قازىرگى ۋاقىتتا ءۇش جاياۋ شەرۋ ەسەبى قۇرىلدى. اتاپ ايتقاندا, ولاردىڭ ەكەۋى دەسانتتىق–شابۋىلداۋشى اسكەرلەر بولىمشەلەرىنىڭ قۇرامىنان, بىرەۋى قۇرلىق اسكەرلەرى اسكەري ينستيتۋتىنىڭ 3-كۋرس كۋرسانتتارى. 24 ماۋسىمدا پارادقا قانداي ەسەپتەر قاتىساتىنى, 8 ماۋسىمدا وتەتىن سوڭعى دايىندىقتا انىقتالادى.
«بيىل ۇلى وتان سوعىسىنداعى جەڭىس كۇنىنە 75 جىل تولادى. وسى سەبەپتى رەسەي قورعانىس مينيسترلىگى ءبىزدىڭ اسكەرلەردى قىزىل الاڭداعى پارادقا قاتىسۋ ءۇشىن شاقىردى. قۇرلىق اسكەرلەرىنەن ءۇش ەسەپ توپ ءبولىندى. ەسەپتەر وتە جاقسى دايىندالعان. ولار بارلىق سانيتارلىق-گيگيەنالىق تالاپتاردى ساقتايدى. كۇنىنە ءۇش-ءتورت رەت تەمپەراتۋرالارى ولشەنىپ, باسقا دا ماسەلەلەر شەشىلەدى. بىزگە قىزىل الاڭداعى پارادقا قاتىسىپ, ەلىمىزدى كورسەتۋ وتە ماڭىزدى. دايىندىق وتە جاقسى ءجۇرىپ جاتىر», - دەيدى قۇرلىق اسكەرلەرى باس قولباسشىسىنىڭ جاۋىنگەرلىك دايارلىق جونىندەگى ورىنباسارى گەنەرال-مايور داۋلەت وسپانوۆ.
اسكەري قىزمەتشىلەر ءۇشىن ۇلى جەڭىستىڭ قۇرمەتىنە ارنالعان شەرۋگە قاتىسۋ, بۇل جالپى جەڭىس ءۇشىن قاسىق قانى قالعانشا شايقاسقان باتىرلارعا العىس ءبىلدىرۋ جانە قۇرمەت كورسەتۋ مۇمكىندىگى. دايىندىققا قاتىسۋشىلاردىڭ اراسىندا, اتالارى ۇلى وتان سوعىسىنىڭ مايدان دالاسىندا جەڭىس ءۇشىن شايقاسقاندار دا, ماسكەۋدەگى جەڭىستىڭ العاشقى شەرۋىنە قاتىسقاندار دا از ەمەس.
«مەن ۇلى وتان سوعىسىنىڭ ارداگەرى بالعىمباەۆ ايدارباي ناۋرىزباي ۇلىنىڭ نەمەرەسىمىن. دەسانتتىق-شابۋىلداۋشى اسكەرلەرى اراسىنداعى سالتاناتقا قاتىسۋ ءۇشىن قاتاڭ ىرىكتەۋدەن ءوتىپ, ماسكەۋدە وتەتىن ۇلى جەڭىستىڭ 75-جىلدىعىنا ارنالعان شەرۋگە قاتىساتىنىما قۋانىشتىمىن», – دەيدى 35-ءشى گۆارديالىق دەسانت-شابۋىلشى بريگاداسىنىڭ اسكەري قىزمەتشىسى سەرىكبەك بالعىمباەۆ.
دايىندىق كارانتيندىك شارالاردى قاتاڭ ساقتاي وتىرىپ جۇزەگە اسىرىلادى. دەزينفەكتسيالىق-سانيتارلىق رەجيم كۇشەيتىلدى: كۇنىنە كەمىندە ەكى رەت جەكە قۇرامدى مەديتسينالىق تەكسەرۋ, سونداي-اق وڭدەۋ, ىلعالداندىرۋ جانە جەلدەتۋ جۇرگىزىلەدى. پارادقا قاتىساتىن اسكەري قىزمەتشىلەر قالعان جەكە قۇرامنان وقشاۋلانعان, ولارعا بوگدە ادامدار مەن تۋىسقاندارىنىڭ بارۋى شەكتەلگەن.
