حالىقارالىق تۇركى اكادەمياسى تۇركى الەمنىڭ تۇعىرلى تۇلعاسى, ۇلى ويشىل اباي قۇنانباي ۇلىنىڭ 175 جىلدىق مەرەيتويىنا ارنالعان حالىقارالىق «اباي جانە ءححى عاسىر: داۋىرلەر ساباقتاستىعى» اتتى ونلاين كونفەرەنتسيادا اكادەميا باسىپ شىعارعان بىرنەشە جاڭا كىتاپ تانىستىرىلدى. اتاپ ايتقاندا, اباي شىعارمالارىنىڭ تۇرىك تىلىندەگى تولىق جيناعىنىڭ جانە مۇحتار اۋەزوۆتىڭ 2 تومنان تۇراتىن «اباي جولى» رومان-ەپوپەياسىنىڭ جارىققا شىعۋى وقىرمان قاۋىم ءۇشىن ەلەۋلى جاڭالىق ەكەنى ءسوزسىز. بۇل تۋىندىلاردىڭ بارلىعىن تۇركيالىق اۋدارماشى-قالامگەر زافەر كيبار اۋدارعان.
سونىمەن قاتار پروفەسسور نەرگيس بيرايدىڭ جەتەكشىلىگىمەن دانىشپان اقىن تۋرالى تىڭ زەرتتەۋلەر مەن بۇرىن جاريالانباعان قۇندى ماقالالاردان تۇراتىن تۇرىك تىلىندەگى عىلىمي جيناقتىڭ تۇساۋى كەسىلدى. بۇل كولەمدى باسىلىمدى ابايتانۋ سالاسىنا قوسىلعان قوماقتى ەڭبەك رەتىندە اتاپ وتۋگە بولادى. سەبەبى مۇندا باۋىرلاس تۇركى ەلدەرىندەگى تانىمال عالىمداردىڭ ابايدىڭ ءومىرى مەن شىعارماشىلىعىن جان-جاقتى قامتىعان مازمۇندى ماقالالارى توپتاستىرىلعان.
بۇدان بولەك, اباي قۇنانباي ۇلى ولەڭدەرى مەن پوەمالارىنىڭ قىرعىز تىلىندەگى جيناعى دا وقىرمانعا جول تارتتى. بۇعان دەيىن دە ۇلى اقىن شىعارمالارى قىرعىز تىلىنە تارجىمالانعاندار از بولماعان. ال بۇل العاشقى اكادەميالىق باسىلىم بولۋىمەن ماڭىزدى. جيناققا اباي مۇراسىنىڭ ءار جىلداردا اۋدارىلعان تۋىندىلارىنىڭ ەڭ تاڭداۋلىلارى توپتاستىرىلىپ, عىلىمي تۇسىنىكتەمەلەرىمەن بەرىلگەن.
سونداي-اق اباي «قارا سوزدەرىنىڭ» بەلگىلى پۋبليتسيست ايدا ەيۆازوۆا تارجىمالاعان ازەربايجان تىلىندەگى باسىلىمى مەن پرەفەسسور قوزوقبوي يۋلدوشەۆ اۋدارعان وزبەك تىلىندەگى نۇسقالارى قاتىسۋشىلاردىڭ نازارىنا ۇسىنىلدى.
