زايسان اۋدانى اۋماعىنان ورتا عاسىرلىق قالا جۇرتىنىڭ ورىندارى تابىلدى. ەلدى ەلەڭ ەتكىزەرلىك جاڭالىقتى ەستىگەننەن كەيىن ءبىز قازىر زايساندا جۇرگەن بەلگىلى ارحەولوگ ابدەش تولەۋباەۆتىڭ وزىنە تەلەفون شالدىق.
«قاي كەزەڭ ەكەنى ءالى انىقتالعان جوق. مەرزىمدەۋشى ماتەريالدار شىقسا, قاي كەزەڭگە جاتاتىنىن سوندا ايتا الامىز. بىراق ورتا عاسىرلىق قالا جۇرتى ەكەنى انىق. 5 عاسىر مەن 12 عاسىرعا دەيىنگى ارالىق بولۋى مۇمكىن.
قالا جۇرتى جىڭىشكە وزەنىنىڭ بويى مەن سارجىرا اۋىلىنىڭ ماڭىنان انىقتالدى. جىڭىشكە وزەنىنىڭ بويىندا جەكە-جەكە قۇرىلىس عيماراتتارى كوپ. ءۇستىن قۇم باسىپ, بيىك توبەلەرگە اينالىپ كەتكەن. ولاردىڭ سانى ءبىرشاما. وسى جەردەن تىم الىس ەمەس, سارجىرا دەگەن جەردەن دە قالا جۇرتى تابىلعان. بۇل - كادىمگى قورعاندى-بەكىنىستى قالا. ونىڭ ماڭايىندا ءارتۇرلى قۇرىلىستار بار. بۇل نىسانداردى جاقسىلاپ زەرتتەۋ كەرەك. ەرەكشە اتاپ وتەرلىگى, بۇل - ايگىلى جىبەك جولىنىڭ كىشىگىرىم ءبىر تارماعى. مەن مۇنى بۇرىننان ايتىپ ءجۇرمىن. نەگىزگى جول جوڭعار قاقپاسىنا قاراي كەتەدى. ياعني, جەتىسۋدان باستالادى. ەكىنشى ءبىر تارماعى تارباعاتايدى بوكتەرلەپ, اقسۋات, ودان ارى زايسان, ودان جەمەنەي, قارا ەرتىستىڭ بويىمەن قىتايعا قاراي وتكەن دەپ ويلايمىن. وسى جولدا قالا جۇرتتارى, قونىس ورىندارى تابىلىپ جاتىر» دەيدى ارحەولوگ.
ارحەولوگتىڭ ايتۋىنشا, ەكى قالاشىق ورنىنىڭ ارالىعى ءبىر-بىرىنە جاقىن. شامامەن 25-30 شاقىرىم. «ەكى جەردەن دە قىش قۇمىرالاردىڭ سىنىقتارى تابىلدى. بۇل – تەك جەر ۇستىندەگى ماتەريالدار. ەندى قازبا جۇمىستارىن باستايمىز. بارلىعى سول كەزدە بەلگىلى بولادى» دەيدى ابدەش تولەۋباەۆ.
شىعىس قازاقستان وبلىسى,
زايسان اۋدانى
