وتكەن جىلدار ەلەسىن جاڭعىرتقاندا وزدەرىنىڭ قالامگەرلىك كاسىبىن سپورت تاقىرىبىندا شىڭداعان تارلانبوز جۋرناليست-جازۋشىلاردىڭ اتى-جوندەرى ءتىل ۇشىنا ورالعان. ءار ءداۋىردىڭ, ءار كەزەڭنىڭ ءوز تۇلعالارى بولادى. وتكەن عاسىردىڭ الپىسىنشى, جەتپىسىنشى جىلدارى ءباسپاسوز بەتتەرىندە بۇرىن-سوڭدى تام-تۇمداپ, ەلەۋسىزدەۋ شالىناتىن سپورتقا ارنالعان ماتەريالدار كوپتەپ كورىنگەن. دودالى جارىستاردىڭ گەوگرافياسى دا كەڭەيىپ, الامان باسەكەلەردە توپ جارعان قازاقستاندىق ساڭلاقتاردىڭ ەسىمدەرى دە ايرىقشا دابىلدى ەستىلە باستاعانى ءمالىم. رەسپۋبليكا مەرەيىن اسقاقتاتقان جۇلدىزدار شوعىرى سپورتتىڭ ءار تۇرىنەن جارقىراپ ەستىلگەندە كوڭىلىمىز تىپتەن شارىقتاپ, شالقىپ كەتەتىن. نامىس قايراعىن جانىعان الەمدىك, حالىقارالىق, وداقتىق, رەسپۋبليكالىق جارىستاردان سۇيىنشىلەپ جەدەل حابار جازعان, جان الىسىپ, جان بەرىسكەن ساتتەردىڭ ىستىق-سۋىعىن سۋرەتتەگەن, مەدالدار ساراپقا سالىنعان مەزەتتەردەگى شايقاستاردان رەپورتاجدار بەرگەن, توپ جارعان ساڭلاقتار تۋرالى تولعاۋلار مەن وچەركتەر تەربەگەن جۋرناليستەر مەن جازۋشىلاردى قۇرمەتپەن ايتار ەدىك. ولار – قالداربەك نايمانباەۆ, سماتبەك تورەبەكوۆ, ومىرزاق جولىمبەتوۆ, سوۆەت شيمانباەۆ, سۇلتانعالي قاراتاەۆ, ءجۇسىپ قيسىموۆ, نەسىپ ءجۇنىسباي, ءدۇرالى دۇيسەباي, قىدىربەك رىسبەك, ەسەي جەڭىس ۇلى, عالىم سۇلەيمەن جانە كەيىنگى تولقىن جاستار. شۇكىر, تولقىننان تولقىنعا, بۋىننان بۋىنعا ۇلاسقان سپورت قالامگەرلەرىنىڭ ساپى سەلدىرەمەي بولاشاققا جالعاسپاق. تاۋەلسىز قازاق ەلىنىڭ سپورتتىق شەجىرەسىن جازاتىن جۋرناليستەرگە جۇكتەلەر مىندەت زور. يگى ءداستۇر ىلگەرى جەتەلەي بەرگەي.
سول سيرەكتەردىڭ سويىنا ءوز باسىم بەلگىلى سپورت قالامگەرى, ءوزىمىزدىڭ وڭداسىن ەلۋبايدىڭ اتى-ءجونىن قوسار ەدىم. ويتكەنى امبەباپ جۋرناليست-جازۋشى قالامىنا ادال, كاسىبىنە ءاماندا اسا قۇرمەتپەن قارايدى, ول بۇگىنگى تاڭدا جەتىنشى اسۋىنا القىنباي, سەرگەك تە قاعىلەز قالپىندا ەمىن-ەركىن كوتەرىلىپ وتىر. ونىڭ جۋرناليستىك ۇزاق جولىن سپورتسىز ەلەستەتۋ ەش مۇمكىن ەمەس. وڭداسىن – تەك سپورت ەمەس, ونەركاسىپ, اۋىل شارۋاشىلىعى, باسقا دا تاقىرىپتارعا قالامىن ەركىن سەرمەگەن, جان-جاقتى جۋرناليست.
ەل گازەتى «ەگەمەنگە» بىزدەن كەيىن كەلىپ, سوڭىمىزدان ەرگەن, اعالارىنىڭ اقىل-كەڭەسىن قۇلاعىنا قۇيىپ, جۋرناليستىك تاجىريبەسىن شىڭداي تۇسكەن وڭداسىن ءىنىمىز اعا گازەتكە كەلگەن كەزدەگى ءساتىن بىلاي دەپ ەسكە الادى.
...1990 جىلدىڭ ساۋىرىندە سول كەزدەگى «سوتسياليستىك قازاقستان» گازەتى باس رەداكتورىنىڭ ءبىرىنشى ورىنباسارى ەرجۇمان سمايىل تەلەفون شالىپ, ءۇش كۇننەن سوڭ الماتىعا جەتۋىمدى, باس رەداكتور شەرحان مۇرتازا قابىلدايتىنىن ايتتى. ول كەزدە وبلىستىق «كوممۋنيزم تۋى» گازەتىندە ونەركاسىپ, قۇرىلىس, ترانسپورت ءبولىمىنىڭ مەڭگەرۋشىسى قىزمەتىن اتقارىپ جۇرگەنمىن. رەسپۋبليكالىق گازەتكە بۇرىندارى دا, الماتى جوعارى پارتيا مەكتەبىنىڭ تىڭداۋشىسى بولىپ جۇرگەنىمدە دە ماقالالارىم ءجيى شىعاتىن. ءتىپتى ءبىر اي ەلىمىزدىڭ باس گازەتىندە تاجىريبەدەن دا وتكەنمىن. گازەتتىڭ مەنشىكتى تىلشىلەر ءبولىمىنىڭ مەڭگەرۋشىسى كەڭەسحان زاكەن, باسقا دا الدىڭعى تولقىن اعالاردىڭ شاراپاتى ءتيىپ اقىرى بۇل قىزمەتكە تاعايىندالدىم. شەرحان اعا قاداۋ-قاداۋ تاپسىرما بەرىپ, وسكەمەننىڭ كۇردەلى ەكولوگياسى, قازاق مەكتەپتەرىنىڭ جاي-كۇيى, باسقا دا ماسەلەلەرگە كوڭىل بولۋگە كەڭەس بەردى.
ەكونوميكا تاقىرىبىنا مەنشىكتى ءتىلشى ءجيى قالام سىلتەپ, پروبلەمالىق ماقالالاردى بەرە باستادى. وڭداسىننىڭ شالعايداعى اۋىلداردان جازعان ماقالالارى كۇن قۇرعاتپاي شىعىپ تۇردى. وسكەمەندەگى قازاق ءتىلىنىڭ حال-احۋالى تۋرالى جازعان «سەگىز كوشە, ءبىر مەكتەپ» دەگەن سىن ماقالاسى دۇربەلەڭ تۋعىزدى. ول ماقالادا 350 مىڭداي تۇرعىنى بار وسكەمەندەگى جالعىز قازاق مەكتەبى تۋرالى ءسوز بولعان. وعان وبلىستىق پارتيا كوميتەتى جاۋاپ قايتاردى.
مىنا ءبىر وقيعا مەنىڭ ەسىمدە قالىپتى.1990-جىلدىڭ 14-ماۋسىمىندا شىعىستىڭ زايسان اۋدانىندا الاپات اپات – قۋاتى سەگىز باللدان اساتىن ءزىلزالا بولدى. شەرحان اعا ءبارىمىزدى ەرتەڭىندە تاڭەرتەڭ جيناپ الىپ, لەزدەمە وتكىزدى. زايسانداعى جەر سىلكىنىسىنىڭ كورشىلەس ءتورت اۋداندا بەس جۇزگە تارتا تۇرعىن ءۇيدى, جۇزدەگەن الەۋمەتتىك نىساندى قيراتىپ كەتكەنىن, ءبىر بالانىڭ قۇلاعان ءۇيىندى استىندا قالىپ, قايتىس بولعانىن تىلگە تيەك ەتىپ, ءبىر كۇندىك جالاقىمىزدى اۋدارۋعا كەلىسىمىمىزدى سۇرادى. مەنشىكتى تىلشىلەر ءبولىمىنىڭ مەڭگەرۋشىسى كەڭەسحان زاكەنوۆكە شىعىستاعى تىلشىگە حابارلاسىپ, كۇن سايىن شۇعىل ماتەريالدار بەرىپ تۇرۋدى جۇكتەدى.
وڭداسىن كۇن سايىن گازەتكە ماقالالار بەرىپ تۇردى. قۇرىلىس ماتەريالدارىن ۇرلاعانداردى سىن تەزىنە الدى, دابىل قاقتى, ەلىمىزدىڭ ءار وبلىسىنان كومەككە كەلگەن قۇرىلىسشىلار تۋرالى رەپورتاجدار, سىن ماقالالاردى ۇيىمداستىردى. ءزىلزالا تاقىرىبى ءتورت جىل بويى ەلىمىزدىڭ باس باسىلىمىندا گازەت بەتىنەن تۇسكەن جوق. سىن ساتتە كومەك قولىن سوزعان ازاماتتار جايلى دا جازۋدى ۇمىتقان جوق. ءزىلزالا اپاتى تولىق جويىلعان سوڭ وڭداسىننىڭ جازعان ماقالالارى قازاقستان جۋرناليستەر وداعىنىڭ ارنايى سىيلىعىنا يە بولدى.
قالامىن قۇلشىنا سەرمەپ كەلە جاتقان وڭداسىن باۋىرىمىزدىڭ تىندىرعان شارۋاسى شاش-ەتەكتەن دەپ قۋانا ايتقىمىز كەلەدى. سپورت شەجىرەسىن, سپورت جىلناماسىن تولتىرۋداعى تىنىمسىز, تولاسسىز ەڭبەگى وراسان وڭداسىن ەلۋباي جۋرناليست رەتىندە قىرۋار قىزمەت ەتتى. كانىگى بالۋانعا وڭى دا ءبىر, سولى دا ءبىر دەمەكشى, ءوز ماماندىعىنىڭ حاس شەبەرى «Egemen Qazaqstan» گازەتىنىڭ مەنشىكتى ءتىلشىسى بولعان شيرەك عاسىر ۋاقتىسىندا بارلىق تاقىرىپتارعا, ونەركاسىپ, اۋىل ءومىرى, رۋحانيات, جەر مەن ءتىل ءتارىزدى الۋان-الۋان تاقىرىپتار توڭىرەگىندە ۇزدىكسىز جازعانى ەسىمىزدە. وتانىمىزدىڭ باس باسىلىمىندا جەمىستى دە جەڭىستى ەڭبەگىمەن دارا كورىنە ءبىلدى. مەرەي مارقايتار مەزەتتە وكشەمىزدەن ەرگەن ءىنى-دوستىڭ ماڭداي تەرىنەن تۋعان كىتاپتاردىڭ اتتارىن اتاي كەتكەن ابزال. ولار: «شىمىر كەلەر شىعىستىڭ ۇل-قىزدارى», «التايىم-التىن تامىرىم», «ايالايىق التايدى», «جۇرەگىمدە جاستىقتىڭ ءىزى قالدى», «جانارىمدا – جاسىل قۇرلىق», «پاريج-سيدنەي: ساڭلاقتار سامعاۋى», «ازياتسكي اككورد ميروۆوگو فۋتبولا», «نا زەملە درەۆنەي ەللادى», «تۋرين تاعىلىمى», «ۋروكي تۋرينا», «الاتاۋدى دۇبىرلەتكەن 11 كۇن» جانە تاعى باسقالار. وڭداسىن جان-جاقتى, فوتوعا ءتۇسىرۋدى دە, ۆيدەوعا ءتۇسىرۋدى دە شەبەر مەڭگەرگەن امبەباپ جۋرناليست. سوندىقتان بولار ونىڭ ءتۇرلى-ءتۇستى سۋرەتتەرمەن كەستەلەنگەن بەس تومدىق, ەل سپورتىنىڭ شەجىرەسىنەن ماعلۇمات بەرەتىن «ايشىلىق الىسقا التى ساپار», «الاشتى اسقاقتاتقان ازيادا», ء«ومىردى سۋرەتپەن ورنەكتەپ», «جەڭىس جالاۋىن جەلبىرەتكەن جەتەۋ» (لوندون وليمپياداسى جايلى), وتكەن جىلى مەملەكەتتىك تاپسىرىسپەن 5 مىڭ دانامەن جارىق كورگەن «دۇنيەنى دۇبىرلەتكەن جەتى دودا» اتتى فوتوالبوم جيناقتارى وقىرماندارىنىڭ ىستىق ىقىلاسىنا يە بولدى. جاقىندا عانا قازاقستان رەسپۋبليكاسى مادەنيەت جانە سپورت مينيسترلىگى سپورت كوميتەتى جاريالاعان سپورت جۋرناليستەرى اراسىنداعى سەيداحمەت بەردىقۇل اتىنداعى سىيلىقتى ەكىنشى مارتە يەلەندى. وڭداسىننىڭ بۇگىنگى كۇنگە دەيىن 21 كىتابى جارىق كوردى. جاقىندا عانا ءوزى قىزمەت ەتەتىن رەسپۋبليكالىق «قازاق سپورتى» گازەتىنىڭ قۇرىلتايشىسى, بەلگىلى قالامگەر-جازۋشى ىرىم كەنەنباي قالامگەردىڭ مەرەيتويىنا وراي ءتۇرلى-ءتۇستى, عۇمىرنامالىق «عۇمىر داستان» اتتى فوتوالبوم كىتابىن شىعارىپ بەردى. مىنە, مارتتىك!
ءوز باسىم بۇگىنگە دەيىن وليمپيادا ويىندارى مەن فۋتبولدان وتكەن الەم چەمپيوناتتارىن كوزبەن كورىپ, جازعان كىتاپتارىنا فوتو سۋرەتتەردى تۇزدىقتاپ, كوز الدىڭا اكەلەتىن بەساسپاپ جۋرناليستەردى سيرەك كەزدەستىرىپپىن. ال وڭداسىننىڭ بۇدان بۇرىن جارىق كورگەن ءتۇرلى-ءتۇستى سۋرەتتەرمەن اسەم بەزەندىرىلگەن, مەملەكەتتىك تاپسىرىسپەن 5 مىڭ دانامەن جارىق كورگەن «دۇنيەنى دۇبىرلەتكەن جەتى دودا» اتتى كىتابى جايلى بەلگىلى سپورت ءجۋرناليسى, ل.ن.گۋميلەۆ اتىنداعى ۇلتتىق ۋنيۆەرسيتەتتىڭ پروفەسسورى, «قازاق سپورتى» گازەتىنىڭ باس رەداكتورى ءدۇرالى دۇيسەباي:
– «الەمنىڭ قاي جەرىندە, قاي تۇكپىرىندە جۇرسە دە اينالاسىنان مەيىر ىزدەيدى, اعايىندارىن ساعىنىپ جۇرەدى. اۋستراليا توپىراعىندا ءجۇرىپ, قىتايدا تۋىپ-وسكەن, بۇگىن سوناۋ يت ارقاسى سيدنەيدە تۇراتىن جانار مۇقانقىزى دەگەن قارىنداسىمىزدى تاۋىپ الادى, اڭگىمەلەسەدى, سوسىن بىزبەن تانىستىرادى. وسىناۋ جاسىل ماتەريككە قازاق قىزىنىڭ اياعى ءتيىپ, تۇرىپ جاتىر دەگەندى ءوز باسىمىز ەستىگەن جوقپىز. بۇل دا ءجۋرناليستىڭ سەزىمتالدىعى, جىلت ەتكەن جاڭالىقتى ءىلىپ الاتىن جانكەشتىلىگى دەپ بىلدىك. ءيا, وڭداسىن ناعىز فانات, جيھانگەز جۋرناليست. ول ءتىپتى سوناۋ افينا وليمپياداسىنا بارار كەزدە ءوزىنىڭ «شوحا» كولىگىن ساتىپ, ەللادا ەلىندەگى سپورت دوداسىنا اتتانعان. سپورت تاقىرىبىنا جارتى عاسىردان بەرى قالام سىلتەپ كەلە جاتقان كەيىپكەرىمىز مۇنىڭ الدىندا ءوزى قاتىسقان جەتى وليمپيادا ويىندارى عانا ەمەس, پاريج بەن كورەيا جانە جاپونيادا فۋتبولدان وتكەن الەم چەمپيوناتتارى, انتالياداعى اۋىر اتلەتيكادان بولعان دۇنيەجۇزىلىك دودادان, الماتى مەن استانادا وتكەن قىسقى ازيا ويىندارى جانە دۇنيەجۇزىلىك ستۋدەنتتەردىڭ ۋنيۆەرسياداسى تۋرالى جازعان البوم كىتاپتارى قالىڭ قاۋىم ىزدەپ ءجۇرىپ وقيتىن قۇندى كىتاپتار», دەپ پىكىر جازىپتى.
وڭداسىنمەن اڭگىمەلەسە قالساڭىز, سپورت الەمىنە سۇڭگىپ كەتكەندەي اسەردە قالاسىز. ول سوناۋ وداق كەزىندەگى, قازىرگى ساتتەگى سپورتتىڭ جاي-كۇيىن شەكىلدەۋىكشە شاعادى. ونىڭ ايتۋىنشا, سپورت تاقىرىبىنا قالام سىلتەپ جۇرگەن ساۋساقپەن سانارلىق جۋرناليستەردىڭ سوڭعى ون جىلدا «ەكىنشى تىنىسى» اشىلعان سىڭايلى. ءالى ەسىمدە دەيدى كەيىپكەرىمىز, 1998 جىلعى پاريجدەگى, 2002 جىلعى كورەيا مەن جاپونياداعى فۋتبولدان وتكەن الەم چەمپيوناتتارىنا نەبارى بەس-التى جۋرناليست بارسا, 2014 جىلى سوچيدەگى اق وليمپياداعا قازاقستاننان ءتورت جۇزدەن استام جانكۇيەر, ونىڭ ىشىندە 43 جۋرناليست ۇكىمەتتىڭ قولداۋىمەن تەگىن بارىپ, جەرلەستەرىمىزدى جان الىسىپ, جان بەرىسكەن دودادا قولدادى, رۋح بەردى. لوندون وليمپياداسىنا دا ونداعان اقپارات قۇرالدارى بارىپ, سپورت ارەنالارىنان رەپورتاجدار ۇيىمداستىردى. مۇنىڭ ءوزى قازاق ەلىنىڭ ەكونوميكاسى دامىپ, كەمەلدەنىپ كەلە جاتقانىن اڭعارتادى.
وڭداسىن باۋىرىمىزدىڭ دوسقا دەگەن ادالدىعى, اقجارقىن مىنەزى, باسقالارعا جاقسىلىق جاساعاسى كەلىپ تۇراتىن اڭقىلداعان قاسيەتى ونى باسقالاردان ەرەكشەلەندىرىپ تۇرادى. ول جيىرما جىل بويى مەنشىكتى تىلشىلەردىڭ «پرەزيدەنتى» بولعان كەزدە ارىپتەستەرىنە قامقورلىعىن اياعان جوق. وتباسىندا قيىن جاعداي بولعاندارعا تىلشىلەردى ۇيىمداستىرىپ, قارجىلاي كومەك كورسەتتى. جاڭادان كەلگەن تىلشىلەرمەن ۇنەمى حابارلاسىپ, اقىل-كەڭەس بەرۋدەن جالىققان جوق. ول شيرەك عاسىر گازەتتىڭ مەنشىكتى ءتىلشىسى قىزمەتىن ابىرويمەن اتقاردى.
– توقسانىنشى جىلى وسى قىزمەتكە كىرىسكەن كەزدە بورانعالي ىرزاباەۆ, مالىك مۇقانوۆ, ەلباسى «پولتورا قازاق» دەپ ات قويعان سەيداحمەت مۇحامەتشين, اماندىق ءابجان, ءامىر ورالباي, باعدات مەكەەۆ, باسقا دا ازاماتتارمەن قويان-قولتىق جۇمىس جاسادىق. ءبىر-بىرىمىزبەن تەلەفون سىمى قىزارعانشا ۇزاق سويلەسەتىنبىز, پىكىر الىساتىنبىز. سول جىلدارى الماتىعا دا جىل سايىن تۇراقتى شاقىرىپ تۇراتىن. ءباسپاسوز سالاسىنا ولشەۋسىز ەڭبەك سىڭىرگەن سول ازاماتتار قازىر ارامىزدا جوق. بۇگىنگى كۇنى مەنشىكتى تىلشىلەر جاسارعان, گازەتكە جاريالانعان ماقالالارىنان تىڭ سەرپىن, جاڭا لەپ, باتىلدىق پەن ىزدەنگىشتىك اڭعارىلادى. ماسەلەن, مەنىڭ ورنىما كەلگەن تالانتتى جۋرناليست دۋمان اناش بۇل كۇندەرى گازەت باس رەداكتورىنىڭ ورىنباسارى قىزمەتىندە. ودان كەيىن شىعىسقا ءتىلشى بولىپ كەلگەن ازامات قاسىمنىڭ ەلىمىزدىڭ باس گازەتىندە كوتەرگەن وزەكتى ماسەلەلەرى پرەزيدەنت ق.توقاەۆتىڭ نازارىنا ىلىگىپ, شەكارالىق اۋداندار پروبلەماسى, بۇقتىرمانىڭ بويىنداعى وزەنگە كوپىر سالۋ شەشىلەتىن بولدى. گازەتتىڭ باسقا تىلشىلەرى دە مىندەتتەرىن ابىرويمەن اتقارىپ كەلەدى. كۇنى كەشە گازەتتىڭ عاسىرلىق مەرەيتويىندا وتانىمىزدىڭ باس باسىلىمىنىڭ تىزگىنىن ابىرويمەن ۇستاپ وتىرعان دارحان قىدىرالى اقپارات ايدىنىندا جەمىستى قىزمەت اتقارىپ كەلە جاتقان جۋرناليستەردى ماراپاتتاپ, ەڭبەكتەرىن لايىقتى باعالاعانىن ۇرپاقتار ۇندەستىگىنىڭ كورىنىسى دەپ تۇسىنگەن ءجون, – دەپ اعىنان جارىلدى ارىپتەسىمىز.
وڭداسىن ەلۋبايدىڭ باسپاسوزدەگى ۇزاق جىلعى ەڭبەگى لايىقتى باعالاندى, «قۇرمەت» وردەنىن, ونعا تارتا مەدالداردى يەلەندى. قارىمدى قالامگەر ارىپتەسىمىز – «قازاقستان رەسپۋبليكاسىنىڭ مادەنيەت قايراتكەرى», «قازاقستاننىڭ قۇرمەتتى سپورت قايراتكەرى», «شىعىس قازاقستان مەملەكەتتىك ۋنيۆەرسيتەتىنىڭ قۇرمەتتى پروفەسسورى», وسكەمەن قالاسىنىڭ, زايسان اۋدانىنىڭ قۇرمەتتى ازاماتى, قازاقستان جازۋشىلار, قازاقستان جۋرناليستەر وداعىنىڭ مۇشەسى.
بۇرىننان ايتىلاتىنداي, سپورت-سەرگەكتىك, باتىلدىق, ەرلىك! سونىڭ ءبارىن كورىپ تاماشالاعان ول تالاي اڭىزعا اينالعان عاجايىپ رەكوردتار مەن جەڭىستەردىڭ كۋاگەرى بولدى. وڭداسىننىڭ وزگە قالامداستارىنان ەرەكشەلىگى – دۇنيەجۇزىنىڭ اتىشۋلى سپورت ارەنالارىندا, ستاديوندارىندا, سپورت سارايلارىندا بولىپ, الەمدىك دەڭگەيدەگى دودالاردى ءوز كوزىمەن كورىپ, ەلگە ورالا سالىسىمەن اسەرىمەن بولىسەدى, گازەتتەرگە ماقالالار جازادى, كىتاپ شىعاردى. قالامىمەن بىرگە فوتووبەكتيۆتى سويلەتىپ, ءوزى تۇسىرگەن بەينەفيلمدەردى كەزدەسۋلەردە جاس ۇرپاققا كورسەتتى. وشپەيتىن بۇل شىعارمالار بۇگىنگى, كەلەشەك ۇرپاققا ونەگەلى مۇرا بولارى داۋسىز. كۇنى ەرتەڭ بەكزات, ەرماحان, باقىت, باحتيارعا ەلىكتەپ, ولاردىڭ دا وليمپ شىڭىنا كوتەرىلۋى عاجاپ ەمەس. بۇگىنگە دەيىن وڭدەكەڭ الەمنىڭ وتىزعا تارتا ەلدەرىنە ساپارلاعان ەكەن. ول قاتىسقان 7 وليمپيادا ويىندارى, 5 الەم چەمپيوناتى, التى ازيا ويىندارى مەن ستۋدەنتتەردىڭ ۋنيۆەرسيادالارى, جۇزدەگەن حالىقارالىق, رەسپۋبليكالىق, وبلىستىق سپورت دودالارى ەسكەرۋسىز قالعان جوق, كەزىندە وقىرماندارى حاباردار بولدى.
جەتى اسقاردىڭ بيىگىنە كوتەرىلگەن وڭداسىنعا ۇزاق عۇمىر, وتباسى باقىتىن, بالالار, نەمەرەلەر مەن شوبەرە قىزىعىنا تويماي قۋانىشقا بولەنە بەرۋىن تىلەيمىز. قابىرعالى قالامگەر, سيقىر ونەردىڭ شىراقشىسى بولىپ كەلە جاتقان باۋىرىمىزدان الداعى ۋاقىتتا دا شىعارماشىلىق تابىس كۇتەمىز!
جانات ەلشىبەك,
جازۋشى, جۋرناليست, حالىقارالىق «الاش» ادەبي سىيلىعىنىڭ لاۋرەاتى, «Egemen Qazaqstan» گازەتىنىڭ ارداگەرى
نۇر-سۇلتان
