ساپار ماقساتى ەلىمىزدى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە ۇسىنۋ ماسەلەسىنە ارنالۋدا
قازاقستان سىرتقى ىستەر ءمينيسترى ەرلان ىدىرىسوۆ بۇۇ باس اسسامبلەياسىنىڭ 68-ءشى سەسسياسىنىڭ تۇراقتى دامۋ جونىندەگى جوعارى دەڭگەيلى ساياسي فورۋمىنىڭ جانە جالپى دەباتتارىنىڭ اشىلۋىنا قاتىستى, دەپ حابارلادى قر ءسىم-ءىنىڭ ءباسپاسوز قىزمەتى.
ساپار ماقساتى ەلىمىزدى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە ۇسىنۋ ماسەلەسىنە ارنالۋدا
قازاقستان سىرتقى ىستەر ءمينيسترى ەرلان ىدىرىسوۆ بۇۇ باس اسسامبلەياسىنىڭ 68-ءشى سەسسياسىنىڭ تۇراقتى دامۋ جونىندەگى جوعارى دەڭگەيلى ساياسي فورۋمىنىڭ جانە جالپى دەباتتارىنىڭ اشىلۋىنا قاتىستى, دەپ حابارلادى قر ءسىم-ءىنىڭ ءباسپاسوز قىزمەتى.
باس اسسامبلەيا سەسسياسىنىڭ الاڭىندا ەرلان ىدىرىسوۆ كاتار ءامىرى شەيح تاميم بەن حاماد ءال تانيمەن كەزدەستى. كەزدەسۋ بارىسىندا اڭگىمەلەسۋشى تاراپتار ەكىجاقتى قارىم-قاتىناستىڭ كەڭ اۋقىمدى ماسەلەلەرىن تالقىعا سالدى. ە.ىدىرىسوۆ ەكى ەل اراسىنداعى ساۋدا-ەكونوميكالىق الەۋەتتىڭ ۇلكەن بولاشاعىن اتاي وتىرىپ, كاتاردى قازاقستاننىڭ اۋىلشارۋاشىلىق, مال ءوسىرۋ, مۇناي-گاز, تاۋ-كەن ءوندىرىسى, سونىمەن قاتار, ينفراقۇرىلىم مەن كولىك سالالارىنداعى يننوۆاتسيالىق جوبالارىن جۇزەگە اسىرۋعا بەلسەندى قاتىسۋعا شاقىردى.
سونداي-اق, قازاقستان سىرتقى ساياسات ۆەدومستۆوسىنىڭ باسشىسى اقش مەملەكەتتىك حاتشىسىنىڭ ءبىرىنشى ورىنباسارى ۋيليام بەرنسپەن كەزدەسۋ وتكىزىپ, ونىڭ بارىسىندا ەكىجاقتى قارىم-قاتىناس, عالامدىق جانە ايماقتىق قاۋىپسىزدىك پەن باسقا دا حالىقارالىق قاتىناستاردىڭ وزەكتى ماسەلەلەرىن تالقىعا سالدى. تاراپتار وسى جىلى ىسكە قوسىلعان اقش – قازاقستان عىلىمي-تەحنيكالىق ىنتىماقتاستىق ءجونىندەگى كوميسسياسىنىڭ جۇمىسىن ەرەكشە اتادى.
ۋ.بەرنس قازاقستانعا اقش اتىنان اۋعانستانداعى ءومىردى تۇراقتاندىرۋعا قوسقان ۇلەسى, يراننىڭ يادرولىق باعدارلاماسى جونىندەگى كەلىسسوزدەر ۇدەرىسىنە قاتىسقانى ءۇشىن العىس ءبىلدىردى.
سونىمەن قوسا, ە.ىدىرىسوۆ ءوزىنىڭ شەتەلدىك ارىپتەستەرىمەن ەكىجاقتى قارىم-قاتىناستىڭ قازىرگى جاعدايى مەن بولاشاعىن تالقىعا سالدى. اتاپ ايتقاندا, دجيبۋتي سىرتقى ىستەر ءمينيسترى ماحمۋد الي يۋسۋفپەن, گايانا سىرتقى ىستەر ءمينيسترى كەرولين رودريگەس-بريكەتتپەن, كيپر سىرتقى ىستەر ءمينيسترى يواننيس كاسۋليديسپەن, ليبەريا سىرتقى ىستەر ءمينيسترى اۆگۋستين نگافۋانمەن, موناكو سىرتقى ىستەر ءمينيسترى جوزە باديامەن, تۋنيس سىرتقى ىستەر ءمينيسترى وسمان دجارانديمەن جانە بۇۇ با 67-ءشى سەسسياسىنىڭ پرەزيدەنتى ۆۋك ەرەميچپەن كەلىسسوزدەر جۇرگىزدى.
موناكو سىرتقى ىستەر مينيسترىمەن كەزدەسۋ بارىسىندا قازاقستاندىق ديپلومات قازاقستان پرەزيدەنتىنىڭ وسى ەلدە باستالعان ساپارىن اتاپ ءوتىپ, تەحنولوگيا ترانسفەرتى مەن موناكالىق ارىپتەستەردى قازاقستاننىڭ يننوۆاتسيالىق باستامالارىنا بەلسەندى تارتىلۋىنا قىزىعۋشىلىق تانىتتى. بۇل جەردە, ەڭ الدىمەن, قۇرىلىس, قورشاعان ورتانى قورعاۋ, قايتا جاڭارتىلاتىن ەنەرگيا كوزدەرى, تۋريزم, فارماتسەۆتيكا, اقپاراتتىق تەحنولوگيالار سالالارىنداعى ىنتىماقتاستىق ماسەلەلەرىنە باسا نازار اۋدارىلدى.
ەكىجاقتى كەلىسسوزدەردىڭ نەگىزگى تاقىرىبى قازاقستاننىڭ كانديداتۋراسىن 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە ۇسىنۋعا باعىتتالدى. اتالعان ماسەلە قازاقستان سىرتقى ساياساتىنىڭ ەڭ ماڭىزدى ماقساتتارىنىڭ ءبىرى بولىپ تابىلادى. قازاقستاننىڭ بۇۇ قاۋىپسىزدىك كەڭەسىندەگى قىزمەتى, قاۋىپسىزدىك سالاسىنداعى ماڭىزدى شەشىمدەر قابىلداۋ ۇدەرىسىنە قاتىسۋى جاھاندىق جانە ايماقتىق دەڭگەيدە ۇلتتىق مۇددەلەردى ەسكەرە وتىرىپ, الەمدىك ساياسي ماسەلەلەردى قاراستىرۋعا تەڭ دارەجەدە قاتىسۋعا مۇمكىندىك بەرەدى.
قازاقستاننىڭ قاۋىپسىزدىكتى نىعايتۋ مەن تۇراقتاندىرۋداعى تاجىريبەسى, سونىڭ ىشىندە ەۋروپاداعى قاۋىپسىزدىك جانە ىنتىماقتاستىق جونىندەگى ۇيىم مەن يسلام ىنتىماقتاستىق ۇيىمىنا توراعالىعى شەڭبەرىندە جيناعان تاجىريبەسى بۇۇ-نىڭ زاماناۋي سىن-قاتەرلەرىنە سەرپىندى جانە سايما-ساي جاۋاپ قايتارۋ كۇش-جىگەرىنە قوسىمشا ىقپال جاسار ەدى. قازاقستان بۇۇ جۇمىسىنا ازىق-ت ۇلىك, سۋ, ەنەرگەتيكا جانە يادرولىق قاۋىپسىزدىك سالالارىندا جاڭا يدەيالار مەن ۇستانىمدار ەنگىزۋگە نيەتتى.
ە.ىدىرىسوۆتىڭ بۇۇ با جالپى دەباتتارىنداعى سويلەيتىن ءسوزى 28 قىركۇيەككە جوسپارلانعان. سونىمەن قاتار, بۇۇ باسشىلىعىمەن جانە شەتەلدىك ارىپتەستەرىمەن بىرقاتار ەكىجاقتى كەزدەسۋلەر ءوتكىزەدى دەپ كۇتىلۋدە.
