇرات دۇيسەنبەك ۇلى قۇرىلىستىڭ ساپاسىنا اسا ءمان بەرۋدى, سونداي-اق جۇمىستاردى تەزدەتىپ جاڭا وقۋ جىلىنا دەيىن تولىعىمەن اياقتاۋدى تاپسىردى.
