«بيىلعى رامازاننىڭ قاسيەتتى قادىر كەشى مامىر ايىنىڭ 19-نان 20-نا قاراعان تۇنگە سايكەس كەلىپ وتىر. 19 مامىردا مەشىتتەرىمىز تاڭعى ساعات 07:00 مەن كەشكى 20:00 ارالىعىندا جۇمىس ىستەيتىن بولادى. وسى رەتتە بارشاڭىزدى قادىر كەشىن ءوز ۇيلەرىڭىزدە وتكىزۋگە شاقىرامىن. بيىلعى رامازان ايى كارانتين جاعدايىندا ءوتىپ جاتقانى وزدەرىڭىزگە بەلگىلى. كارانتين تالاپتارىن ورىنداۋىمىز ءتيىس. بۇل – ءسىز بەن ءبىزدىڭ, ءوز وتباسىمىز بەن ەڭ جاقىن تۋىستارىمىزدىڭ دەنساۋلىعى مەن ءومىرىنىڭ يگىلىگى ءۇشىن قابىلدانعان شەشىم. مۇنى تۇسىنىستىكپەن قابىلدايسىزدار دەگەن ۇمىتتەمىن.
قازاقستان مۇسىلماندارى ءدىني باسقارماسى قاسيەتتى قادىر كەشىندە قۇران حاتىم دۇعاسىن, ۋاعىز-ناسيحات پەن پايدالى دارىستەردى ونلاين رەجيمدە وتكىزەدى. ۇيدە وتىرىپ, ونلاين رەجيمدە دۇعاعا قاتىسىپ, ناسيحات تىڭداۋعا تولىق مۇمكىندىك بار.
وسى رەتتە بارشا قاۋىمدى قاسيەتتى قادىر تۇنىندە تۇركىستان وبلىسىنداعى تاسقىن سۋدان زارداپ شەككەن جەرلەستەرىمىزگە دۇعا جاساۋعا ۇندەيمىن.
جاراتقان جاببار يەمىز جەر بەتىنەن جۇقپالى ىندەتتى جويىپ, جاقسىلىقتا جۇزدەسۋدى ءناسىپ ەتكەي. مىڭ ايدان دا قايىرلى قادىر تۇنىندە تىلەگەن تىلەكتەرىمىز بەن قۇلشىلىقتارىمىزدى اللا تاعالا قابىل ەتكەي! ءامين!», - دەدى ناۋرىزباي قاجى تاعان ۇلى.
