سالىق كودەكسىنە ۇسىنىلاتىن تۇزەتۋلەر قازاقستاندىقتاردىڭ ءومىر ءسۇرۋ ساپاسىنىڭ السىرەۋىنە اكەلىپ سوعادى, دەيدى ءماجىلىس دەپۋتاتى ا.پەرۋاشەۆ.
سالىق كودەكسىنە ۇسىنىلاتىن تۇزەتۋلەر قازاقستاندىقتاردىڭ ءومىر ءسۇرۋ ساپاسىنىڭ السىرەۋىنە اكەلىپ سوعادى, دەيدى ءماجىلىس دەپۋتاتى ا.پەرۋاشەۆ.
مۇنى دەپۋتات ءماجىلىستىڭ سالىق سالۋ ماسەلەلەرى تۋرالى زاڭ جوباسىن تانىستىرۋ بويىنشا وتكەن وتىرىسىندا ايتتى. ەسكەرتە كەتەيىك, ۇكىمەتتىڭ جەكە تۇلعالار پاتەرلەرىنىڭ اۋماعى 150 شارشى مەتردەن, جەر ءۇيلەرىنىڭ كولەمى 300 شارشى مەتردەن اساتىن مەنشىكتەرگە 3 ەسەگە دەيىن سالىقتى كوتەرۋ, «قانشا لاستاساڭ, سونشا تولەيسىڭ» دەگەن قاعيدامەن قۋاتى 3-4 مىڭ تەكشە سم. كولەمنەن اساتىن كولىكتەرگە سالىق ءمولشەرلەمەلەرىن ۇلعايتۋ جانە ت.ب. قاراستىرىپ جاتقانى بەلگىلى.
«نەگە ءسىز تۇرعىن ۇيدە قانشا ادام تۇراتىندىعىنان گورى, تۇرعىلىقتى اۋدانىن عانا ەسەپكە الىپ وتىرسىز؟ – دەدى تانىستىرىلىم بارىسىندا ازات پەرۋاشەۆ ەكونوميكا ءجانە بيۋدجەتتىك جوسپارلاۋ ءمينيسترى ەربولات دوساەۆقا. – 150 شارشى مەتر دەگەن 4-6 بالاسى بار وتباسىعا نە بولادى؟ قازاق وتباسىلارىندا ءۇش ۇرپاق: بالالارى مەن اكە-شەشەسى عانا ەمەس, سونداي-اق, اتا-اجەسى دە بىرگە تۇرا بەرەدى. استانا مەن الماتىدا, وبلىس ورتالىقتارىندا تۋعان-تۋىسقاندارىنىڭ بالالارىنىڭ نە وقۋعا, نە جۇمىس ىستەۋگە كەلەتىندەرى تاعى بار. نەگە وسى ءجايتتى ەسكەرمەيسىزدەر؟ بۇگىندەرى كوپبالالىق ارقىلى دەموگرافيانى قولداۋ كەرەكتىگىن ايتىپ ءجۇرمىز. ولارعا كومەكتەسۋدىڭ ورنىنا, كەرىسىنشە, مۇنداي وتباسىلارعا قالايشا مەنشىك سالىعىن 3 ەسەگە كوبەيتەمىز؟!»
ا.پەرۋاشەۆ مينيسترگە تۇرعىن ءۇي قۇرىلىسىن دامىتۋ مەن ءومىر ءسۇرۋ ستاندارتتارىنىڭ دەڭگەيىن جاقسارتۋ تۋرالى ەلباسىنىڭ تاپسىرمالارىن ەسىنە سالىپ ءوتتى. «ءسىز سا-پالى ءومىر سۇرۋگە ىنتالاندىرۋدىڭ ورنىنا كەدەيشىلىككە يتەرمەلەپ, تۇرعىندارىمىزدى قايتادان «حرۋششەۆكالارعا» تىعۋدى ۇسىنىپ وتىرسىز؟ تۇرعىن ءۇي قۇرىلىسى, جاقسى ۇيگە سۇرانىس – بۇل جۇمىس ورىندارى, بۇل بيۋدجەتكە سالىق ءتۇسىرۋ, بۇل قۇرىلىس ماتەريالدارىن ءوڭدىرۋ. سوندا ءسىز ءىس جۇزىندە وسىلاردى قىسقارتۋدى ۇسىنىپ وتىرعانىڭىزدى ءتۇسىنەسىز بە؟», – دەدى دەپۋتات.
كولىككە سالىناتىن سالىقتى ۇلعايتۋ تۋرالى ازات پەرۋاشەۆ: «بۇل – تىكەلەي رەسەي اۆتوموبيلدەرىنىڭ ءمۇددەسىن قورعاۋ, بىراق ولاردىڭ اتموسفەرانى لاستاۋى ءنولدىڭ شاماسىنداعى 3 ليترلىك «مەرسەدەس» نەمەسە «تويوتالارعا» قاراعاندا كولەمى شاعىن بولعانىمەن, گاز قالدىقتارىن شىعارۋى كوپ», – دەدى. ونىڭ پىكىرىنشە, ۇكىمەت ەكولوگيا ءۇشىن كۇرەس دەگەندى جەلەۋ ەتىپ, رەسەيلىك ءونىمنەن گورى ساپالى زاماناۋي كولىكتەردى ساتىپ الۋشىلارعا ءشۇيلىگۋدە. «ءبىز ونسىز دا سىرتتان كەلەتىن كولىكتەرگە اكەلىم باج سالىعىن وسىردىك. ال ەندى رەسەيدىڭ مۇددەسىن ودان ءارى تىقپالاي بەرمەي, ءوزىمىزدىڭ ازاماتتارىمىزدىڭ ءوز قارجىلارىنا العىسى كەلەتىن تاڭداۋ قۇقىقتارىن نەگە قورعامايمىز», – دەدى دەپۋتات.
ا.پەرۋاشەۆ قوعامدا كەڭ تالقىلانىپ جۇرگەن كولىك سالىعىن ونى جانار-جاعارماي ماتەريالدارى اكتسيزىنە قوسۋعا تولىق اۋىستىراتىن تاجىريبەنى زەرتتەۋگە شاقىردى: «سول كەزدە ءبىز شىنىمەن دە اۋانى لاستايتىن شىعىنى كوپ ەكونوميكالىق ءتيىمسىز قوزعالتقىشى بار اۆتوكولىك يەلەرىن كوپ تولەتۋگە ءماجبۇرلەيمىز», دەدى دەپۋتات وسى ورايدا.
ساۋلەبەك ءبىرجان.
