- ەلىمىزگە بەلگىلى جۋرناليست, حالقىمىزدىڭ اياۋلى ۇلى بەيسەن قۇرانبەكتىڭ قازاسى بارشامىزعا اۋىر ءتيدى. «ايتۋعا وڭاي», «قارەكەت» باعدارلامالارى ارقىلى قازاق جۋرناليستيكاسىندا وزىندىك قولتاڭباسىن قالدىرعان تەلەجۇرگىزۋشى, ەلدىڭ مۇڭىن ءوز مۇڭىنداي كورىپ, كوپكە قامقور بولعان جومارت جۇرەكتى ازامات باقيعا اتتاندى. مارقۇمنىڭ وتباسىنا, جاقىندارىنا قايعىلارىنا ورتاقتاسىپ, كوڭىل ايتامىز.
قازاق جۋرناليستيكاسى اۋىر قايعىعا دۋشار بولدى. 49 جاسقا قاراعان شاعىندا بەلگىلى جۋرناليست بەيسەن اباي ۇلى قۇرانبەك دۇنيەدەن ءوتتى. ەلدەگى باق سالاسىنىڭ دامۋىنا ەرەكشە ۇلەس قوسقان قارىمدى ءتىلشى, اۋزى دۋالى جۇرگىزۋشى, بىلىكتى مەديا-مەنەدجەردىڭ سىڭىرگەن ەڭبەگى ەل ەسىندە. قيىندىقتان قايتپايتىن, وتانى ءۇشىن قىزمەت ەتۋگە بەكىنگەن اسىل جاننىڭ بەينەسى ارىپتەستەرىنىڭ جادىندا قالادى. ايتۋعا قيىن, قابىلداۋعا سۋىق حابار ءبىزدىڭ دە قابىرعامىزدى قايىستىردى.
بەيسەن قۇرانبەك ءال-فارابي اتىنداعى قازاق ۇلتتىق ۋنيۆەرسيتەتىن بىتىرگەن. ەڭبەك جولىن رەسپۋبليكالىق «سپورت» گازەتىندە ءتىلشى, جاۋاپتى حاتشى قىزمەتىنەن باستاعان. «راحات», «31 ارنا», «حابار» ارنالارىندا, پرەزيدەنت تەلەراديوكەشەنىندە قىزمەت اتقارعان. 2007-2012 جىلدارى الماتى وبلىستىق «جەتىسۋ» تەلەارناسىنىڭ باس ديرەكتورى بولدى. 2013-17 جىلدارى «قازاقستان» تەلەارناسىنداعى جالپاق جۇرتقا تانىمال «ايتۋعا وڭاي» الەۋمەتتىك-تۇرمىستىق توك-شوۋىنىڭ جۇرگىزۋشىسى بولدى. 2017 جىلدىڭ قىركۇيەك ايىنان بەرى ۇلتتىق ارناداعى «قارەكەت» باعدارلاماسىن جۇرگىزدى. 2014 جىلدىڭ قازان ايىندا الماتى وبلىستىق «جەتىسۋ» تەلەارناسىنىڭ باس ديرەكتورى بولىپ قايتا تاعايىندالدى.
ول قاي جەردە جۇرسە دە ءوزىنىڭ كاسىبي بىلىكتىلىگىن تانىتتى. قالامى جۇيرىك, وزىندىك ويى بار ەكەنىن دالەلدەدى. وزەكتى تاقىرىپتى تاپ باسىپ, قوعامدىق ماسەلەنى كوتەرە ءبىلدى. بەيسەن اباي ۇلىنىڭ تۋىس تۋعاندارى مەن ونىڭ وقىرماندارى مەن كورەرمەندەرىنە, ارىپتەستەرىنە, جالپى قازاق ەلىنە قايعىرىپ, كوڭىل ايتامىز! اللا تاعالا اسىل ازاماتتىڭ الدىنان جارىلقاسىن, - دەلىنگەن ءمينيستردىڭ كوڭىل ايتۋ حاتىندا.
