باتىس قازاقستاندا تاعى ءبىر اۋىل كارانتينگە جابىلدى

- كارانتيندىك شارالاردىڭ جەڭىلدەتىلۋى اۋرۋ سانىن كوبەيتىپ جىبەردى. بۇگىنگە دەيىن باتىس قازاقستان وبلىسىندا كوروناۆيرۋستىڭ 262 وشاعى انىقتالىپ, 818 ادام ۆيرۋس جۇقتىردى. ولاردىڭ ىشىندە 14 جاسقا تولماعان 42 بالا بار. وڭىردە 100 مىڭ تۇرعىنعا شاققاندا اۋرۋ سانى 124,6 ادامنان كەلىپ تۇر, - دەپ مالىمدەدى باتىس قازاقستان وبلىستىق تاۋارلار مەن كورسەتىلەتىن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ.

ەلىمىزدە 3 ماۋسىمنان باستاپ قازاقستان رەسپۋبليكاسى دەنساۋلىق ساقتاۋ مينيسترلىگىنىڭ شەشىمىمەن كوروناۆيرۋس ينفەكتسياسى انىقتالعان ناۋقاستار ەكى توپقا – كوروناۆيرۋس بەلگىلەرى بولعان جانە اۋرۋ بەلگىسى جوق ناۋقاستار بولىپ بولىنگەن بولاتىن. مىنە, 3 ماۋسىمنان باستاپ, وڭىردە اۋرۋ سيمپتومى جوق 166 ناۋقاس تىركەلگەن.

سوڭعى تاۋلىكتە انىقتالعان 13 ناۋقاستىڭ 6-ۋى ۆيرۋستى قارىم-قاتىناستان جۇقتىرعان ەكەن. كوروناۆيرۋس ينفەكتسياسىن جۇقتىرعاندار اقجايىق اۋدانىندا – 5, بوكەي وردا اۋدانىندا – 2, بورلىدە – 15, جاڭاقالادا – 4, جانىبەكتە – 11, بايتەرەكتە – 34, قازتالوۆتا – 1, قاراتوبەدە – 2, سىرىمدا – 12, تاسقالادا – 28, تەرەكتىدە – 20, شىڭعىرلاۋدا – 2, ال ورال قالاسىندا – 633 ادام.

وسى ىندەت باستالعانى 326 ادام ۆيرۋستى وبلىس اۋماعىنان سىرت جەردەن جۇقتىرىپ كەلگەن. سونىڭ ىشىندە رەسەي فەدەراتسياسىنان – 205, اتىراۋ وبلىسىنان – 119, گەرمانيادان – 1, بەلورۋسيادان – 1 ادام اۋرۋ اكەلىپتى.

ال وبلىس ىشىندە ناۋقاستارمەن قارىم-قاتىناس جاساپ, ۆيرۋس جۇقتىرعان ادام سانى – 442. بۇلاردىڭ ىشىندە 106 ادام – مەديتسينا قىزمەتكەرى ەكەن.

بۇعان دەيىن تاسقالا مەن سىرىم اۋداندارىنىڭ ورتالىقتارى, جانىبەك اۋدانىنداعى بورسى مەن قامىستى اۋىلدارى كارانتيندە بولسا, بۇعان قاراتوبە اۋدانىنداعى سارالجىن اۋىلى دا قوسىلدى. قازىر بۇل اۋىلداردا قوزعالىس شەكتەلگەن, تەك كۇندەلىكتى تىرشىلىككە قاجەتتى قىزمەت وكىلدەرى عانا اۋىلعا كىرىپ-شىعا الادى. سونداي-اق وبلىستىڭ باس مەملەكەتتىك سانيتارىنىڭ بۇيرىعىمەن 6 ماۋسىمنان باستاپ تۇرعىندارعا ءوز ۇيىندە وتباسىلىق ءىس-شارالاردى وتكىزۋگە تىيىم سالىندى. ورال قالاسىندا قوعامدىق كولىك تاڭعى ساعات 06.00-دەن 12.00-گە دەيىن, كەشكە ساعات 17.00-دەن 21.00-گە دەيىن عانا قىزمەت كورسەتىپ جاتىر. بازارلاردىڭ دا جۇمىس ۋاقىتى وزگەرىپ, جۇمىس كۇندەرى تۇسكە دەيىن عانا, جۇمادان جەكسەنبىگە دەيىن ساعات 10:00-دەن 16:00-گە دەيىن اشىق بولادى.