قوعام • 04 ماۋسىم، 2020

بوياۋ قولدانبايتىن سۋرەتشى

126 رەت كورسەتىلدى

سۋرەتكە ەرەكشە ءومىر سىيلاپ جۇرگەن قانات ءنۇرتازيننىڭ ونەرى شىن مانىندە سۇيسىنۋگە تۇرارلىق. ول جاپىراق، شەگە، گازەت، الما، توساپ، بانان، راۋشان، گيپس، كوفە مەن قاۋىن بەتىنە ءتۇرلى سۋرەت سالادى. ونەردەن ەرەكشە ورنەك تاپقان ورەننىڭ تالانتى سۇلۋلىققا بەيجاي قارامايتىن كوپ كوڭىلىن ءا دەگەننەن ەلەڭ ەتكىزدى. «قازاقستاننىڭ 100 جاڭا ەسىمى» قاتارىنان جارقىراي كورىنگەن سۋرەت شەبەرى بۇگىندە ىزدەنىسىن جەتىلدىرىپ، بەينەلەۋ ونەرىنىڭ 100 جاڭا ءتاسىلىن تابۋ جولىندا تەر توگىپ ءجۇر.

كوكشەتاۋلىق جاس سۋرەتشى قانات ءنۇرتازيننىڭ ەرەكشەلىگى سول – ول ءوز سۋ­رەتتەرىندە مۇلدەم بوياۋ قولدانبايدى. كەڭىستىكتە كوركەم ونەر تۋدىرىپ، ال كە­نەپتىڭ قانداي كولەمدە بولاتىنىنا الاڭ بولماۋ – اۆتوردىڭ باستى پرينتسيپ­تەرىنىڭ ءبىرى. سۋرەتشى ءۇشىن اعاش، قاعاز، كوفە، فوتوپلەنكا، كينولەنتا، جە­مىس-جي­دەك پەن تەمىر-تەرسەكتىڭ بارلىعى دا ونەر تۋ­دىرۋعا تاماشا قۇرال. جۇمىس­تارىن ار­نايى بوياعىش قۇرال نەمەسە مولبەرت قولدانباي جاسايتىن بىرەگەي تالانت يەسى «سۋ­­رەت  تەك قاعاز بەتىنە سالىنبايدى» دەگەن ۇس­تانىمدا جانە ول ويىن ءاربىر تىڭ تۋىن­دىسىمەن بۇگىندە ءساتتى دالەلدەپ ءجۇر.

1

– مەن ەشقاشان سۋرەتشى بولام دەپ ارمانداعان ادام ەمەسپىن. بالا كۇنىمدە اسكەري ادام بولۋعا قاتتى قۇمارتتىم. ونەرگە دەگەن قىزىعۋشىلىق 2013 جىلدان باستالدى. مالايزيادان وقۋىمدى ءتامامداپ، ديپلوممەن ەلگە ورالعان سوڭ ءبىراز ۋاقىت جۇمىس ىزدەپ ءجۇرىپ قالدىم. سول كەزدە بوس ۋاقىتىم كوپ ەدى. اڭسارىم سۋرەت سالۋعا اۋدى. بىراق كوپ سۋرەتشىلەر سياقتى ەمەس، ەلدى ەلەڭ ەتكىزەر دۇنيە تۋدىرعىم كەلدى. العاشىندا قاتتى قاعازدى تەسىپ سۋرەت سالا باستادىم. قو­لىم جاتتىققان سوڭ، كوڭىلىمدەگى كورىكتى ويلاردى ءجۇزى وتكىر پىشاقپەن ويىپ جاپىراققا ءتۇسىردىم. كەيىنىرەك شاي تۇيىرشىكتەرى، قۇم سياقتى نارسەلەردى دە قيالىمدى جۇزەگە اسىرۋعا پايدالاندىم. ناتيجەسى وزىمە ۇنادى. وسىدان سوڭ بەينەلەۋ ونەرىنىڭ ءتۇرلى ءتاسىلىن ءوز بەتىمشە بايقاپ كوردىم. العاشىندا سۋرەت سالۋعا قاراعاندا كارۆينگ ونەرىنە جاقىن بولدىم. تۇڭعىش تۋىندىم اعاش جاپىراعىنان كەسىلگەن قازاقستان تۋىنىڭ سۇلباسى بولدى. كەيىن مۇنى المادان ويىپ جاساپ كوردىم. ءسويتىپ، ويدان وي، يدەيادان يدەيا تۋىنداي كەلە «سۋرەت سالۋدىڭ 100 جاڭا ءتاسىلى» اتتى جوبانى جۇزەگە اسىرۋدى قولعا الدىم. سول 100 ءتاسىلدىڭ بارلىعىن يگەرگىم كەلەدى. اراسىندا المانى ويىپ سالعان سۋرەتىم، شوكولادقا سالعان سۋرەتىم، جاپىراققا سىزعان بەينەلەر جەلىدە كوپ تاراپ كەتتى. الداعى ۋاقىتتا ماقساتىمدى تولىقتاي باعىندىرسام دەيمىن. سول جولدا ىزدەنىپ ءجۇرمىن»، – دەيدى سۋرەتشى.

ءبىر قىزىعى، قاناتتىڭ بۇل سالادا ارنايى ءبىلىمى دە، ۇستازى دا جوق. سۋرەت – قانات­تىڭ بويىنا تۋمىسىنان دارىعان قابىلەت. مالايزياداعى ازيا-تىنىق مۇحيتى ۋنيۆەرسيتەتىندە حالىقارالىق بيزنەس مەنەدجمەنتى باعدارلاماسى بو­­يىنشا IT-ماماندىقتى مەڭگەرگەن بولاشاق «100 جاڭا ەسىم» جوباسى جەڭىم­پازى­نىڭ اۋەسقوي قىزىعۋشىلىقتان تۋىن­داعان جۇمىستارى قوعامدا ۇلكەن رەزو­نانس تۋدىراتىنىن ءتىپتى دە سەزبەگەن كورىنەدى.

– بىلەسىز بە، جوعارىدا اتاپ وتكە­نىم­دەي، مەن سۋرەت سالۋعا ەشقاشان قىزىققان ەمەسپىن. ءتىپتى وقۋشى كەزىمدە بەينەلەۋ ونەرى ساباعىنىڭ تاپسىرمالارىن ۇلكەن اعام ورىنداپ بەرەتىن. الايدا، بويدا بۇعىپ جاتقان تالانت ءبارىبىر سىرتقا شىقپاي تىنبايدى ەكەن. العاشقى تاجىريبەلىك جۇمىستارىم كوپشىلىك تاراپىنان ۇلكەن قولداۋعا يە بولدى. اسىرەسە سپورت شەبەرى گەننادي گولوۆكين مەن بەلگىلى پروديۋسەر بايان الاگوزوۆانىڭ بەينەسى بەدەرلەنگەن تۋىن­دىلار كوپشىلىك اراسىنا تەز تارادى. كەيىنىرەك باسقا دا سۋرەتتەرىمە سۇرانىس ارتتى. ءبىراز اقپارات اگەنتتىكتەرى جۇ­مىستارىمدى ءوز پورتالدارىندا جاريا­لاپ، الەۋمەتتىك جەلى ارقىلى حالىق جارىسا تاراتىپ اكەت­تى. كەيىنىرەك، ءتىپتى بريتانيا مەن رەسەي جۋرناليستەرى تاراپىنان دا مەنىڭ سۋرەت­تەرىمە دەگەن قىزىعۋشىلىق تۋىنداپ، ارنايى حابارلاستى. ءالى دە شەتەلدىك ماماندار ءجيى تەلەفون شالىپ تۇرادى. راس، مەنىڭ بۇل سالادا ارنايى ءبىلىمىم دە، ءتالىم بەرگەن ۇستازدارىم دا جوق. ءوز بەتىمشە ۇيرەندىم. عالامتوردىڭ كومەگىنە كوپ جۇگىندىم. ايتسە دە، مەنىڭ باستى تا­لىمگەرىم – جۇرەگىم. كوڭىل تۇكپىرىندەگى كوركەمونەرگە دەگەن ىڭكارلىك مەنى وسىلايشا سۋرەت الەمىنە الىپ كەلدى» – دەپ سىر اقتاردى ونەر يەسى.

قاناتتىڭ سۋرەتتەرى كورەر كوزگە قا­لاي كوركەم كورىنسە، ونى تۋدىرۋ دا سون­شالىقتى وڭاي ەمەس. كۇردەلى. بىراق، سوعان قاراماستان قانات  سالعان سۋرەتىنەن اي­رىقشا ءلاززات الادى. قيالىنا ەرىك بەرگەن سايىن جانى راحاتتانىپ، دەمالىپ قالادى. سۋرەتشىنىڭ ايتۋىنشا، ءاربىر جۇمىسى ءوزىنىڭ ەرەكشەلىگىنە ساي ءتۇرلى دەڭگەيدە كۇردەلى. قانات ءۇشىن ەڭ وڭاي ءتا­سىل جاپىراققا ويىپ سالىنعان سۋرەت ەكەن. ەڭ قيىنى – شەگە مەن ءجىپتىڭ كومە­گىمەن سالعان جۇمىستارى. ال الما­عا ويىپ سالىنار ءتۇرلى ورنەكتەر جەدەل­دىلىكتى تالاپ ەتەدى. بۇل تاسىلدە جىلدام­دىقتى باسەڭسىتۋگە بولمايدى ەكەن. ويتكەنى الما ۇزاق ويلانىپ-تولعانۋدى كوتەرمەيدى. قارايىپ كەتىپ، ونەر تۋىندىسى بارلىق اسەمدىگىنەن ايىرىلۋى مۇم­كىن. سوندىقتان دا قانات، اسىرەسە وسى الماعا تۇسىرەتىن سۋرەتتەرىنە ەرەكشە مۇقيات. سالىنعان جۇمىسىن بىردەن فوتو­عا ءتۇسىرىپ الاتىن كورىنەدى.

– مايلى بوياۋمەن كەنەپكە تۇسپەگەننەن كەيىن دە، مەنىڭ سالاتىن سۋرەتتەرىمنىڭ ار­قايسىسىنىڭ ەرەكشەلىگىن ەسكەرە وتىرىپ بەدەرلەۋ ماڭىزدى. سوندىقتان دا كلاسسيكالىق سۋرەتشىلەرمەن سالىستىر­عاندا، مەن ۋاقىتپەن كوبىرەك ساناسامىن. ويتكەنى ءتۇرلى ماتەريالدارعا بەدەر­لەنەتىن بولعاندىقتان، ارقايسىسىنىڭ ەرەكشەلىگىن ەسكەرۋ ماڭىزدى. سونىسىمەن دە ءاربىر سۋرەتىم ايرىقشا شابىت سىيلايدى. جۇمىس ىستەپ وتىرىپ دەمالامىن. قازىرگى تاڭدا ەلىمىزدىڭ جەتەكشى وقۋ ورىندارىنىڭ ءبىرى نازارباەۆ ۋنيۆەر­سيتەتتە قىزمەت ەتەتىن بولعاندىقتان، شەت مەم­لەكەتتەرگە ءجيى ساپارلاپ تۇرامىن. سونداي كەزدەردە شەتەلدىك ازاماتتارعا، ارىپتەستەرىمە كادەسىي رەتىندە ءوزىمنىڭ جۇمىس­تارىمدى سىيعا تارتامىن. بار­لىعى ەرەكشە ىلتيپاتپەن قابىل الادى. قاي جەرگە بارسام دا قازاقستانعا قاتىستى دۇنيە جاسا­عىم كەلەدى. مىسالى، ۆاشينگتوندا ءجۇ­رىپ، الماعا التىن ادامنىڭ سۋرەتىن بەدەر­لەدىم. لوندونعا بارعاندا الماعا كيىز ءۇيدىڭ سۋرەتىن ويىپ سالدىم. سودان كەيىن، سول قالانىڭ كورىكتى جەرىن ارتقى كورىنىس ەتىپ تاڭداپ، ءوزىمنىڭ تۋعان ەلىمنىڭ ءبىر بەينەسىن كادرعا ءتۇسىرىپ الامىن. شەتەلدىكتەر وزدەرىنە تانىس جەردەگى بەيتانىس ەلەمەنتتەرگە قات­تى تاڭعالادى. تەك شەتەلدە ەمەس، قازاقستاننىڭ تۇكپىر-تۇكپىرىنە بارسام دا، تۋعان جەرىمنىڭ تاڭعاجايىپ تابيعاتىن سۋرەت­كە تۇسىرەمىن»، دەيدى جاس تالانت.

مىنە، وسىلاي تۋعان ەلىنىڭ باي جا­دىگەر­لەرى مەن كوركەم قۇندىلىقتارىن، مەم­لەكەتىمىزدىڭ ءراۋىشتى رامىزدەرىن ءوزى­نىڭ قيالى مەن قالامىنان تۋعان ءار جۇمىسى ارقىلى تورتكۇل دۇنيەگە تانى­تىپ، جاھاندىق ارەنادا ايگىلەپ جۇر­گەن دارىندى جىگىتتىڭ بويىندا، جۇرەگىن­دە ۇلتقا، وتانعا دەگەن شەكسىز ماحاببات پەن پاتريوتتىق رۋح شىن مانىندە اس­قاق­تاپ ءھام اتقاقتاپ تۇر. ورە­لى ونەرىمەن ۇنەمى ەلىنىڭ مەرەيىن تاسى­تىپ، ابىرويىن اسقاقتاتىپ ءجۇر. وتان­عا ادال قىزمەت ەتۋدى عۇمىرلىق پارىزى سانايتىن ازاماتتىڭ بۇلاي بۋىر­قانۋى، ىزدەنۋى، جاڭاشىلدىققا ۇم­تىلۋى زاڭدى دا. ويتكەنى، قانات – تاۋەلسىزدىكتىڭ تۇيدەي قۇرداسى. ەگەمەن ەلدە وسكەن ەركىن ويلى ازامات. ول 1991 جىلى سولتۇستىك قازاقستان وبلىسىنىڭ ستەپ­نياك ەلدى مەكەنىندە تۋعان. وتباسىندا ءۇش بالانىڭ كەنجەسى. ەرتەڭىن ەلىمەن ەگىز باي­لانىستىرعان تالانتتى جىگىتتىڭ العا قويعا ماقساتتارى دا ايقىن ءھام اۋقىمدى.

– العا قويىپ وتىرعان ۇلكەن جوس­پارلارىم بار. سونىڭ ءبىرى – «سۋرەت سالۋ­دىڭ 100 جاڭا ءتاسىلى» جوبام اياسىندا بارلىق تۋىندىلارىمدى توپتاستىرىپ، حالىقارالىق دەڭگەيدە اۋقىمدى كورمە ۇيىمداستىرعىم كەلەدى. قازىردىڭ وزىندە سۋرەتكە حوببي رەتىندە ەمەس، تۇبەگەيلى بەت بۇرىپ، كاسىبي تۇردە اينالىسۋدى كوكسەپ ءجۇرمىن. بۇل، ارينە مەنىڭ جەكە پىكىرىم. دەگەنمەن، قازىر ءبىزدىڭ قوعام مۇن­داي ونەردى بەرىلە قابىلداي الماي­تىن سياقتى. بىلەرىم، مەن سالىپ جۇرگەن سۋرەتتەر ساتۋ جاعىنا كەلگەندە وتە جو­عارى سۇرانىسقا يە بولماي وتىر. سون­دىقتان، ونەرىمدى ازىرگە نازارباەۆ ۋنيۆەر­سي­تەتتەگى نە­گىزگى جۇمىسىممەن قاتار الىپ جۇرۋگە ءماجبۇرمىن. بولاشاقتا سۋرەت سالۋ­دىڭ اتالعان ءتاسىلى قاناتىن كەڭگە جايىپ، ۇلكەن سۇرانىستارعا يە بولىپ جاتسا، ءسوزسىز، ويلانباستان ونەر جولىن تاڭدار ەدىم. ويتكەنى ونەرىڭ ارقىلى ەلىڭە قىزمەت ەتىپ جاتقاندىعىڭدى سەزىنۋ­دەن اسقان باقىت جوق. تاۋەلسىزدىكتىڭ ءتول پەرزەنتى رەتىندە بويىمداعى بار تا­لانت-قابىلەتىممەن ەلىمە قالتقىسىز قىز­مەت ەتۋدى – عۇمىرلىق، ازاماتتىق پارى­زىم دەپ بىلەمىن.  «100 جاڭا ەسىم» جوباسىنا قاتىسىپ، جەڭىمپاز اتا­نۋىم دا ماعان وسىنى ايقىن ۇعىندىردى. ۇلكەن جاۋاپكەرشىلىك جۇكتەدى. الداعى شىعار­ماشىلىق ماقسات-ارماندارىما داڭعىل جول اشىپ بەردى دەپ سەنىممەن ايتا الامىن. مەنىڭ ەندىگى تىلەگىم – ەلىم­نىڭ ەر­تەڭى ءۇشىن ايانباي ەڭبەك ەتۋ، ولمەي­تىن ونەر تۋدىرۋ، – دەپ جاس تالانت الىسقا، تىم الىسقا ويلانا كوز تىكتى. قاناتتىڭ وت­تى جانارى مەن نىق شىققان جالىندى ۇنى­نەن ونىڭ ونەرگە عانا ەمەس، وتانعا دەگەن شەكسىز ماحابباتى دا ايقىن كورىنىپ تۇردى. ەندەشە قاناتىڭ تالماسىن، قانات!

 

سوڭعى جاڭالىقتار

الماتىدا ەپيداحۋال كۇردەلەنىپ بارادى

كوروناۆيرۋس • بۇگىن، 11:00

«سارى» ايماقتا تۇركىستان وبلىسى تۇر

كوروناۆيرۋس • بۇگىن، 09:10

كوروناۆيرۋس قايتا كۇشەيدى

كوروناۆيرۋس • بۇگىن، 08:54

وڭتايلىسى – ونلاين وقۋ

ايماقتار • بۇگىن، 08:53

ساپا ارتپايىنشا، سۋبسيديا جوق

ايماقتار • بۇگىن، 08:45

كوروناۆيرۋس قايتا ءورشىدى

الەم • بۇگىن، 08:42

ۆيرۋس جۇقتىرۋ ازايماي تۇر

كوروناۆيرۋس • بۇگىن، 08:30

اسىعىس شەشىم

قازاقستان • بۇگىن، 08:15

كومەك كورسەتىلەدى

قوعام • بۇگىن، 08:10

قور ستراتەگياسى ازىرلەنەدى

قازاقستان • بۇگىن، 08:00

ۇقساس جاڭالىقتار