«قۇرمەتتى مۋزەي ءىسىنىڭ ماماندارى! 18 مامىر – بۇكىلالەمدىك قاۋىمداستىق ءۇشىن ەرەكشە كۇن. بۇل كۇنى حالىقارالىق مۋزەيلەر مەرەكەسى اتاپ وتىلەدى.
مۋزەيلەر مادەني, تاريحي جانە كوركەم مۇرانى ساقتايدى. مۋزەيلەر ءاربىر ادام بالاسى ءۇشىن دەمالىس جانە ءوزىن-ءوزى جەتىلدىرۋ ورنى. مۋزەيلەرسىز قوعامنىڭ ينتەللەكتۋالدىق, مادەني, ءبىلىم بەرۋ دەڭگەيىن كوتەرۋ مۇمكىن ەمەس. ياعني, مۋزەيلەر ءوز ەلىنىڭ جانە الەمدىك وركەنيەتتىڭ مادەني جانە رۋحاني مۇراسىن سۇيۋگە جانە تۇسىنۋگە ۇيرەتەدى.
حالىقارالىق كورمەلىك جوبالار قازاقستاندىق كورەرمەندەرگە شەتەلدىك مۋزەيلەردىڭ ءتۇرلى ماڭىزدى كورمەلەرىمەن تانىسۋعا مۇمكىندىك بەردى. اتاپ ايتقاندا, مەملەكەتتىك ەرميتاج, ترەتياكوۆ گالەرەياسى, فرانتسيانىڭ ۇلتتىق مۋزەيلەرىنىڭ بىرلەستىگى – گراند پالە, لوندوننىڭ ۆيكتوريا جانە البەرت مۋزەيى, شەنسي پروۆينتسياسىنىڭ تاريحي مۋزەيى (سيان ق.), يسلام مادەنيەتى مۋزەيى (كاير ق., ەگيپەت), ىسكە اسىرعان حالىقارالىق جوبالار اياسىندا ءتۇرلى كوركەم جانە شىعارماشىلىق ءىس-شارالار ۇسىنىلدى.
مۋزەيلەر سونىمەن قاتار قازاقستاننىڭ مادەنيەتىن شەتەلگە تانىستىرىپ كەلەدى. «رۋحاني جاڭعىرۋ» باعدارلاماسى اياسىندا وتكىزىلىپ كەلە جاتقان ەڭ جارقىن جوبالاردىڭ ءبىرى «التىن ادامنىڭ الەم مۋزەيلەرىنە شەرۋى» سونىڭ ايعاعى. ءۇش جىل ىشىندە «التىن ادام» الەمنىڭ 26 ەلىنىڭ ۇلتتىق مۋزەيلەرىندە كورسەتىلدى.
كورونوۆيرۋس پاندەمياسىنا بايلانىستى مۋزەيلەردىڭ ونلاين رەجيمدە ۇسىنعان بەلسەندى جۇمىسىن دا ەرەكشە اتاپ ءوتۋ كەرەك. وسى كۇندەرى مۋزەيلەر كەلۋشىلەر ءۇشىن ۆيرتۋالدى كەڭىستىكتە قولجەتىمدى بولدى. سونىڭ ارقاسىندا بيىل نۇر-سۇلتان قالاسىنداعى قازاقستان رەسپۋبليكاسىنىڭ ۇلتتىق مۋزەيى مەن الماتى قالاسىنداعى قازاقستان رەسپۋبليكاسىنىڭ ورتالىق مەملەكەتتىك مۋزەيى تمد ەلدەرى ىشىندە ۆيرتۋالدىق مۋزەيلەردىڭ ۇزدىك بەستىگىنە ەندى.
سونىمەن قاتار, بيىل قازاقستاننىڭ مۋزەي ىسىندەگى تەڭدەسسىز فلاگمانداردىڭ ءبىرى – ءا. قاستەەۆ اتىنداعى مەملەكەتتىك ونەر مۋزەيىنىڭ ۇجىمى 85 جىلدىق مەرەيتويىن اتاپ وتەدى.
وسى ورايدا بارلىق مۋزەيلەردىڭ كاسىبي جانە شىعارماشىلىق بەلسەندى كومانداسىنا ەرەكشە العىس ايتامىن جانە جۇمىستارىنا تابىس تىلەيمىن!
وتاندىق مۋزەيلەردىڭ ۇجىمدارى مەن ونەر سۇيەر قاۋىمدى حالىقارالىق مۋزەي كۇنىمەن قۇتتىقتاي وتىرىپ, بارلىعىڭىزدى وسى مەرەكەنى بىرگە تاماشالاۋعا شاقىرامىن» دەپ جازىلعان قۇتتىقتاۋ حاتىندا.
