ايماقتار • 21 مامىر، 2020

شىعىس قازاقستان: وسكەمەندە «اباي جانە الەمدىك وركەنيەت» اتتى حالىقارالىق كونفەرەنتسيا ءوتتى

247 رەت كورسەتىلدى

كەيىن بۇكىل ەۆروپا ىزدەپ ءجۇرىپ وقيتىن بولادى.

بۇگىن س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە اباي قۇنانباي ۇلىنىڭ 175 جىلدىعىنا وراي «اباي جانە الەمدىك وركەنيەت» اتتى حالىقارالىق عىلىمي-پراكتيكالىق كونفەرەنتسيا ءوتتى.

تۇركيا، نيدەرلاند، پولشا سياقتى مەملەكەتتەر مەن وتاندىق ابايتانۋ عىلىمىنداعى  بەلگىلى عالىمدار بايانداما جاساعان كونفەرەنتسياعا «Zoom» پلاتفورماسى ارقىلى الىس-جاقىن شەتەلدەر مەن رەسپۋبليكانىڭ تۇكپىر-تۇكپىرىنەن 100-دەن استام عالىمدار، وقىتۋشىلار، جۋرناليستەر، ماگيسترانتتار مەن ستۋدەنتتەر قاتىستى. كونفەرەنتسيانى «ابايتانۋ» عىلىمي-زەرتتەۋ ينستيتۋتىنىڭ ديرەكتورى، پروفەسسور ايجان كارتاەۆا جۇرگىزدى.

م

كونفەرەنتسيانى ۋنيۆەرسيتەت رەكتورى مۇحتار تولەگەن كىرىسپە سوزىمەن اشىپ، ابايتانۋدىڭ بىلگىرى، ايگىلى عالىم مەكەمتاس مىرزاحمەت ۇلىن 90 جاسقا تولعان مەرەيتويىمەن قۇتتىقتاپ، عالىمنىڭ بۇل كونفەرەنتسياعا قاتىسۋى شارانىڭ ءمان-مازمۇنىن ارتتىرا تۇسكەنىن اتاپ ءوتتى. كەلەسى كەزەكتە ءسوز العان مەكەمتاس مىرزاحمەت ۇلى ابايدىڭ باتىسىنان شىعىسى باسىم ەكەندىگىن ناقتى تۇجىرىمدارمەن دالەلدەپ بەرە وتىرىپ اقىننىڭ «تولىق ادام» ىلىمىنە كەڭىنەن توقتالدى. اتالمىش ءىلىمدى مەكتەپتەر مەن جوو-دا وقىتۋعا ارنالعان وقۋلىق جاسالعانىن، ەندى وقىتىلا باستايتىنىن ايتتى. عالىمنىڭ پىكىرىنشە، بۇل ەڭبەكتى تەك قازاق حالقى ەمەس، الدىمەن تۇركى الەمى، كەيىن بۇكىل ەۆروپا ىزدەپ ءجۇرىپ وقيتىن بولادى.

و

بۇدان كەيىن ءسوز كەزەگى تۇركيانىڭ فىرات ۋنيۆەرسيتەتىنىڭ پروفەسسورى ەرجان الكاياعا بەرىلدى. شەتەلدىك عالىم « ۇلى اباي تۇركى الەمىندە» اتتى بايانداماسىندا اباي قۇنانباي ۇلىنىڭ تۇركى الەمى ادەبيەتىندەگى ورنى تۋرالى ءسوز قوزعاي كەلىپ، تۇركياداعى ھاكىم اتىنداعى مەكتەپتەر، كوشەلەر، ساياباقتار مەن ۇلى اقىننىڭ ەسكەرتكىشتەرى، ءومىرى مەن شىعارماشىلىعى تۋرالى جارىق كورگەن كىتاپتار، جازىلعان ديسسەرتاتسيالار مەن ماقالالاردى تانىستىردى.

كونفەرەنتسيادا م.اۋەزوۆ اتىنداعى ادەبيەت جانە ونەر ينستيتۋتىنىڭ ابايتانۋ جانە جاڭا ءداۋىر ادەبيەتى ءبولىمىنىڭ مەڭگەرۋشىسى، پروفەسسور سەرىكقازى قوراباي «عالامدىق مادەنيەت عۇلاماسى» اتتى بايانداماسىن وقىدى. نيدەرلاند ەلىنەن كونفەرەنتسياعا قاتىسىپ وتىرعان «ەۆرازيالىق پەرسپەكتيۆا» كومپانياسىنىڭ پرەزيدەندى، PhD دوكتور، پروفەسسور زيفا مۇراتقىزى اۋەزوۆا اباي ولەڭدەرى مەن اندەرىنىڭ اعىلشىن تىلىنە اۋدارىلۋى جايىن ءسوز ەتتى. عالىمنىڭ ايتۋىنشا، ۇلى اقىن شىعارمالارىن وزگە تىلدەرگە اۋداراردا ورىس تىلىنەن قاراعاندا تۇپنۇسقامەن جۇمىس ىستەۋ ياعني قازاق تىلىندەگى نۇسقاسىن اۋدارۋ ءتيىمدى.

زيفا مۇراتقىزىنان كەيىن پولشانىڭ ۆارشاۆا ۋنيۆەرسيتەتى، ساياسي عىلىمدار جانە حالىقارالىق قاتىناستار فاكۋلتەتىنىڭ دوكتارانتى جاندوس قارىنباەۆ «قۇنانباي اۋلەتى جانە پولياك زيالىلارى: كوپقىرلى بايلانىستاردىڭ جىلناماسىنا شولۋ» اتتى بايانداماسىن ۇسىندى. پولشا ەلىندە قازاقتارعا، سونىڭ ىشىندە شىعىس قازاقستانعا، قۇنانباي اۋلەتىنە قاتىستى جيناقتالعان دەرەكتەر كونفەرەنتسياعا قاتىسۋشىلاردى وزىنە تارتا ءتۇستى.

ودان كەيىنگى كەزەكتە ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق قورىق-مۇراجاي ديرەكتورى تۇردىقۇل شاڭباي «احمەت بايتۇرسىن ۇلىنىڭ ابايتانۋداعى ءرولى» تاقىرىبىندا مازمۇندى بايانداما جاساپ، ءسوزىنىڭ سوڭىندا كونفەرەنتسياعا قاتىسۋشىلاردى مۇراجاي ۇجىمىمەن بىرلەسە جۇمىس جاساۋعا شاقىردى.

سەگىزىنشى ءسوز كەزەگى م.اۋەزوۆ اتىنداعى ادەبيەت جانە ونەر ينستيتۋتى ەجەلگى ءداۋىر جانە تۇركولوگيا ءبولىمىنىڭ مەڭگەرۋشىسى ءتورالى قىدىرعا بەرىلدى. بايانداماشى تىڭدارماندارعا ابايدىڭ شىعىسقا قاتىسى تۋرالى قۇندى دەرەكتەردى تەرەڭىنەن تولعادى. كونفەرەنتسيانىڭ سوڭعى بايانداماشىسى پولشانىڭ ۆارشاۆا ۋنيۆەرسيەتىنىڭ دوكتورانتى سالتانات كۇزەمباەۆا شەت ەلدەردەگى اباي ورتالىقتارىنىنىڭ قازاقستان ءيميدجىن قالىپتاستىرۋداعى رولىنە كەڭىنەن توقتالدى.

داۋلەتبەردى جەكەي ۇلى

 

وسكەمەن

سوڭعى جاڭالىقتار

شىرقاۋ شىڭى شوقاننىڭ

رۋحانيات • كەشە

ۇقساس جاڭالىقتار