قوعام • 08 ماۋسىم، 2020

مينيستر "ديپلوممەن اۋىلعا" باراتىندارعا قانداي جاعداي جاسالىنعانىن ايتتى

955 رەت كورسەتىلدى

"ديپلوممەن اۋىلعا" جوباسى اياسىندا جاستارعا باسپاناعا بيۋدجەتتىك نەسيە تۇرىندە مەملەكەتتىك قولداۋ كورسەتىلەدى. بۇل تۋرالى ۇلتتىق ەكونوميكا ءمينيسترى رۋسلان دالەنوۆ حالىققا ەسەپ بەرۋى كەزدەسۋىندە ايتتى، - دەپ حابارلايدى Egemen.kz ءتىلشىسى.

"جاستاردى اۋىلعا تارتۋ بويىنشا "ديپلوممەن اۋىلعا" جوباسى ىسكە اسىرىلۋدا. بىلتىر 4 مىڭنان استام مامان 1 200 اۋىلدا جۇمىسىن باستادى. بۇل تۇرعىدا مۇعالىمدەر، دارىگەرلەر، مادەنيەت جانە سپورت قىزمەتكەرلەرى، سونداي-اق ۆەتەرينارلار مەن اگرونومدار قامتىلدى. ولار ءۇشىن باسپاناعا بيۋدجەتتىك نەسيە تۇرىندە مەملەكەتتىك قولداۋ كورسەتىلەدى. ونىڭ جوعارى سوماسى جىل سايىن ارتىپ كەلەدى. بۇگىندە ونىڭ كولەمى 4،1 ملن تەڭگەنى قۇرادى. نەسيەلەۋ ستاۆكاسى 15 جىلعا 0،01 پايىزدى قۇرادى. سونىمەن قاتار جوبا اياسىندا كوشەتىندەرگە ارنايى اقى قاراستىرىلعانىن ەسكە سالعىم كەلەدى"، - دەدى مينيستر.

رۋسلان دالەنوۆ سونداي-اق بيىل باسپاناعا بيۋدجەتتىك نەسيە تۇرىندە الەۋمەتتىك قولداۋ شارالارىمەن تاعى دا 5 مىڭ جاس مامان قامتىلاتىنىن جەتكىزدى.

"مەملەكەت باسشىسىنىڭ تاپسىرماسى بويىنشا "جاستار جىلى" اياسىندا قارجىلاندىرۋ كولەمى تورتتەن ءبىر بولىككە ارتىپ، بيىل ونىڭ سوماسى 20 ملرد تەڭگەگە جەتتى"، - دەدى ول.

سوڭعى جاڭالىقتار

ۇقساس جاڭالىقتار