ابەكەڭ جاستايىنان ات جالىن تارتىپ تۋعان ءوڭىرىنىڭ تۇرمىس تىرشىلىگىنە بەلسەنە ارالاسۋ قامىندا, اسىرەسە ەلىمىزدىڭ وڭتۇستىك وڭىرىندە سۋ شارۋاشىلىعىنىڭ, سۋارمالى جەرلەردە اۋىل شارۋاشىلىعى داقىلدارىن ءوندىرۋدىڭ ماڭىزدىلىعىن ەرتە, بالا كەزىنەن ءتۇسىنىپ ءوستى. ول جىلدارى ايگىلى ءمىرزاشول دالاسىن يگەرۋ, سۋلاندىرۋ جوبالارى مەملەكەتتىك ماڭىزعا يە بولىپ, جاڭا جەرلەردى يگەرۋ باعدارلامالارى جۇزەگە اسىرىلىپ جاتقان كەز ەدى. ءومىر كەڭىستىگىنە قانات قاققان بوزبالا بولاشاعىن وسى ۇلى دۇبىرمەن بايلانىستىرىپ, تاشكەنت قالاسىنداعى بۇكىلوداقتىق سۋ شارۋاشىلىعى ينستيتۋتىنان ءبىلىم الىپ, مەليوراتسيا ينجەنەرى ماماندىعىن يەلەنىپ شىقتى. بىردەن جىلى ورىن ىزدەمەستەن ءوندىرىستىڭ قايناعان قازانىنا, تىكەلەي ءوندىرىس ورنىنا – تاجىريبە جيناقتاپ, كاسىبي مامان رەتىندە شەبەرلىگى شىڭدالىپ, ءتوزىم, مىنەز قالىپتاسىپ, شىنىعاتىن ورتاعا بەتتەپ, قاتارداعى ينجەنەردەن جىلجىمالى مەحانيكالاندىرىلعان كولوننانىڭ باس ينجەنەرى, باستىعى, اۋداندىق سۋ جۇيەسىنىڭ باستىعى قىزمەتتەرىندە ەڭبەك ۇجىمىنىڭ جۇمىسىن ءتيىمدى ۇيىمداستىرا ءبىلۋ مەكتەبىنەن ءوتتى. جۇمىسشىلار, ينجەنەرلەر, جوبالاۋشىلار, ەگىستىك سالالارىنىڭ ماماندارى بىرىككەن دالالىق قۇرىلىس ۇجىمىنىڭ ناتيجەلى جۇمىسقا جۇمىلۋى الدىمەن ءبىرىنشى باسشىنىڭ بىلىكتىلىگى مەن بىلىمدىلىگىنە, ادامدارمەن ءتىل تابىسا الاتىن قابىلەتىنە, ءوندىرىس بولاشاعىن بولجاي الاتىن كورەگەندىگىنە بايلانىستى. «جاس كەلسە – ىسكە» دەمەكشى, ەڭبەك ادامدارىنىڭ ورتاسىندا بىلگىر مامان, ءادىل باسشى, ۇتقىر ۇيىمداستىرۋشى بولىپ تانىلعان ابەكەڭنىڭ جاس شاعىندا ءوندىرىستىڭ تاپتىرماس مەكتەبىنەن ءوتۋى – ونىڭ قۇرىلىس, سۋ شارۋاشىلىعى سالالارىنىڭ جەتەكشىلىگىمەن اۋدان باسشىلىعى, وبلىستا لاۋازىمدى پارتيا قىزمەتتەرىنە جوعارىلاتىلۋىنا نەگىزگى سەبەپ بولدى. ابەكەڭ كەزىندە قازىعۇرت, تولەبي اۋداندارىندا اتقارۋ كەڭەسىنىڭ توراعاسى, اۋداندىق پارتيا كوميتەتتەرىنىڭ ءبىرىنشى حاتشىسى بولىپ جيىرما جىلدان استام ابىرويلى قىزمەت ەتتى. سول قىزمەتتەردە جۇرگەندە اۋدان تۇرعىندارىنىڭ الەۋمەتتىك تۇرمىسىنا قاتىستى ماسەلەلەردى حالىقپەن ىنتىماقتى ءىس بىرىكتىرىپ, قانداي دا كۇردەلى تۇيىندەردىڭ ساتىمەن شەشىلۋىنە باستاماشى بولعانىن ابەكەڭمەن ەڭبەكتەس, ارىپتەس, دوس, سىيلاس بولعان, ول كىسىنىڭ قاجىرلى ىسكەرلىگىن, تاپقىرلىعىن, اقىلگويلىگىن, ادامدار اراسىنداعى ەرەكشە سىيلاستىعىن وڭىرگە, رەسپۋبليكاعا تانىمال كوپ ازاماتتار ابەكەڭنىڭ ومىرىنە ارنالعان ەستەلىك جيناقتا قيماستىقپەن جازىپتى.
ابدىكارىم بەكتاەۆ ءومىرىنىڭ سوڭىنا دەيىن ەل بىرلىگىنە, ىنتىماعىنا, ءوسىپ-وركەندەۋىنە تىنباي, دامىلسىز ەڭبەك ەتتى. بۇكىل بولمىسى, ءجۇرىس-تۇرىسى, سويلەگەن سوزدەرى ەل ىشىندەگى باۋىرمالدىقتى, ەڭبەكقورلىقتى ءوزارا تۇسىنىستىكتى, ادامداردىڭ ءبىرىن-ءبىرى قولداپ, جاس ۇرپاققا جاقسى ءسوز, جاراسىمدى مىنەز, ورەسى بيىك تازالىق كورسەتۋگە پەيىلدەنىپ, جۇمىلاتىن. لاۋازىمدى, رەسمي باسقارۋشى قىزمەتتەردە جۇرگەندە دە, ودان كەيىن زەينەتكە شىققاندا دا, ارداگەرلەر كەڭەسىنىڭ توراعاسى بولعاندا دا حالىقتىڭ قامىن ويلادى. تالاي قينالعان, تارىققان جاندارعا قولۇشىن بەردى, قىسىلعان ادامنىڭ مۇقتاجدىقتان, كىرىپتارلىقتان شىعۋىنا كومەك كورسەتىپ, كەيبىر تاعدىرلاردىڭ تۇيىققا تىرەلۋىنەن ساقتاندىرا الىپ, ەلدىككە تىرەك بولدى.
ابەكەڭ قوعامعا, ەل-جۇرتتىڭ ءومىرىنىڭ جاقسى, جارامدى بولۋىنا مەيلىنشە اتسالىسىپ, قوعامنىڭ باعالاۋىمەن, قۇرمەتىمەن قازىنالى, ءبىلىمدى قارتتىقتىڭ تورىنە شىعىپ ەدى. بويىنداعى قۇرمەتتى ادامعا ءتان بايسالدىلىعى مەن پاراساتتىلىعى, ەل ىشىندەگى ەر قادىرىن, ءسوز قادىرىن بىلەتىندىگى, القالى توپتا اعالىق ءسوز ايتا الاتىن كوپتى كورگەن, كوپ بىلەتىن, ەل تانيتىن, سىيلايتىن, سوزىنە توقتايتىن تۇلعا بولىپ ەدى. اعامىز قاي كەزدە دە, قانداي جاعدايدا دا ەلدىڭ كوكىرەگىندە, كوڭىلىندە تۇرعان كەلەلى ويدىڭ تامىرىن ءدوپ باسىپ, جاعدايدىڭ, تۇسىنىستىكتىڭ ءجونىن ايتاتىن. قىسىر, ۇساق سىپسىڭ اڭگىمەدەن بويىن اۋلاق ۇستاپ, بەكزاتتىعىن ساقتاپ, ازاماتتىقتىڭ, ەلدىكتىڭ, ونەگەلىلىكتىڭ, كىسىلىكتىڭ ۇلگىسىن كورسەتەتىن. ەل ءىشىن, ءارتۇرلى تۇلعالاردىڭ كوڭىل كۇيىن, ونىڭ شىنايى كەلبەتىن بۇرمالاۋسىز, كوزى جەتىپ, كوڭىلى سەنگەنىن ادىلدىكپەن پايىمدايتىن. كەيدە ءتىپتى كوزگە كورىنىپ تۇرعان كەيبىر ادامداردىڭ قىرسىزدىعىن, ءسوزىنىڭ ورىنسىزدىعىن, وعاشتىعىنىڭ تىگىسىن جاتقىزىپ, «جونگە كەلەر», «ادىلدىككە كوزىن جەتكىزەر», «ساباسىنا تۇسەر», «ورىنسىز سويلەگەنىن ءوزى مويىندار» دەگەن سياقتى كىم تۋرالى بولسا دا ءۇمىت ارتىپ, تياناقتايتىن كەشىرىمدىلىگى دە, كەمەڭگەرلىگى دە بار ەدى.
ابەكەڭە ارنالعان ەستەلىكتەر جيناعىندا اعامىزدىڭ اسىل جارى روزا جايلاۋبەكقىزى وتاعاسىمەن بىرگە ەلۋ جىلدان استام ءومىر ءسۇرىپ, ەلگە ۇلگى بولارلىق وتباسىنىڭ شاڭىراعىن بىرگە كوتەرىسكەن باقىتتى ءداۋىرىن بايانداپ, تومەندەگى مىنا سوزدەرگە ايرىقشا ەكپىن بەرىپتى: «ابەكەڭ مىنەزگە باي ازامات ەدى. پايعامبارىمىز: «كوركەم مىنەزدى بولىڭدار» دەگەن عوي. ول شىنىمەن دە كوركەم مىنەزدى ەدى. وتىرعان جەرىندە كىمدى بولسا دا باۋراپ الاتىن. ىستەگەن جاقسىلىعىن ەشقاشان ايتىپ, مىندەت ەتپەيتىن. سوندىقتان دا اللانىڭ سۇيگەن ق ۇلى بولعان شىعار دەپ ويلايمىن. جانىڭ ءجانناتتا بولعاي, اسىل ارىسىم!» (ابدىكارىم بەكتاەۆ. ەستەلىكتەر. 469 بەت).
ايتسا ايتقانداي – ابدىكارىم بەكتاەۆتىڭ ۇلاعاتتى ءومىرى ۇرپاققا مۇرا بولارى ءشۇباسىز.
قۋانىش سۇلتانوۆ,
پارلامەنت ءماجىلىسىنىڭ دەپۋتاتى
