اقمولا وڭىرىندە كيىم تىگەتىن 13 جەڭىل ونەركاسىپ بار. Cونىڭ ءبىرى – «AielBrend» اتەلەسى. اتەلەنىڭ تىككەن كيىمدەرىنىڭ ساپاسى كوڭىلگە قونىمدى, باعاسى قولجەتىمدى. ۇيىمداستىرۋشىسى دينارانىڭ ماماندىعى قارجىگەر. بانك سالاسىندا تەك ەسەپ-قيساپپەن اينالىسقان ول جارتى جىل بۇرىن بالا كۇنگى ارمانىن جۇزەگە اسىرماق بولىپتى. وسىلايشا, كاسىپكەرلىككە بەت بۇرعان.
– ەڭ الدىمەن بيزنەس جوبا ازىرلەدىم. ارنايى كۋرسىن وقىدىم. كەيىن «دامۋ» قورىنا كومەك سۇراپ باردىم. ماعان «بيزنەستىڭ جول كارتاسى» باعدارلاماسى اياسىندا 2 ميلليون تەڭگە گرانت راسىمدەدى. قاجەتتى قۇرال-جابدىعىمدى, شيكىزاتتاردى الدىم دا, ءىسىمدى باستاپ كەتتىم, – دەيدى جاس كاسىپكەر دينارا سماعۇلوۆا.
دينارانىڭ ءوزى ءارى ديزاينەر, ءارى كيىم ۇلگىسىن پىشەدى. جانىندا 2 تىگىنشىسى بار. ەلىمىزدەگى بارلىق جەڭىل ونەركاسىپ سالاسىنداعى پروبلەما ونىڭ دا باسىندا بار. ول – شيكىزاتتىڭ سىرتتان يمپورتتالۋى جانە ونىمدەرىن سەرتيفيكاتتاۋدا قيىندىقتار بار.
– ءبىز تەندەر ۇتىسىنا قاتىسقىمىز كەلەدى. وكىنىشكە قاراي, تاۋاردى سەرتيفيكاتتاۋ ماسەلەسىندە قيىندىقتارعا جولىعىپ وتىرمىز. شيكىزات قىمباتقا تۇسەدى. قازاقستاندا ءساندى كيىم ماتاسى وندىرىلمەيدى. ومسك, ماسكەۋ, الماتى, قىتايدان ماتالاردى تاپسىرىسپەن الدىرتامىز, – دەيدى جاس كاسىپكەر دينارا سماعۇلوۆا.
كارانتين كەزىندە كاسىپ توقتاماعان, جاڭا فورماتتا جۇمىس ىستەگەن. تاپسىرىس بەرۋشىلەردىڭ دەنە ولشەمىن ونلاين قابىلداپ, كيىم تىككەن. جولعا قويىلعان ماركەتينگتىڭ ارقاسىندا از ۋاقىتتىڭ ىشىندە تۇراقتى كليەنتتەر بازاسىن قالىپتاستىرعان.
كوكشەتاۋ قالاسى
