ايماقتار • 05 ماۋسىم، 2020

جاڭارۋ دامۋدىڭ داڭعىل جولىنا باستايدى

39 رەت كورسەتىلدى

شىمكەنتتە قوردالانىپ قالعان الەۋمەتتىك ءتۇيىننىڭ ءبىرى – قوعامدىق كولىك ماسەلەسى ەدى. حالقىنىڭ جىلدان-جىلعا كوبەيۋىنە بايلانىستى قالادا بۇرىننان قالىپتاسقان قوعامدىق كولىك جۇيەسى ساپالى قاتىناستى تولىق قامتاماسىز ەتە المايتىن كۇيگە جەتكەن. سونىڭ سالدارىنان شاھارعا قوسىلعان ەلدى مەكەندەر مەن شاعىن اۋدانداردىڭ ءبىرازىنا ءالى كۇنگە دەيىن اۆتوبۋس بارمايدى.

قوعامدىق كولىك جۇيەسىندەگى جاڭعىرۋ

وسى كۇرمەۋى قيىن ماسەلەنى شەشۋ ءۇشىن ءار جىلدارى جەرگىلىكتى اكىمدىك تارا­پىنان بىرقاتار شارۋالار اتقارىلدى. الاي­دا، ءبارىبىر مەگاپوليستىڭ قوعامدىق كولىك­تەرىن جاڭارتىپ، جاڭا باعىتتاردى كوپتەپ اشۋ ءىسى كەشەۋىلدەپ كەلدى.

وسىدان ءبىراز بۇرىن شىمكەنت قالاسى اكىمدىگى شاھارداعى قوعامدىق كولىكتەردە جول ءجۇرۋ اقىسىن ەلەكتروندى فورماتقا كوشىرۋ تۋرالى حابارلاعان بولاتىن. قىتايلىق شاعىن اۆتوبۋستار مەن رەسەيلىك گازەلدەردە قىسىلىپ-قىمتىرىلعان تۇر­عىندار بۇعان ءاۋ باستا سەنىمسىزدىك تانىتتى. ەندى وسى جاڭاشىلدىق اقيقاتقا اي­نالاتىن كۇن الىس ەمەس. بۇل تۋرالى كەيىنىرەك توقتالامىز.

ء يا، قالاداعى قوعامدىق كولىك جۇيەسى سىن كوتەرمەيتىنى راس. الايدا بۇل با­عىتتا جۇمىس مۇلدەم توقتاپ تۇر دەپ تە اي­تا المايمىز. قالاي دەسەك تە، ەسكىرگەن تەحنيكالار كەزەڭ-كەزەڭىمەن جاڭارتىلىپ جاتىر. بۇگىنگى تاڭدا، شاھاردا 78 باعىتتا 25 كولىك كومپانياسى جولاۋشى تاسىمالداۋمەن اينالىسادى. كۇندەلىكتى 1 166 كەستە بويىنشا 1 621 اۆتوبۋس جولاۋشى تاسىمالدايدى. ونىڭ 886-سى ۇلكەن اۆتوبۋس بولسا، 280-ءى شاعىن اۆتوبۋس. سو­نىڭ ىشىندە وسى باعىتتارداعى 1 621 اۆ­توكولىكتىڭ 708-ءنىڭ پايدالانۋ مەرزىمى 7 جىلدان اسىپ كەتكەن، ياعني ءبىرشاما ەسكىرگەن.

1

ەل ۇكىمەتى بەكىتكەن «اۆتوبۋستىق تاسىمالداۋدى دامىتۋدىڭ 2018-2020 جىلدارعا ارنالعان كەشەندى باعدار­لاماcى» نەگىزىندە 2019 جىلى «Shymkent» الەۋمەتتىك-كاسىپكەرلىك كورپوراتسياسى ورتاشا سىيىمدىلىقتى، ديزەل وتىنىمەن جۇرەتىن (ەۆرو V) وتاندىق 300 اۆتوبۋستى ليزينگكە الدى. اۆتوبۋستار «Shymkent Bus» جشس-نا جالعا بە­رىلدى. سونىڭ ناتيجەسىندە قالاداعى جاڭا اۆتوبۋستاردىڭ ۇلەسى 7 پايىزدان 25 پايىزعا دەيىن ارتتى. قوعامدىق كولىك­تەردى جاڭارتۋ ءىسى كەزەڭ-كەزەڭىمەن ىسكە اسى­رىلىپ جاتقانىنىڭ جارقىن ءبىر مىسالى وسى.

سونىمەن قاتار شەتكەرى اۋداندار تۇر­عىندارىنىڭ قاتىناسىن جاقسارتۋ ماقساتىندا الەۋمەتتىك ماڭىزى بار 28 مارشرۋت اشىلدى. بۇل باعىتتار اقجار، اقتاس، شاپىراشتى، وتەمىس، يالتا، جى­لان­بۇزعان، ايناتاس، ابدۋلاباد، دوس­تىق، التىنتوبە، جاڭاتالاپ، كوكبۇلاق جانە باسقا شاعىن اۋداندارعا قاتىنايدى.

بيىل سىيىمدىلىعى ۇلكەن، گازبەن جۇرەتىن وتاندىق 590 اۆتوبۋس الۋ جوس­پارلانىپ وتىرعانىن ايتا كەتەيىك. ياعني جاقىن ارادا قالا ىشىندەگى باعىتتارمەن جۇرەتىن جاڭا اۆتوبۋستاردىڭ ۇلەسى 25-تەن 55 پايىزعا دەيىن ارتاتىن بولادى.

حالىق سانى ارتقان سايىن قالادا قوعامدىق كولىك قاتىناسىنىڭ وزەكتىلىگى دە ارتاتىنى تۇسىنىكتى. بىلتىر شىمكەنتتە جولاۋشىلار كولىگىمەن 1 667،6 ملن جولاۋشى ءجۇرىپتى، بۇل كورسەتكىش 2018 جىل­مەن سالىستىرعاندا جولاۋشىلار تا­سىمالىنىڭ كولەمى 0،2 پايىزعا ارت­قانىن بايقاتادى.

بۇگىنگى تاڭدا «ديسپەتچەرلىك قىزمەت ورتالىعى» قالاداعى مارشرۋتتارعا ديس­پەتچەرلىك قولداۋ كورسەتۋ بويىنشا ما­ڭىزدى جۇمىس اتقارۋدا. نۇر-سۇلتان، الماتى قالالارىنىڭ جانە الەمنىڭ وزگە دە اسەم قالالارىنىڭ قوعامدىق كولىك سالا­سىنداعى وزىق تاجىريبەلەرىن ەنگىزۋ ماق­ساتىندا بيىلدان باستاپ اتالعان ورتا­لىقتى كاسىبي ماماندارمەن جانە ماتە­ريالدىق تۇرعىدا نىعايتۋ جوسپارلانۋدا.

اكىمدىكتىڭ سالالىق باسقارماسى تاراپىنان جولاۋشىلار كولىگىنىڭ قوزعالىسىن باقىلاۋ ءۇشىن قوعامدىق كولىك پورتالى ىسكە قوسىلعانىن دا اتاپ وتكەن ءجون. بۇل پورتال Open API قاعيداتىنا نەگىزدەلگەن جانە ياندەكس سەرۆيسىمەن بىرىكتىرىلگەن، بارلىق دەرەك «ياندەكس.كولىك» قوسىمشاسى ارقىلى بەرىلەدى. ناقتى ءبىر ۋاقىتتا قالا بويىنشا جۇمىسقا جۇمىلدىرىلعان قو­عامدىق كولىكتىڭ جالپى سانى، كۇتكەن اۆتوبۋستىڭ قاي ماڭدا كەلە جاتقانى، ايال­داماعا شامامەن قانشا مينۋتتا كەلەتىنى سىندى اقپاراتتاردى جولاۋشىلار وسى پورتالدان قاراپ الۋىنا بولادى.

تاياۋدا شاھار باسشىسى مۇرات ايتە­نوۆ اكىمدىكتە قوعامدىق كولىك جۇيەسىنە وز­گەرىستەر ەنگىزۋ تۋرالى جيىن وتكىزىپ، ناق­تى جوبا-جوسپارلارىمەن ءبولىستى. ما­ڭىزدى كەزدەسۋدە «Astana LRT» كومپا­نيا­سىنىڭ جاۋاپتى وكىلدەرى قالا باسشىسىنا شىمكەنتتەگى قوعامدىق كولىك كەشە­نىن مودەرنيزاتسيالاۋ بويىنشا جاسالعان تۇجىرىمدامانى تانىستىردى. تۇجىرىمدامادا قاراستىرىلعان جۇ­مىستاردىڭ ءبىر پاراسىنا توقتالا كەتەيىك. جالپى، قوعامدىق كولىكتىڭ جۇ­مى­سىن جاقسارتۋ ءبىر باعىتتان عانا تۇر­مايدى، سوندىقتان قازىرگى تاڭدا سالانى جان-جاقتى دامىتۋ جۇمىستارى كەزەڭ-كەزەڭىمەن جۇرگىزىلۋدە. سول ءۇشىن قوعامدىق كولىكتى جان-جاقتى مودەرنيزاتسيالاۋ، جولاۋشىلاردى تاسىمالداۋ قىزمەتىن جاقسارتۋ، قاۋىپسىزدىكتى قام­تاماسىز ەتۋ، كولىكتىڭ ۇتقىرلىعى كۇشەي­تىلەدى. بيىل قولدانىستاعى مارشرۋت­تار جەلىسى جاڭارتىلىپ، جولاۋشىلار كولىگىن دامىتۋدىڭ كەشەندى كەستەسى ازىرلەندى. ونى قازىرگى تاڭدا «استانا LRT» جشس جۇزەگە اسىرۋدا.

جاڭا جۇيە بويىنشا قوعامدىق كولىك­تەردىڭ جۇمىسى جاقسارىپ، تيىمدىلىگى ارتا­دى. اتاپ ايتقاندا، اۆتوبۋستاردى ءموبيلدى قوسىمشا ارقىلى باقىلاۋعا بولادى، جول اقىسىن ەلەكتروندى تولەۋگە مۇم­كىندىك تۋادى، جاڭا باعىتتار اشىلادى، تسيفر­لى جانە ينتەللەكتۋالدىق جۇيە ەنگىزىلەدى.  

قالا اكىمى مۇرات ايتەنوۆ بۇل تۇجى­رىم­دامانى ماقۇلداپ، جاڭا جۇيەگە كەزەڭ-كەزەڭىمەن كوشۋدى جانە بەلگىلەنگەن مەر­زىمدە اياقتاۋدى تاپسىردى.

– بۇل جۇيە قالا ىشىندە كەپتەلىستىڭ ازايۋىنا، حالىقتىڭ دىتتەگەن جەرىنە تەز جەتۋىنە، قوعامدىق كولىك جۇيەسىندەگى جەم­­قورلىقتىڭ الدىن الۋعا، «Smart city» جۇيەسىنە تەزىرەك كوشۋگە مۇمكىندىك بەرە­دى، – دەدى مۇرات ايتەنوۆ. 

1             

اتالعان تۇجىرىمداما تۇرعىنداردىڭ قاۋىپسىزدىگىن قامتاماسىز ەتۋگە دە ۇلكەن سەپتىگىن تيگىزەتىنىن ايتا كەتكەن ءلازىم. ەندى جۇرگىزۋشىلەر ارنايى كۋرستاردان ءوتىپ، كوندۋكتورلاردىڭ قىزمەتى قاتاڭ تەك­سەرىلەتىن بولادى.

سونداي-اق ديسپەتچەرلىك جۇمىستاردىڭ جولعا قويىلۋىنىڭ ناتيجەسىندە اۆتوبۋس­تار اراسىنداعى جيىلىك ساقتالادى، جۇر­گىزۋشىلەردىڭ ايالداماعا توقتاماي جۇيتكىپ وتە شىعۋىنا جول بەرىلمەيدى. بۇدان بو­لەك، ساۋدا ورتالىقتارى، مەكتەپ جانە باس­قا دا ادامدار كوپ شوعىرلاناتىن جەردەگى ايال­دامالار رەتتەلەدى، شاعىن اۋداندارعا قاتىناۋ جەڭىلدەيدى.

جوعارىدا ايتقانىمىزداي، ەلەكتروندى بيلەت بەرۋ كوپ ۇزاماي ىسكە قوسىلۋعا ءتيىس. قازىرگى تاڭدا ونى «QazSmartTrans» جشس ءوزىنىڭ قاراجاتى ەسەبىنەن جۇ­زە­گە اسىرىپ جاتىر. بۇل جۇيە شىلدە ايى­نىڭ اياعىندا ىسكە قوسىلادى.

جالپى، ەلەكتروندى بيلەتتىڭ ار­تىق­شىلىقتارى از ەمەس. ايتالىق، وسىعان دەيىن جولاۋشىلار تاراپىنان تاسىمالداۋشى كومپانيالارعا قانشا شاعىم ايتىلسا دا، زاڭدى تۇرعىدان بەلگىلى شارا قابىلدانعان وقيعالار از، ونى جۇزەگە اسىراتىن تەتىكتەر قاراستىرىلماعان. جولاۋشىلار شاعىم ايتقان تاسىمالداۋشىلار جاۋاپتى مامانداردىڭ ەسكەرتۋىنەن كەيىن دە جۇمىسىن تۇك بولماعانداي ودان ءارى جالعاستىرا بەرەدى. ال سۋبسيديالاۋ ەنگ­ىزىلىپ، تسيفرلى جۇيەگە بەت بۇرعاننان كەيىن تاسىمالداۋمەن اينالىساتىن كوم­­­­پانيالارعا قويىلاتىن تالاپ تا كۇ­شەي­مەك. ولاردىڭ تاۋلىگىنە قانشا ادام تاسى­­مالداعانىن ارنايى بازا ارقىلى باقى­لاپ، جولاۋشىلار تاسىمالى تاراپىنان ءتۇسىپ جاتقان تابىس ءادىل، انىق ەسەپ­تەلمەك.

ەگەر جولاۋشىلاردى تاسىمالدايتىن كولىك­تەر سۋبسيديالانباسا، وندا قو­عام­دىق كولىك جۇيەسىن جاڭعىرتۋدى جۇزەگە اسى­رۋ مۇمكىن ەمەس دەۋگە بولادى. قالا اكىمى­نىڭ وسى جۇمىسقا جاۋاپتى ورىن­باسا­رى ماحسۇت يساحوۆ پىكىرىمەن بولىس­كەن ەدى.

– جولاۋشى تاسىمالداۋشى كومپانيا­لار قانشا تابىس تاباتىنىن بىلمەيمىز. كەزىندە وسى جاڭا جۇيەنى الماتى قالا­سىندا ىسكە قوسقاندا، بيۋدجەتكە تۇسەتىن سالىق كولەمى ءبىر جىلدا 1،2 ەسەگە دەيىن ارت­قانى انىقتالدى. حالىقتىڭ ەلەكتروندى تولەمگە قىزىعۋشىلىعىن ارتتىرۋ جانە ىڭعايلى بولۋى ءۇشىن ءبىر ەرەكشەلىك قاراستىرىلعان. ماسەلەن، كارتامەن تولەيتىندەر ءۇشىن جولاقى 70 تەڭگە بولسا، قولما-قول اقشامەن 100 تەڭگە تولەيدى. ەلەكتروندى تۇردە تولەۋدىڭ دە جەڭىلدىكتەرى قاراستىرىلعان، – دەدى ول.

كولىك كارتاسىنىڭ باعاسى – 500 تەڭگە. ونىڭ 4 ءتۇرى بار: جالپى پايدالا­ناتىن كارتا، وقۋشىلاردىڭ كارتاسى، ستۋدەنتتىك كارتا جانە تەگىن ءجۇرۋ كارتاسى. وسى جۇيەنى ەنگىزۋدى قولعا العان «QazSmartTrans» جشس كارتانى ەكىنشى دۇنيەجۇزىلىك سوعىس ارداگەرلەرىنە، «ەرەن ەڭبەگى ءۇشىن» مەدالىمەن ماراپات­تالعان تىل ەڭبەككەرلەرىنە، «باتىر انا»، «التىن القا»، «كۇمىس القا» توس­بەل­گىلەرىمەن مارا­پاتتالعاندارعا مەن ءى توپتاعى زاعيپ جاندارعا تەگىن تاراتادى. ەلەكتروندى جۇيەنىڭ جولاۋشىلارعا ءتيىمدى تاعى ءبىر تۇسىن ايتا كەتەيىك. جولاۋشى دىتتەگەن جەرىنە جەتۋ ءۇشىن ەكى اۆتوبۋسقا وتىرۋى قاجەت دەلىك. كارتاسى بار ادامدار ءبىر اۆتوبۋستان ەكىنشىسىنە 40 مينۋت ىشىندە اۋىسىپ مىنەتىن بولسا، ەكىنشى مارتە جولاقى تولەمەيدى. 40 مينۋتتىق مەجەنى 1 ساعاتقا دەيىن ۇزارتۋ قازىر تالقىلانىپ جاتىر.

 

ءوندىرىس ءورىسى كەڭەيىپ كەلەدى

سوڭعى جىلدارى مەگاپوليستە ونەر­كاسىپ سالاسى قارقىندى دامىپ كەلەدى. ونەركاسىپ ءونىمىنىڭ كولەمى 2019 جىلى 562،3 ملرد تەڭگەنى قۇراپ، 2018 جىلمەن سالىستىرعاندا 15 پايىزعا ارتقانى وسى­نىڭ ءبىر كورىنىسى دەۋگە بولادى. اتال­­عان سالاداعى ۇلەسى 85،7 پايىزدى قۇرايتىن وڭدەۋ ونەركاسىبىندە 481،8 ملرد تەڭگەنىڭ ءونىمى ءوندىرىلىپ، ءوسىم 13،9 پايىز­عا ارتقانىن دا ايتا كەتەيىك.

جۋىردا شاھار اكىمى مۇرات ايتەنوۆ وسى وڭدەۋ ونەركاسىبىندەگى جەتەكشى «وڭتۇستىك» يندۋستريالىق ايماعىنا با­رىپ، بىرقاتار كاسىپورىنداردىڭ جۇمى­سىمەن تانىستى. ونداعى كاسىپكەرلەرگە مەملەكەت تاراپىنان كورسەتىلەتىن قولداۋ­لاردى اتاپ ءوتىپ، ىسكەر ازاماتتارمەن پىكىر الماستى.

2019 جىلى اتالعان يندۋستريالىق اي­ماقتا قۇنى 974 ملن تەڭگەگە 3 جوبا ىسكە قوسىلدى. «تاسساي» يندۋستريالىق ايماعىندا 23،1 ملرد تەڭگەنى قۇرايتىن 6 جوبا ىسكە قوسىلدى، 312 جاڭا جۇمىس ورنى اشىلدى. ايماقتارداعى جەر تەلىمدەرى 100 پايىز جوبالارعا تولىپ، ءارى قاراي دامىتۋ ماقساتىندا 306 گەكتار جەرگە جاڭا «جۇلدىز» يندۋستريالىق ايماعىن قۇرۋ جۇمىستارى باستالدى.

بۇگىنگى تاڭدا 306 گەكتار جەر تەلىمىن مەملەكەتتىڭ قاراماعىنا بەرۋ بو­يىن­شا جۇمىستار جۇرگىزىلۋدە. جاڭا ين­دۋستريالىق ايماقتىڭ ينفراقۇرىلىم جۇيەسى 2 كەزەڭدە جۇرگىزىلمەك. ءى كەزەڭدە – 76 گەكتار (2020-2021 جىلدارى)، ءىى كەزەڭ­دە – 230 گەكتار جەر (2021-2022 جىل­دارى) جاڭا جوبالارعا بەرىلەدى. سونى­مەن قاتار ايماقتىڭ تەحنيكا-ەكونو­ميكالىق نەگىزدەمەسى ازىرلەنۋدە. بۇل جەردە نەگىزىنەن قۇرىلىس، مەتاللۋرگيا جانە جيھاز ونەركاسىبىن دامىتۋ كوزدەلگەن.

كاسىپورىندار ەكونوميكانى ءارتاراپ­تاندىرۋ ىسىندە تىرەك كۇشكە اينالۋ كەرەك ەكەنىن ايتقان قالا باسشىسى ءوندىرىلىپ جاتقان ءونىمنىڭ ەكسپورتىن ارتتىرۋعا باسىمدىق بەرۋدى اتاپ ءوتتى. سونىمەن قاتار ءوندىرىس كولەمىن ۇلعايتۋعا جانە كاسىپ­كەرلىكتىڭ دامۋ باعىتىنا قاتىستى بىرقاتار ناقتى تاپسىرمالار جۇكتەدى.

يندۋستريالىق ايماققا بارعان قالا باسشىسى «شىمكەنت تەمiر» جشس-نىڭ بولات قۇيۋ زاۋىتىنىڭ جۇمىسىمەن تانىس­تى. 2018 جىلى iسكە قوسىلعان ءوندiرiستiڭ جالپى قۇنى – 5،9 ملرد تەڭگە. جىلىنا 250 مىڭ توننا ءونiم شىعارۋعا قاۋقارلى كاسiپورىندا 300-گە جۋىق ادام جۇمىسپەن قامتىلعان. زاۋىت تمد ەلدەرiندە بالاماسى جوق، زاماناۋي قۇرىلعىلارمەن جابدىقتالعان. ءوندىرىس وشاعى تولىقتاي قۋاتىنا كوشكەن كەزدە جىلىنا 1 ملن توننا ءونiم شىعارادى، 2100 ادام جۇمىسپەن قامتىلادى دەپ كۇتىلۋدە.

اكىم تانىسقان تاعى ءبىر نىسان – «Ferrum-Vtor» جشس-نىڭ بولات قۇيۋ تسە­حى. جوبانىڭ قۇنى 1 ملرد 244 ملن تەڭ­گەنى قۇرايدى، وندا 235 ازامات جۇمىس­پەن قامتىلعان. مۇندا ەۋروپالىق ستاندارت­تارعا ساي جانە باعا جاعىنان ءتيىمدى توت باسپايتىن بولات مەتالل شىعارىلادى.

بۇدان بولەك، مۇرات ايتەنوۆ اليۋميني سىم شىعاراتىن تسەحىن، بەتون قۇرىلىس ماتەريالدارىن وندىرەتىن كاسىپ­ورىنداردى ارالاپ كوردى. ايتا كەتەيىك، «وڭتۇستىك» يندۋستريالىق ايماعىندا وسىعان دەيىن جالپى قۇنى 41 ملرد تەڭگە بولاتىن 66 جوبا جۇزەگە اسىرىلىپ، 4 مىڭنان استام جۇمىس ورنى قۇرىلعان.

«وڭتۇستىك» ارنايى ەكونوميكالىق ايما­عىندا ورنالاسقان تاعى ءبىر ءىرى كاسىپ­ورىن – «اگف گرۋپپ» تىگىن فابريكاسى. اتالعان مەكەمە 1،5 ملن-عا جۋىق ءونىمدى ەكسپورتقا شىعاراتىنىن ايتا كەتكەن ءجون. فابريكا رەسەيلىك IKEA كومپانياسىنىڭ دۇكەندەرىنە توسەك جابدىقتارىن تىگۋدە. جە­ڭىل ونەركاسىپ سالاسىندا 10 جىلدان اسا تابىس تاۋىپ جۇرگەن كومپانيا ەكس­پورتقا شىعاراتىن ءونىم كولەمىن جىل سا­ناپ ارتتىرا تۇسۋدە.

2013 جىلى ءوز ونىمدەرىن ەكسپورتتاي باستاعان كومپانيا جاساندى ەمەس ماتا شىعارادى، تابيعي ماتەريالدان كومبينەزون، مەكتەپ فورماسى، اسكەري كيىمدەر مەن حالات تىگەدى. ايماقتاعى توسەنىشتەر، جاس­تىقتار مەن كورپەلەر وندىرەتىن ەڭ ءىرى تىگىن فابريكاسى وسى – «اگف گرۋپپ».

بۇل كاسىپورىن زاماناۋي ۇلگىدەگى تىگىن ماشينالارىمەن، جاپون جانە الەمدىك برەندتەردىڭ ۇتىكتەۋ جانە كەسۋ قۇرىل­عىلارىمەن جابدىقتالعان. قازىر كومپانيانى ەكسپورتقا باعدارلانعان دەپ اتاۋعا بولادى. سەبەبى، وندىرىلگەن ونىمدەردىڭ 90 پايىزى شەتەلدىك تۇتىنۋ­شىلارعا جولدانادى.

ەلىمىزدە توتەنشە جاعداي جاريالا­نىپ، كارانتين رەجىمى ەنگىزىلگەن سوڭ ماس­كا تاپشىلىعىن بايقاعان كاسىپورىن بەتپەر­دە تىگۋمەن اينالىسىپ، ەلدىڭ سۇرا­نىسىن وتەگەنىن اتاپ وتكەن ءلازىم. كاران­­تين كەزىندە كومپانيا تۇرعىندارعا 3 مىڭ­نان اسا ماسكانى تەگىن تاراتتى. تىگىن فابريكاسىنىڭ باسشىسى گاۋ­حار ناسىروۆانىڭ ايتۋىنشا، كومپانيا­نىڭ جۇمىسى نەگىزىنەن توسەك-ورىن جاب­­­دىق­تارى مەن كيىمدەر شىعارۋعا باعىت­­­تالعان. وتكەن جىلى بۇل فابريكا «قازاق­­ستاننىڭ ۇزدىك تاۋارى» كورمە-بايقاۋىندا «حالىققا ارنالعان ۇزدىك تاۋارلار» نوميناتسياسىن جەڭىپ الدى.

بۇگىندە ەلىمىزدە جەڭىل ونەركاسىپ سالاسى ورگە باسقانىمەن، توقىما ءوندىرىسى­نىڭ ادىمى وتە باياۋ. «وڭتۇستىك» ارنا­يى ەكونوميكالىق ايماعىندا توقىما وندىرى­سىنە قاجەت ءجىپ ءيىرۋ، كيىم تىگۋ، وڭدەۋ جۇ­مىس­­تارىنىڭ جاڭا تەحنولوگياسى ەنگى­زىلە باستادى.

جالپى، يندۋستريالىق ايماقتا ءىسى ىل­گەرى باسقان كاسىپورىندار كوبەيىپ كە­لەدى. العاشقىدا اسكەري جانە ارنايى كيىم تىگۋمەن اينالىساتىندار كوپ بولدى. رەسەيگە مەكتەپ وقۋشىلارىنىڭ كيىم­دەرىن ەكسپورتتادى. بەرتىن كەلە فا­بري­كا تابيعي شيكىزات – تۇيە جۇنىنەن، قوي جۇنى­نەن جاسال­عان كورپە-توسەك بۇيىم­دارىن تىگۋگە كىرىستى.

– 2016 جىلدان باستاپ، ءبىزىدىڭ مەكەمە شۆەتسيالىق «يكەيا» كومپونياسى­مەن بىرلەسىپ جۇمىس ىستەي باستادى. ءونى­مىمىزدىڭ 99 پايىزى رەسەيگە، ەۋروپاعا جى­بەرىلەدى. ءوزىمىزدىڭ برەندتى شىعارۋ جۇمى­سىمەن اينالىستىق. قازىر «ارۋا»، جانە «سۋاف» دەگەن ەكى برەندىمىز بار، – دەيد­ى كاسىپورىن ديرەكتورىنىڭ ورىنباسارى شولپان ورازوۆا.

بۇگىندە شىمكەنتتەگى كاسىپورىن قا­زاق­ستان بويىنشا كونۆەيەرلىك اعىندا قول­دانبالى ماتەريالدار شىعاراتىن ەڭ ءىرى تىگىن فابريكالارىنىڭ ءبىرى سانا­لادى. كاسىپورىندا 250 ادام جۇمىس ىستەي­دى. ءبارىنىڭ تاجىريبەسى مول، كاسىبي شەبەر­لىك­تەرى شىڭدالعان. كەلەشەكتە ماقتا كلاس­تەرىن دامىتۋ ارقىلى توقىما ونەر­كاسى­بىن جەتەكشى سالاعا اينالدىرساق دەگەن ماقساتى بار.

 – حالىققا ساپالى، قولايلى، باعاسى قولجەتىمدى بۇيىم شىعارۋ ءۇشىن بىزدە كوپ جاعداي جاسالعان. كيىمدى ءپىشۋ، تىگۋ، ساراپتاما، جيناقتاۋ وپەراتسيالارىنىڭ ارقايسىسىنىڭ ساپا تالاپتارى بولادى، – دەيدى تەحنولوگ ءاليما سەرىك.

كاسىپورىن تولىقتاي شۆەتسيانىڭ وزىق ۇلگىدەگى تەحنولوگياسىمەن جابدىق­تالعان. سوعان ساي ءونىم كولەمى 3 ەسەگە ارتىپ وتىر. فابريكا الداعى جىلى تاعى ءبىر ءوندىرىس تسەحىن اشۋدى جوسپارلاۋدا.

 

شىمكەنت

 

سوڭعى جاڭالىقتار

ۇقساس جاڭالىقتار