قازاقستاندىق كاسكادەرلەر Taurus World Stunt Awards جۇلدەسىنەن ۇمىتكەر

كينو • 21 مامىر، 2020

قازاقستاندىق كاسكادەرلەر Taurus World Stunt Awards جۇلدەسىنەن ۇمىتكەر

14 رەت كورسەتىلدى

تانىمال قازاقستاندىق كاسكادەر، قازاقستان رەسپۋبليكاسى ەڭبەك سىڭىرگەن قايراتكەرى جايداربەك كۇنعوجينوۆ جانە ونىڭ Nomad Stunts كومانداسى رەجيسسەر اقان ساتاەۆتىڭ «توميريس» تاريحي فيلمىندە قويعان تريۋكتەرى ءۇشىن Taurus World Stunt Awards جۇلدەسىنە ۇسىنىلدى.

نازەركە جۇماباي

Taurus World Stunt Awards – 2001 جىلدان بەرى لوس-انجەلەستە وتكىزىلەتىن جىل سايىنعى كوركەم فيلمدەردەگى ۇزدىك كورىنىستەرى ءۇشىن الەمنىڭ ۇزدىك تريۋك شەبەرلەرىن ماراپاتتايتىن ءراسىم. بۇل تۋرالى جوبانىڭ رەسمي سايتىندا: «Taurus World Stunt Awards نازارعا ىلىكپەيتىن كينو كەيىپكەرلەرىنە، الەمدەگى ەڭ ۇزدىك تريۋك جاسايتىن ماماندارعا بەرىلەدى. ولار كوپشىلىكتىڭ كوڭىلىنەن شىعاتىن ەڭ باتىل امالداردى ورىنداي وتىرىپ، ءوز ومىرلەرىن قاتەرگە تىگەدى»، – دەپ جازىلعان.

سىيلىق بىرنەشە ساناتتاعى ەڭ ۇزدىك تريۋكتەر ءۇشىن بەرىلەدى. اتاپ ايتار بولساق، ولاردىڭ قاتارىندا: «ورتتەگى ەڭ ۇزدىك تريۋكتەر»، «بيىكتىكتەگى ەڭ ۇزدىك تريۋكتەر»، «كولىكتەرمەن جاسالعان ۇزدىك جۇمىس»، «ۇزدىك جەكپە-جەكتەر كورىنىسى»، «ەڭ ۇزدىك ارنايى تريۋكتەر»، «سوقتىعىسى بار ەڭ ۇزدىك تريۋكتەر»، «ايەلدەر اراسىنداعى ەڭ ۇزدىك تريۋكتەر» جانە تاعى دا باسقا اتالىمدار بار.

مادەنيەت جانە سپورت مينيسترلىگىنىڭ تاپسىرىسى بويىنشا Sataifilm كومپانياسىنىڭ قاتىسۋىمەن «قازاقفيلم» كينوستۋدياسىندا تۇسىرىلگەن «توميريس» كارتيناسى «شەتەلدىك فيلمدە قويىلعان ۇزدىك تريۋكتەر» اتالىمىنداعى ماراپاتتىڭ قىسقا تىزىمىنە ەندى. ايتۋلى بايقاۋدا قازاقستاندىق فيلممەن بىرگە رەسەي، ۋكراينا، يتاليا جانە مىسىر ەلىنىڭ تۋىندىلارى دا باق سىنايدى.

2020 جىلدىڭ 9 مامىرىنا بەلگىلەنگەن ماراپاتتاۋ ءراسىمى كوروناۆيرۋستىق پاندەمياعا بايلانىستى كەيىنگە شەگەرىلىپ وتىر. «جۇلدەگەرلەر ءتىزىمى الداعى ۋاقىتتا مىندەتتى تۇردە جاريالاناتىن بولادى»، دەيدى جوبا ۇيىمداستىرۋشىلارى.