فوتو: TASS.RU
"وسىدان 75 كۇن بۇرىن ەلدە كوروناۆيرۋس پاندەمياسىنا بايلانىستى ساقتىق شارالارى كۇشەيتىلگەن ەدى. ءبىز قازىر كارانتين رەجيمىنىڭ العاشقى دەڭگەيىنە كوشۋگە دايىنبىز. بۇگىندە ەلىمىزدە ىندەت جۇقتىرعاندار جوق. بىراق ىندەت قاۋپى ءالى دە تولىعىمەن سەيىلدى دەپ ايتا المايمىز. سوندىقتان كەز كەلگەن نارسەگە دايىن بولۋىمىز كەرەك", - دەدى دجاسيندا اردەرن.
ونىڭ ايتۋىنشا, ساقتىق شارالارىنىڭ جاڭا دەڭگەيىنە ءوتۋ كەزىندە قوعامدىق كولىكتەردەگى, تاماقتانۋ ورىندارىنداعى جانە باسقا دا ادام كوپ شوعىرلاناتىن ورىنداردا شەكتەۋلەر الىنادى. قوناقۇيلەر, مەشىتتەر مەن شىركەۋلەر, سپورتتىق كەشەندەر بۇرىنعى جۇمىس قالپىنا قايتا ورالادى.
ەلگە شەتەلدەن كەلۋشىلەرگە ەرەجە ءبىرشاما جەڭىلدەيدى. الايدا پرەمەر-ءمينيستردىڭ ايتۋىنشا, قوناقتار سانى ايتارلىقتاي كوپ بولمايدى. ويتكەنى ءار رۇقسات جەكە قاراستىرىلاتىن بولادى, اسىرەسە, ەلگە "گۋمانيتارلىق سەبەپتەرمەن" كىرەتىندەرگە ارتىقشىلىق بەرىلەدى.
