بۇگىندە سۋارمالى القاپتاردى 200 مىڭ گەكتارعا ۇلعايتۋ مىندەتى قويىلىپ وتىر. ونىڭ كولەمى 110 مىڭ گەكتاردى قۇرايدى. ال, سۋارۋ جۇيەلەرىن قالپىنا كەلتىرۋ جۇمىستارىنان سوڭ بۇل كورسەتكىش كەم دەگەندە 180 مىڭ گەكتارعا دەيىن ارتادى دەپ جوسپارلانۋدا.
سونىمەن قاتار, جامبىل اۋدانىنداعى 3098 گەكتار القاپ «رايس» ماگيسترالدى كانالىنا بايلانعان شارۋاشىلىقارالىق جانە شارۋاشىلىقىشىلىك ارنالارىنان كەلەتىن سۋعا تاۋەلدى. بۇگىندە اتالعان اۋدانداعى 36 شارۋاقوجالىق جوڭىشقا, جۇگەرى جانە باقشا داقىلدارىن وسىرۋمەن اينالىسۋدا.
دەگەنمەن, 1332 گەكتار جەر سۋ تاپشىلىعىنا بايلانىستى پايدالانىلماي وتىر. جۇرگىزىلىپ جاتقان قايتا جاڭعىرتۋ جۇمىستارى وسى ماسەلەنى شەشۋگە باعىتتالعان. سول سياقتى ۇزىندىعى 8,4 شاقىرىم بولاتىن «يسمايل» ماگيسترالدى كانالىنداعى جاعداي دا وسىعان ۇقساس. مۇندا قولعا الىنعان شارالار ناتيجەسىندە 798 گەكتار القاپتاعى سۋارمالى جەرلەر قالپىنا كەلتىرىلەدى دەپ كۇتىلۋدە. يرريگاتسيالىق جانە درەناجدىق جۇيەلەردى جاقسارتۋ جونىندەگى جوبانىڭ ەكىنشى كەزەڭىن جۇزەگە اسىرۋ جامبىل اۋدانىنىڭ سۋارمالى جەرلەرىنىڭ 5000 گەكتار القاپتاعى مەليوراتيۆتىك جاعدايىن جاقسارتۋعا مۇمكىندىك بەرەدى. جالپى العاندا, جامبىل وبلىسى بويىنشا ەۋروپالىق قايتا قۇرۋ جانە دامۋ بانكىنىڭ 24,7 ميلليارد تەڭگە نەسيەسى ەسەبىنەن سۋ شارۋاشىلىعى جانە سۋ بۇرۋ جۇيەلەرىنىڭ 310 نىسانى قايتا جاڭارتىلاتىن بولادى.
«قازسۋشار» رمك فيليالىنىڭ باسشىسى قازىبەك بەدەباەۆ «قاراقوڭىز» سۋ قويماسىنىڭ سىيىمدىلىعىن 8,5 ميلليون تەكشەمەتردەن 18,5 ميلليونعا دەيىن ۇلعايتۋ, جامبىل اۋدانى, جاسوركەن اۋىلىنداعى گيدرولوگيالىق بەكەتتىڭ ناشار جاعدايى, «حيمپارك تاراز» جشس-ءنىڭ تىرەك قۇرىلىسىن جوندەۋ سياقتى بىرقاتار ماسەلەلەردى اتاپ ءوتتى. «كانالداردى جوندەۋدەن باسقا قۇدىقتار قازۋ ءىسى دە وزەكتى.
مۇمكىن بولسا, بارلىق قولدانىستاعى كانالداردى بەتونداۋ قاجەت. بۇل ازداپ قىمباتقا تۇسكەنىمەن, بىراق ول ۇزاق شىداس بەرەدى جانە سۋ شىعىنىن ايتارلىقتاي ازايتادى», دەدى بەردىبەك ساپارباەۆ. ال, مينيستر ماعزۇم مىرزاعاليەۆ ەل پرەزيدەنتىنىڭ الداعى 10 جىلدا سۋارمالى جەرلەردىڭ اۋماعىن 1,6 ميلليوننان 3 ميلليون گەكتارعا دەيىن ۇلعايتۋ تۋرالى تاپسىرماسى بار ەكەنىن اتاپ ءوتتى. مۇنداي جوبالاردىڭ اۋىل شارۋاشىلىعىن دامىتۋ مەن شارۋالاردىڭ ءومىر ءسۇرۋ دەڭگەيىن كوتەرۋ ءۇشىن كەرەكتىگى دە ايتىلدى.
جامبىل وبلىسىنا جۇمىس ساپارىمەن كەلگەن ماعزۇم مىرزاعاليەۆ تاعى دا بىرقۇاتار نىسانداردى ارالاپ, بىرقاتار جوسپارلارمەن تانىستى. اتاپ ايتساق, تالاس جانە بايزاق اۋداندارىنىڭ شەكاراسىندا سىيىمدىلىعى 11 ميلليون تەكشەمەتر بولاتىن «اقمولا» سۋ قويماسىن سالۋ جوسپارلانۋدا. جوبا قۇنى – 4,8 ميلليارد تەڭگە. جوبانىڭ ماقساتى – تەمىربەك ستانتسياسىنىڭ استىنداعى تالاس وزەنىنىڭ بويىنداعى جەرلەردى سۋارۋ ءۇشىن كەپىلدى سۋمەن قامتاماسىز ەتۋ. وبلىس اكىمى بەردىبەك ساپارباەۆ قولايلى تابيعي لاندشافتتى ەسكەرە وتىرىپ, مۇندا 500 ميلليون تەكشەمەترگە دەيىن ىلعال جيناۋ مۇمكىن ەكەندىگىن ايتتى. مينيستر ماعزۇم مىرزاعاليەۆ جوبانى قولداپ, مينيسترلىك تاراپىنان قولداۋ كورسەتىلەتىندىگىن جەتكىزدى.
ۇسىنىلىپ وتىرعان قۇرىلىستىڭ بارىسىمەن تانىسقاننان كەيىن كاسكادتى تيپتەگى نىساندى قۇرۋ تۋرالى ۇسىنىس جاسالدى. مۇنداي ۇلگىدە تيىمدىلىك ەكى ەسە ارتىپ, سۋدان باسقا ەلەكتر ەنەرگياسى دا جەتكىزىلەدى. ول ءۇشىن تەحنيكالىق-ەكونوميكالىق نەگىزدەمەنى قايتا قاراۋ, باسقا دا قۇجاتتارعا وزگەرىستەر ەنگىزۋ قاجەت. سۋ قويماسى قۇرىلىسىنا قاتىستى ارنايى جۇمىس توبى قۇرىلاتىن بولدى. سونىمەن قاتار, «بايزاق» ماگيسترالدى كانالىنىڭ 21,9 شاقىرىم بولاتىن تۇيمەكەنت, ءدوڭسارى, وتەگەن, ۇزىن ىشكى شارۋاشىلىق ارنالارىن جوندەۋ جۇمىستارى جالعاسۋدا. ناتيجەسىندە 1000 گەكتار القاپتاعى سۋارمالى جەرلەر قالپىنا كەلتىرىلىپ, «سامبەت» ماگيسترالدى كانالىنىڭ وتاربەك, بولپان, انار جانە وتەلبالىق ىشكى شارۋاشىلىق ارنالارىن قايتا جاڭعىرتۋ جۇمىستارى 700 گەكتار سۋارمالى جەردى اينالىمعا قوسۋعا سەپتىگىن تيگىزەدى.
سونداي-اق بەردىبەك ساپارباەۆ پەن ماعزۇم مىرزاعاليەۆ كانالداردى تازارتۋ بويىنشا بايزاق اۋدانىنىڭ مەحانيكالاندىرىلعان جاساق قىزمەتىمەن تانىستى. اتالعان جاساق 17 بىرلىك تەحنيكامەن قامتىلعان. ولار تالاس اۋدانىنداعى بەسىنشى كانالدى تازارتۋعا كىرىسكەن. مەحانيكالاندىرىلعان جاساق قىزمەتىنىڭ ناتيجەسىندە بۇل جۇمىس تۇرىنە تاريفتەر ەكى ەسەدەن استام كورسەتكىشكە تومەندەپ, كوپتەگەن شارۋالار سۋارمالى سۋعا قول جەتكىزە باستاعان. جامبىل وبلىسىنا جۇمىس ساپارى بارىسىندا مينيستر ماعزۇم مىرزاعاليەۆ شۋ جانە قورداي اۋداندارىنداعى بىرقاتار سۋ شارۋاشىلىعى نىساندارىندا بولدى.
جامبىل وبلىسى
