رۋحانيات • 25 مامىر، 2020

«كەدەرگىلەردى جەڭۋ» دەرەكتى ءفيلمى ۇزدىكتەر قاتارىنان كورىنە الا ما؟

20 رەت كورسەتىلدى

رەجيسسەر بانۋ رامازانوۆانىڭ «كەدەرگىلەردى جەڭۋ» دەرەكتى ءفيلمى ءۇش بىردەي بەدەلدى حالىقارالىق فەستيۆالگە قاتىسادى.

مادەنيەت جانە سپورت مينيسترلىگىنىڭ تاپىسىرىسىمەن «قازاقفيلم» كينوستۋدياسىندا تۇسىرىلگەن دەرەكتى ءفيلمنىڭ جەلىسى 1952 جىلى جامبىل ماڭىنداعى لۋگوۆسكوە جىلقى زاۋىتىندا تۋعان كەڭەس زامانىنداعى جىلقى سپورتىنىڭ اڭىزى بولعان «ابسەنت» اقالتەكەسى تۋرالى جانە تاۋەلسىز قازاقستانداعى كونكۋردىڭ جاعدايىن باياندايدى.

– كەدەرگىلەردى جەڭۋ» ءفيلمى مەنىڭ جۇرەگىمدە ەرەكشە ورىن الادى.  تۋىندى دەبيۋتتىك جۇمىسىم بولعاندىقتان عانا ەمەس، ءبىر جىل بويى جۇمىس ىستەگەن ءفيلمنىڭ ارقاسىندا تاماشا ادامدارمەن – ءبىزدىڭ كەيىپكەرلەرىمىزبەن تانىستىعىم ءۇشىن دە ىستىق. ءبىز ولاردىڭ قالاي ات تاڭداعانىنا، جىلقىلار اۋىرعان كەزدە قالاي ۋايىمداعانىنا، ءتورت جىلدان ارتىق وتكىزىلمەگەن قازاقستانداعى الەم كۋبوگىنىڭ كەزەڭىنە دايىندىعىن جانە وزدەرىنىڭ جەتىستىكتەرىنە قالاي قۋانعانىنا كۋا بولدىق»،- دەپ پىكىر بىلدىرگەن فيلم رەجيسسەرى بانۋ رامازانوۆا ءسوزىن ءارى قاراي جالعادى: – بۇگىنگى تاڭدا ءبارىمىز، فيلمدەگىدەي، كوروناۆيرۋستىڭ تارالۋىنا بايلانىستى كەدەرگىلەردى جەڭۋدەمىز. COVID-19 بارلىق سالالاردا، اتاپ ايتقاندا، كينو يندۋسترياعا دا ايتارلىقتاي كەدەرگىلەر تۋدىرۋدا. ءفيلمىمىزدى ۇسىنعان كوپتەگەن فەستيۆالدەر پاندەمياعا بايلانىستى كەيىنگە شەگەرىلدى. بىراق، سوعان قاراماستان، ءبىز بۇل كەدەرگىدەن ءوتىپ، فەستيۆالدەردىڭ نەگىزگى كونكۋرسىنا ىلىندىك. بۇل جولى ءبىز بۇرىنعى ومىرىمىزگە جەڭىمپاز بولىپ ورالامىز»، - دەپ قوستى ءفيلمنىڭ اۆتورى.

دەرەكتى فيلم 2020 جىلى 30-31 مامىردا ستامبۋلدا وتەتىن Anatolia International Film Festival حالىقارالىق كينوفەستيۆالىنىڭ باستى بايقاۋىنا قاتىسادى. دەرەكتى فيلم «ەڭ ۇزدىك دەرەكتى»، «ۇزدىك مۋزىكالىق فيلم» جانە «ۇزدىك رەجيسسەر» اتالىمدارى بويىنشا بايگەگە تۇسەدى.

جىلىنا ەكى رەت وتەتىن كينوبايقاۋ باعدارلاماسىنا قىسقا، تولىقمەتراجدى كوركەم فيلمدەر مەن دەرەكتى فيلمدەر كىرەدى.

فيلم سونىمەن قاتار 2020 جىلعى 1-7 تامىز ارالىعىندا گرەتسيادا وتەتىن  7-ءشى يەراپتەرا حالىقارالىق دەرەكتى فيلمدەر فەستيۆالىنىڭ نەگىزگى كونكۋرستىق باعدارلاماسىندا ۇسىنىلدى. اشىق اسپان استىندا وتەتىن فەستيۆال بۇكىل الەمدەگى دەرەكتى فيلمدەرگە ارنالعان جانە جاس ءارى تاۋەلسىز رەجيسسەرلەردىڭ جۇمىسىن قولدايتىن، ونەردىڭ جەتەكشى ءتۇرى رەتىندە وسى جانردى ناسيحاتتاۋعا ارنالعان. بيىلعى كورسەتىلىم عىلىمي زەرتتەۋلەر مەن يننوۆاتسيالارعا ارنالادى.

23-30 تامىز ارالىعىندا «كەدەرگىلەردى جەڭۋ» كارتيناسى Docs Without Borders Film Festival كينوفەستيۆالىنىڭ نەگىزىگى كونكۋرسىنا قاتىسادى. امەريكاداعى ەڭ ءىرى دەرەكتى فيلمدەر كينوفەستيۆالىنىڭ ءبىرى 23-30 تامىز ارالىعىندا وتەدى.

سوڭعى جاڭالىقتار

ۇقساس جاڭالىقتار