دەپۋتاتتار تالقىسىنا تۇسكەن بۇل جوبادا قانداي ارتىقشىلىق بار؟ وسى ماسەلەگە توقتالعىم كەلەدى. وتكەن عاسىردىڭ توقسانىنشى جىلدارى ەلىمىز ەگەمەندىككە قول جەتكىزدى. الايدا جەتپىس جىلدان استام ۋاقىت توتاليتارلىق جۇيەنىڭ تاپتاۋرىنىمەن جۇرگەن, ەركىندىككە ەندى عانا بوي ۇيرەتكەن جاس مەملەكەت ءۇشىن بىردەن بالتالاسا بۇزىلمايتىن زاڭ شىعارۋ وڭاي بولعان جوق. ولاردىڭ قاتارىندا وسى ميتينگتەر تۋرالى زاڭناما دا بار. ياعني وسىعان دەيىنگى زاڭدا ميتينگ پەن شەرۋلەرگە, پيكەتتەرگە ءتيىستى مەملەكەتتىك ورگانداردىڭ رۇقساتىن الىپ بارىپ قانا شىعۋعا بولاتىن ەدى. ءتىپتى سول ميتينگتەردى ۇيىمداستىرۋشىنىڭ دا, قاتىسۋشىنىڭ دا قۇقىعى كورسەتىلمەدى. ال تالقىلاۋعا ءتۇسىپ جاتقان زاڭنىڭ جاڭا نۇسقاسىندا الدىڭعى قاتارلى دامىعان ەۋروپالىق ەلدەردىڭ تاجىريبەسى ەسكەرىلىپ وتىر.
وسىلايشا بۇرىنعى زاڭدا كورسەتىلگەندەي مەملەكەتتىك ورگانداردان رۇقسات الۋدىڭ كەرەگى جوق. تەك قانداي دا ءبىر بەيبىت جيىننىڭ وتكىزىلەتىنى تۋرالى حابارلاما جاساۋ قاجەت. ءار ازامات ءوزىنىڭ پىكىرىن, نارازىلىعىن ءبىلدىرۋ ءۇشىن, ميتينگكە شىعىپ, بەيبىت جيىندارعا قاتىسا الادى. الايدا بەلگىلى ءبىر ءتارتىپ تە بولۋى كەرەك. ۇيىمداستىرىلاتىن جيىننىڭ نە ميتينگ, نە شەرۋ, نە بولماسا پيكەت ەكەنىن, ونىڭ نەگىزگى تاقىرىبىن, وعان قاتىساتىن ادامداردىڭ سانىن ايقىنداپ الۋ قاجەت. بەيبىت جيىندى وتكىزۋگە بەل بۋعان تاراپتىڭ جاۋاپتى تۇلعاسى, جيىننىڭ تاقىرىبى مەن وعان قاتىسۋشىلاردىڭ سانى مىندەتتى تۇردە حابارلانۋى ءتيىس. نەگە؟ سەبەبى ءدىني ەكسترەميستىك ۇيىمداردىڭ, توپتاردىڭ, ءبىر جىنىستىلاردىڭ شەرۋلەرى مەن ميتينگتەرىنە جول بەرۋگە بولمايدى دەپ سانايمىن.
بۇل دەگەنىمىز ءبىر عانا جيىنعا قاتىسۋشىلاردىڭ عانا ەمەس, وعان قاتىسپايتىن, جيىن اينالاسىنداعى ادامداردىڭ قۇقىعىن قورعاۋ دەگەن ءسوز. تۇرعىنداردىڭ ءبىر جاققا بارا جاتقان اۆتوبۋسىن, جەڭىل كولىگىن توقتاتىپ قويماۋ ءۇشىن جاسالادى بۇل قادام. سوندىقتان قانداي دا ءبىر ميتينگتەر مەن شەرۋلەرگە, پيكەتتەرگە قاتىسقىسى كەلمەگەن, قاتىسپايتىن تۇرعىنداردىڭ قۇقىعى بۇزىلماۋى, كەدەرگى كەلمەۋى ءۇشىن دە مۇنداي بەيبىت جيىنداردى وتكىزۋگە قالا ورتالىقتارىنان ارنايى ورىندار بەلگىلەنبەك. بۇل دا دۇرىس. سەبەبى وسى ايتىلعان جيىندار كەز كەلگەن ورىنداردا وتكىزىلەتىن بولسا تۇرعىنداردىڭ قالىپتى ءومىرى بۇزىلىپ, داڭعىلدار مەن جولداردى جابۋعا تۋرا كەلەدى. ءتارتىپ ساقشىلارى مەن جەدەل جاردەم, باق وكىلدەرىن شاقىرۋدىڭ قاجەتتىلىگى پايدا بولادى. ال ەگەر زاڭدا كورسەتىلگەندەي ناقتى ءبىر ورنى بولسا, ۇيىمداستىرۋشىلار تاراپىنان حابارلاما كەلىسىمەن بارلىق كەرەك ادامدار سول ورىننان تابىلار ەدى. سوندىقتان تالقىلانىپ جاتقان بۇل زاڭ جوباسىنىڭ بەرەرى مول دەگەن پىكىردەمىن.
سەرىك اقىلباي,
قازاقستان زاڭگەرلەر وداعىنىڭ توراعاسى
